Lug 7
7
Yisa kaah nan teb Rom a tɔtogib a sanliiru a toontunnu man
(Matiu 8:5-13)
1Yisa kaah nan len man wee ni kɔɔ bininfob a tuli yin ni, le u jon Kapeniɛm a tiŋin. 2Bitɔb a sanliiru nan be niin ki jɔɔ u yom wan wee u num nan gbee, le nwiɛn choo u, ni nan gur wama le nin un kpo. 3Iyaayoo nmɔn le bitɔb a sanliiru win nan gbir Yisa bu, le ki tun juu yaab a ninkpeeb, ke bin tan bei u wee u dan ki nan che u yomu nan n pɔɔg. 4Baah nan foo Yisa ban ni, bi nan balin u le nin kinimaŋ ki ke, “Uja nmɔn kpaan nin a ŋa man sei wa, 5nan bu-n u jiɛ ti ninfob, ki ji maa kuwonjiɛndiig sei ta.” 6Le Yisa nan fii ki nɔɔ bi.
Waah nan tan mal iniin nmɔn yaan ni, le bitɔb a sanliiru win tun u jɔtiib ke bin bei Yisa ke: “Uyudaan, laa bagir a ba ki chaan ni, maa kpaan nin a dan ki nan kɔɔ n niin nan yaan ni.#7:6 Juu yaab a kaalin ni nan wɔɔn ke ban kaa ye Juu yaabin kɔ ban ye Juu yaab a niin ke, bi ŋa iniin nmɔn tijaginn na. Le Juu a ninfo kɔ wan kaa ye Juu a niin ke, u ŋa uba tijaginn na. 7Ni ma bu le n lig ki miin maa kpaan nin n foo a ban ni. Amaa pagim a mɔbonl wee n yomu nan n pɔɔg. 8N baantɔɔl ye wan wee tininkper a pɔɔm ŋmagim le, le n mu ŋmag bitɔtogib. Ki li fir tiɛn uba bu ke ‘Li chaau’ le un jo, ki tiɛn utɔ bu ke ‘Dan’, le un dan, le ki bei n yomu ke ŋa nan na, le un ŋa man.”
9Yisa kaah nan gbir man nin, uja nmɔn a bɔr nan gar u le, le u gbiɛ lig kininfogbalɔŋ kan nɔɔ win, le ki len ke, n bei ni le, maa laa nyi kan uninfo wan jɔ yada nan a bosu, hali nin Iziral yaabin gbaa.” 10Iyaayoo nmɔn le bijab ban u nan tun ni nan labir jir u niin, ki tan foo ki miin u yomu nmɔn pɔɔga.
Yisa kaah nan fiin lipukɔɔl a bija nkumin man
11Naa kan yuuri le Yisa nan jon kitiŋ kan wee bi yi ki ke Neyin ni, U bɔɔnɔɔb nin bininfob takpem le nan nɔɔ u. 12Waah nan foo kitiŋin a timansanmɔnn n-yonn man ni, le u kan baah tu nkum chaa bin tan pii. U takpiir nmɔn nan ye lipukɔɔl liba a bigaŋ le, le kitiŋ nmɔn a ninfob takpem nan be lipukɔɔlin ban. 13Uyudaan kaah nan kan lipukɔɔl nan, le kunyunyunbaag choo u, le u bei u ke, “Laa mɔri.”
14Le u jon ki tan maa nkumin, le ban nan tun nkumin sir. Le u ke, “Unaachipɔɔn, n beiŋ le, fii paaba!” 15Le utakpiirin nan fii kal paab, ki piin ki pag, le Yisa ta u ki ŋubin u na a nɔɔn.
16Le bijawaam nan choo ban biɛn nan be niin nmɔn, le bi don Uwonbɔr a yinl. Ki len ke, “Ulinlenn takpen le kpiirin ti sisiigin. Uwonbɔr le dan ke u nan ter u ninfob.” 17Yisa a bɔr nmɔn nan mɔɔn Judiya a tingbɔŋin nin ntim man nan mal nin yaan nmɔn biɛna.
Jɔnn kaah nan tun u tooi man
18Le Jɔnn a bɔɔnɔɔb nan bei u ni niɛ nan biɛn, le u yin u bɔɔnɔɔb bilee, 19ki tun bin tan baan ke, “Fin li ye wan nan yin dan ni naa, bee ti la li lig u nsan buu?”
20Bijabin kaah nan foo Yisa ban ni le bi bei u ke, “Jɔnn Wan Fu Bininfob Uwonbɔr a Nyunful nan le tun ti ke ti nan baaniŋ ke, ‘Fin le ye wan nan yin dan ni naa bee ti le la li lig u nsan buu?”
21Iyaayoo nmɔn le Yisa nan che bibaarib takpem pɔɔg, le ki nyan nnaanbiim bininfobin ki ligir bijɔɔm takpem. 22Le u bei Jɔnn a tooi ke, “Ni li jir ki tan bei Jɔnn naah kan nan nin naah gbir man: Bijɔɔm ligir, le nwɔbim choon, le nkɔm kan kutebug, le bitukpaab gbir, le bitakpiib fii nkumin, le bi mɔɔn tibɔŋann ni ki sei bilanjiim. 23Tikaar be wan kaa jɔɔ nbiɛnim n bu nan.”
24Jɔnn a tooi yin kaah nan jir a bɔɔn bu, le Yisa nan piin ki pag bininfob ki jiin Jɔnn paam ke: “Naah nan jon lisagilin ni nan tan kan baa? Igbingbaan yan wee nfaam daarin bee? 25Naa ye man ke, ni nan jon ni tan kan baa? Uninfo wan yee tiwann yɔɔr ŋanin bee? Aai, bininfob ban yee kudaapɔɔrug a wann ki be bi wiibin be ibɔrniin le. 26Amaa ni nan jon ni tan kan baa? Ulinlenn naa? Nn, n bei ni le, u yab jon ulinlenn na. 27U bu le ni nan sɔb Uwonbɔr a gbɔŋin ke:
‘N li tun n toom wee un liir a nintogil,
Wan yin mann a dam a sam.’#Malaki 3:1
28N bei ni le, baa laa nyi ma uninfo uba wee u jon Jɔnn ni; amaa wan joor Uwonbɔr a naamin nan yab jon Jɔnn na.”
29(Le bininfobin biɛn, hali nin bilanpogaab, baah nan gbir Yisa a mɔboi, nan chee ke Uwonbɔr a sam ŋan, nan bu-n Jɔnn kaah nan fun bi Uwonbɔr a nyunfulin bu. 30Amaa Farasii yaab nin ban nyi Uwonbɔr a siim nan kaa nan ga Uwonbɔr a mɔleen kaah ye man ki sei bin ni, nan bu-n Jɔnn kaa nan fu bi Uwonbɔr a nyunful li.)
31Le Yisa nan jiin ki bei bi ke, “Nim daandaan nan a ninfob, n yin ta ni ki bigin baa? Bi ye ninfo bol baa? 32Bi nann nbuwaab kaah ka kinyaŋin ki yi tab ke:
‘Ti pee iwol ki tenn ni, le naa waa.
Ti mɔɔr tikpemɔr ki tenn ni, le naa fabin ni!’
33Nim daandaan nan a ninfob ni nann nbuwaab nmɔn le, Nan bu-n Jɔnn Wan nan Fu Bininfob Uwonbɔr a Nyunfulin nan dan kaa ji tijiir kaa nyu ndaami le ni ke, ‘U jɔɔ kinaanbiig le.’ 34Le Uninfosaal a Big nan dan ki ji ki nyu, le ni ji ke, ‘Lig uja nan, u ye ujijir nin udanyur le, ki ye bilanpogaab nin tibirdam a jɔ.’ 35Amaa Uwonbɔr a lam wɔɔn miba ban ga mi ban le.”
Yisa kaah nan be Farasii a jau Simɔnn a niin man
36Farasii yaab uba le nan yin Yisa ke un dan ki nan ji kujɔɔg a jiir u niin, le Yisa nan jon uja nmɔn a niin, le bi nan lagin ki ka ji. 37Upii uba mu nan be kitiŋ nmɔn yaan ki tun tibir. Waah nan nan gbir ke Yisa be iniin nmɔn yaan ki ji tijiir nan, le u nan dan niin ki ŋmag tulaali a lulog#7:37 kululog Litangbagil lan wee bi yi li ke alabasita-n le bi nan ta naan kululog kan jɔɔ kudaag pɔɔrug nan., 38ki nan sir Yisa a bɔɔn u taafar paam le ki mɔr le u nyinyinn nan lur Yisa a taa far bu le u ta u yukper ki pir Yisa a taai, le ki ŋa tulaali ki ŋa u taai nmɔn. 39Farasii a jau wan nan yin Yisa nan kaah nan kan man, u nan tiɛr u sufu ni le ke, “Uja nan bi ye ulinlenn ke, u bi li biɛ upii wan maar u nan kaah ye wan, ke u ye tibir daan le.”
40Le Yisa jiin u ke, “Simɔnn n jɔɔ limɔbonl liba le ki yin beiŋ, le Simɔnn jiin bei u ke, “Wan wɔɔn, beim ni.”
41Le Yisa bei u ke, “Bijab bilee le nan jɔɔ wan peŋ bininfob ilig a pɔnl. Uba nan jɔɔ u pɔnl nkpalam kobiŋmu, le utɔ mu jɔɔ nkpalam piŋmu. 42Bi bilee nmɔn bi ni uba kaa nan fir yɔn ni. Le u nan jiɛn per bi biɛn ke bi li chaau. Tɔ, a tiɛr ki miin bi bilee nan ŋma le ni nan yin jiɛ wan pen bi ilig nan a bɔr takpem maa?”
43Le Simɔnn jiin u ke, “N tiɛr wan a pɔnl nan yaab wee u jiɛn per win le.” Le Yisa bei u ke, “A jɔɔ ibamɔn.” 44Ki nan gbiɛ lig upii nmɔn, le ki bei Simɔnn ke, “A kan upii nan waa? Maah kɔɔn a niin nan ŋaa seim nnyum wee n ŋunn n taai, amaa upii nan ma ta u nyinyinn le ki ŋunn n taai, le ki ji ta u yukper ki pir pir n taai. 45Ŋaa poor mi amaa u ma nan sɔɔn#7:45 Juu yaab a kaalin bi poor tab nin itakpin a mɔɔrim le, amaa Bikɔɔm ma sɔɔg tum le ki poor bee ki tenn tab inɔɔ. le ki poorim n-yonn man wee n kɔɔn a niin nan ki nan kpaa daandaan nan. 46Ŋaa biɛ nug n yukper nkpami amaa upii nan ma faan n taai le tulaali. 47Mambu N beiŋ le, n jiɛn u toonbir takpem ki per wa, ni ma bu li che u bam man takpem. Amaa wan wee n jiɛn u toonbir wama ki per u nan, u mu jiɛm wama le.”
48Le Yisa nan bei upii-n ki ke, “A kan tibir a jiɛn pera.”
49Le bicham ban gur ki nan ka ji nan, nin baan tab ibinbaan ke, “Ŋma sɔɔ, wee hali ki li fir jiɛn tibir ki per aa?”
50Le Yisa bei upii-n ke, “A yada feeŋ gaba. Mambu li chaa nin nposɔɔn na.”
Currently Selected:
Lug 7: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
