Lug 8

Bipiib ban nan chiɛn Yisa nan a bɔr

1Ni bɔɔn bu le Yisa nan kɔɔ ntim takpemin nin ntim bumin ki mɔɔn Uwonbɔr a naamin kaah yin be man a bɔŋann, le u bɔɔnɔɔb piig nin bilee-n nan nɔɔ u. 2Bipiib ban wee u nan che nnaanbiim nyan bi ni nan nin waah nan teb ban a wiɛn nan mu nan be niin ki nɔɔ u, Meri nan ye u ba (wan nan nyan Magidalin#8:2 Magidalin Meri nan nyan kitiŋ kan wee bi yi ki ke Magidalin n le, ni ma bu le bi yi u ke Meri Magidalin. nan). Wan wee nnaanbiim milile nyan u ni nan, 3le biba mu ye Kuza a poo Joana nin Suzaana nin bipiib takpem. Kuza nan ye ubɔr Herɔd a niin a toontunn ninkpelu le, Le bi biɛn nan jɔɔ bi tɔɔl tɔɔl a wan yɔɔr ki tenn Yisa, ki ter u ma nin u bɔɔnɔɔbin biɛn.

Uwanbo bur a bɔŋal

(Matiu 13:1-9; Mag 4:1-9)

4Bininfob nan nyan ntim ki dan Yisa ban. Baah nan nan yabig n-yonn man nin le Yisa gaa bi libɔŋal ke,

5“Ukpaar uba le nan jon bukpaabin ke u tan yaal idi. Waah nan yaal nan, le iba lu nsanpoolin, le bininfob taan i bu, le nnɔɔm mu ji pii ki jin. 6Le iba mu lu kutintiɛg bu, ki pan weem le ki ji kpo, nan bu-n nin yaan kaa nan sɔɔn ni. 7Le iba lu ikunkon a bol, ki lagin pan nin ikunkon nin, le i ŋuuri ku. 8Le iba mu lu ntanŋam bol, ki pan nbamɔm, ki yabig ki lon jon baah nan bun man ni nfim kokobig.”

Yisa kaah nan gaa bi libɔŋal nan ki diɛ n-yonn man ni, le u bei bi ke, “Wan jɔɔ itul ke un gbirim.”

Libɔŋal nan a taai

(Matiu 13:10-17; Mag 4:10-12)

9Le u bɔɔnɔɔb nan baan u libɔŋal nan a taai. 10Le u ke, “Nim bu ke Uwonbɔr kpiir ki wɔɔn ni ki che nim biɛ tibɔr woon kaar ki jiin U naamin paam, amaa biba ma, n gaa bi ibɔŋal le,

‘ke bi li lig, kaa yin kan ni,

ke bi gbir kaa yin biɛ ni taai yi.’#Azaya 6:9

Yisa kaah wɔɔn uwanbo bur a bɔŋalin a taai man

(Matiu 13:18-23; Mag 4:13-20)

11“Libɔŋal nan a taai ye nan le: Ndibimin li ye Uwonbɔr a bɔr. 12Le ndibim man lu nsan nan nann bininfob ban gbir n bɔr wee ulinlaril dan ki nan choo nyan bi sufu ni ke bi laa ŋaam yada wee ki nan kan fee jaa nan. 13Man mu nan lu kutintiɛg nan bu mu nann bininfob ban gbir n bɔr nin npopeen, wee ta laa jiir bi sufu ni nbamɔm n le; bi ŋa Uwonbɔr yada n-yonn wama nan le, tɔ, le nton pii bi ke, le bi yii n nɔɔm. 14Man mu lu ikunkon ni nan, nann bininfob ban gbir Uwonbɔr a bɔr wee ki sin ji che bi sufu be dulinya nan a njɔɔm nin linunchɔril bir lan be dulinya nan yaan ni, ti nyagin Uwonbɔr a bɔr n bu le bi sufu ni, le taa yin lo iloon ni. 15Amaa man mu lu ntanŋam a bol nmu nann bininfob ban jɔɔ gbir sei nin ban a sufu ŋan, ban gbir tibɔr, ki ŋmag ti kenken, ki jɔɔ nnyiginim le ki lo iloon.

Fila a bɔŋal

(Mag 4:21-25)

16“Uba kaa nyɔɔ fila wee ki ta kiyiikpoŋ chigin ki bu, bee ki ta siin gadu a lɔŋin ni. See ke u taa tɔɔn niwann nan kper bu, wee bininfob ban biɛn kɔɔn ke, bi kan nwonween nin. 17Tibɔr tan biɛn woo nan, li nya npaan nin, le tiwann tan biɛn nan be libunbɔnlin li kpiir ki nya nwonween ni. 18Mambu, ni li nyi naah gbir man nin. Tɔ, wan jɔɔ ke, u li mann gaa ki kpiɛ, amaa wan kaa jɔɔ ke, u li lann nan wee u tiɛr ke u jɔɔ-n gbaa.”

Yisa a watiib nin u na a bɔr

(Matiu 12:46-50; Mag 3:31-35)

19Iyaayoo le Yisa a watiib nin u na dan u ban, amaa le baa nan fir fo u ban ni, nan bu-n bininfob le nan yab. 20Le uba nan bei u ke, “A watiib nin a na be nkaafiin ki ban bin kaŋ.”

21Le u jiin ke, “Ban gbir Uwonbɔr a bɔr ki chee wee ki tun nin ni samin bi ma ye n watiib nin n na.”

Ntafaam kaah nan chee Yisa a mɔb man

(Matiu 8:23-27; Mag 4:35-41)

22Weemba daal le Yisa nin u bɔɔnɔɔb nan kɔɔ kuŋaluŋin; le u bei bi ke, “Ni che ti lɔŋ limɔgil nan a nan bu a dool”, le bi piin bi sanchonl. 23Baa nan piin ki chaa nan, le Yisa dɔɔn ki jiɛn. Le ntafapɔɔrim nan dan limɔgilin a poolin le nnyum ni fii ki kɔɔ kuŋaluŋin a poolin ki nan ban min gbee, ni nan ye bin kɔɔ kidaŋin le.

24Le u bɔɔnɔɔbin dan u ban ki nan fiin u njiɛmin ki ke, “Uninkpel, uninkpel, ti li nɔɔ nnyum!”

Le u fii ki tiɛn ntafaamin nin kunyungbɔŋ nbu ke min ŋmin na, le mi ŋmin chii. 25Le u baan u bɔɔnɔɔbin ke, “Ni yadaa be laa?”

Le ni gar bi, le bijawaam nan choo bi. Le bi baan tab ibinbaan ke, “Ninfo boliba yen naa? Wee u pag sei ntafaam nin kunyungbɔŋ wee mi chee u mɔb baa?”

Yisa kaah nan teb uja waar man

(Matiu 8:28-34; Mag 5:1-20)

26Yisa nin u bɔɔnɔɔb nan tan foo Gereza, kitiŋ kan be Galilii a biɛŋ a doolin. 27Le Yisa nyan kuŋaluŋ a poolin, le Gereza a tiŋ a jau wan nan jɔɔ nnaanbiim nan, nan kenn u. Ni nan yuur ke waa yee tiwann yɔɔri, u mu kaa ji nan be iniin ni, amaa le ki sin dɔɔ tikarin. 28Waah nan kan Yisa nan le u yigin nmɔpɔɔn ki gbaan Yisa a nintogil, ki tiɛn ke, “Yisa wan ye Uwonbɔr wan be paabin a Bija, min nin fin babu? N baliŋ le, laa mugir mi!” 29Nan bu-n Yisa pii nan pag nin tininkper a pɔɔm ki sei nnaanbiimin ke bi nya uja-n yaan na. Isaŋ takpem ni nan fii u bu le, hali nin baah nan lol u nɔɔi nin u taai nmɔn biɛn ni, u nan ti chinn tikulorin le, le nnaanbiim nmɔn nan ti taar u ki jo kukunkɔɔg bu.

30Le Yisa baan u ke, “A yinl laa?” Le u ke, “N yinl ye Tiyaba,” Nan bu-n nnaanbiim takpem le nan be u ni. 31Iyaayoo le nnaanbiim nmɔn nan gbaa balin Yisa ke u laa che bin jiir kubonyɔɔŋ nan yaan ni.

32Idool takpem li nan be ligungonl a paab ki ji, le nnaanbiimin nan balin Yisa ke un che bi tan kɔɔ idoolin; le Yisa nan sei bi nsan. 33Nnaanbiim kaah nan nyan uja-n ni ki nan tan kɔɔ idoolin; le idoolin biɛn guun burburbur, ki nyan ligungonl a paab, ki jiir limɔgilin, ki nɔɔ nnyum.

34Tɔ, bidookpaab nan kaah nan kan man nin, le bi nan guun libol nmɔn, ki tan mɔɔn tibɔrin nmɔn, kitiŋin nin kitingbaai. 35Le bininfob dan ke bin nan lig niwann nan ŋa nmɔn. Baah nan foo Yisa ban, bi nan kan uja wan wee nnaanbiim nan nyan u ni nan kaah ka Yisa ban, ki pɔɔ, le u binbem nan ŋan, le ki yee tiwann yɔɔr, le bijawaam choo bininfobin biɛn. 36Le bininfob ban nan kan nin binumbimin bei bi Yisa kaah ŋa man wee uja wan nan jɔɔ nnaanbiimin kan kutebug. 37Le Gereza a tiŋ a ninfob biɛn dan Yisa ban ki nan balin u ke u nya bi tiŋin na, bijawaam kaah nan choo bin bu. Le Yisa nan jir kɔɔ kuŋaluŋin ki fɔr.

38Uja wan wee nnaanbiimin nan nyan u ni-n nan balin ke un nɔɔ Yisa, amaa le Yisa nan ŋɔɔr u, ki ke, 39“Li jir chaa kun a niin ki tan mɔɔn Uwonbɔr kaah tun nan seiŋa.” Le u nan jir ki jin ntim nmɔn biɛn, ki mɔɔn litoonl takpenl lan wee Yisa tun ki sei u.

Jairu a bisa nin upii wan nan maa Yisa a daala takpeŋin a bɔr

(Matiu 9:18-26; Mag 5:21-43)

40N-yonn man wee Yisa nan labir jir ki tan don limɔgilin ki miin kuninfogbaluŋ li too u nin npopeen, bi biɛn pii nan guu ki nyi u dam bu. 41Uja uba nan be niin le bi yi u ke Jairu; u nan ye kuwonjiɛndiig a ninkpelu le; le u dan ki nan gbaan Yisa a nintogil ki ke un dan u niin 42nan bu-n u bisiɛg gaŋ wan nan jɔɔ ibin piig nin ilee nan li bu, ki ban un kpo.

Yisa kaah nan chaa-n, le kuninfogbaluŋ nan mug ki nin nan tir u. 43Le upii wan nan kan tipiir ibin piig nin ilee wee naa diɛrin nan be niin. Uba kaa nan fir teb u pɔɔgi. 44Le u dan ki nan sir Yisa a bɔɔn ki maa u daala a gbaam. Libol nmɔn yaan le u piirin diɛ.

45Le Yisa baan ke, “Ŋma maam maa?” Le bininfob biɛn niɛ, le Piita bei u ke, “Uninkpel, bininfobin kaah yabin bu le bi tiriŋ.”

46Amaa le Yisa ke, “Uba maa ma, n biɛ ke npɔɔn nyan ngbanann nin na.” 47Ni nan che upii nan kaa ji nan fir ki woo uba Yisa ban ni, le ki nan nyan npaan nin ki sin jegil, ki nan gbaan Yisa a nintogil, ki bei u bininfob biɛn a numbilin nan bu wee u maa u, nin waah kan kutebug weem man. 48Le Yisa bei u ke, “N bisa, a yada li che a kan kutebug. Li chaa nin nposɔɔn na.”

49Yisa kaah la nan be pag man nin, le u ninfo uba nyan Jairu a niin ki ke, “A bisa-n kpo, laa ji che wan wɔɔnn ji fala ki chaan a niin ni.”

50Le Yisa gbir waah pag man, le ki bei Jairu ke, “Laa san bijawaami. Fin len ŋam yada ke u li pɔɔg.”

51Yisa kaa nan foo Jairu a niin nin, waa nan chee uba n nɔɔ u ki kɔɔ, see Piita nin Jɔnn, nin Jemisi, nin kibigin a baa nin ki na. 52Le bininfob biɛn nan be mɔr kibig nmɔn a kpemɔr. Le Yisa bei bi ke, “Ni laa mɔri man. Waa kpo. U jiɛn le.”

53Le bi laa u ki nyi waah kpo. 54Amaa le Yisa choo kibigin a nɔɔ ki ke, “N big fiim.” 55Le u foorug nan jirin, le u fii sir libol nmɔn. Le Yisa bei bi ke bin sei kibigin tijiir wee un ji. 56Le ni gar u baa nin u na takpem. Le Yisa kpaan bi ke bi li nyi bin bei uba nan tun nan bu.

Currently Selected:

Lug 8: KUGL

Highlight

Copy