Lug 6

Ibinbaan ki taa jiin Likpakɔɔl daal a bɔr

(Matiu 12:1-8; Mag 2:23-28)

1Juu yaab a kpakɔɔl liba daal, le Yisa nin u bɔɔnɔɔb nan nɔɔ kɔɔ bukpaab biba a poolin. Le u bɔɔnɔɔbin choon ki gen iyoo ki nug bi nɔɔn ŋma. 2Le Farasii yaab biba nan baan bi ke, “Ba ŋa ni tun nan wee ti siim kaa che ti tun likpakɔɔl daalaa?”

3Le Yisa nan jiin ki baan bi ke, “Naa nyi ki karin Uwonbɔr a gbɔŋin, nkom kaah nan choo Defid nin u tab wee u ŋa man nin naa? 4U nan kɔɔ iwonjiɛn niin ki yuur kasi a boroboro#6:4 kasi a boroboro Biminmanib 24:5-9; Nnyam 25:30. ki ŋman, ki ŋa sei u tab, amaa nsiim kaa nan wɔɔn nin uba nŋman boroboro nmɔn ni see biminmanib a binba.”

5Le Yisa bei bi ke, “Uninfosaal a Bija-n le ye likpakɔɔl daal nmɔn a yudaau.”

Uja wan a nɔɔ nan kpe-n a bɔr

(Matiu 12:9-14; Mag 3:1-6)

6Juu yaab a kpakɔɔl liba daal jigin, le Yisa kɔɔ kuwonjiɛndiigin ki wɔɔn bininfob Uwonbɔr a bɔr. Le uja uba nan be niin le u nɔɔjiim kpo. 7Le ban nan wɔɔn Uwonbɔr a siimin nin Farasii yaab nan be niin, ki ban bin lig njee Yisa li teb bininfob likpakɔɔl daalaa. Bi nan ban bin kan nan wee bi li ta bii u yinl le ki ke u bii likpakɔɔl daala. 8Amaa Yisa nan nyi baah tiɛr man, le ki bei uja wan a nɔɔ kpo nan ke, “Fii sir bininfob nan a nintogila.” Le u fii ki tan sir niin.

9Le Yisa baan bi ke, “N baan ni le, ti siim wɔɔn ke nii likpakɔɔl daalaa: Ti ŋa nan ŋan bee nan biraa? Ti fee limiɛfol bee ti bii laa?”

10Le u nan lig bininfobin biɛn a num paam ki bei uja-n ke, “Tann a nɔɔ nmɔn na.” Le u tann ki miin mi jir pɔɔg biɛna. 11Amaa le bi ŋuui nan fii Yisa bu takpem, le ki nan piin ki lolig baah li ŋaa Yisa man.

Yisa kaah nan gann u tooi piig nin bilee man

(Matiu 10:1-4; Mag 3:13-19)

12Le weemba daal le Yisa don lijɔɔl a paab, un tan miɛ Uwonbɔr, le ki miɛ ki tan wonn kutaag. 13Naah nan wonn njakpanyiɛn ni, le u nan yin u bɔɔnɔɔb le ki gann binib piig nin bilee ki yin bi ke u tooi: 14U nan gann Simɔnn (wan wee u nan yi u ke Piita nan) nin Simɔnn a waal Anduru, nin Jemisi, nin Jɔnn, nin Filib, nin Batolomiu, 15nin Matiu, nin Tomasi, nin Jemisi wan ye Alifiu a bija nan; nin Simɔnn wan wee bi nan yi u ke Zealo#6:15 Zealo nan ye bininfob ban nan kɔn bi bol a kaal bu le.; 16nin Judasi wan nan ye Jemisi a bija nan; nin Judasi Isikariya (wan nan nan kɔɔr Yisa nan).

Yisa kaah nan wɔɔn ki sin teb bininfob a bɔr

17Le Yisa nin u bɔɔnɔɔb nan nɔɔ jiirin ki nan sir npaan nin. Le u bɔɔnɔɔb takpem mu nan be niin, le bininfob takpem nan be niin ki kpiɛ, bi nan nyan Judiya a tiŋin nin Jerusalam, nin nnyum takpem a timin Taya nin Sidonn a tingbaan yin le; 18ban nan dan bin nan gbir u bɔr le ki sin kan liwiɛn tebilin. Ban wee nnaanbiim nan nɔɔn nan kan kutebuga. 19Le bininfob biɛn nan ban bin maa Yisa a gbanann, npɔɔn kaah nan nya u gbanann nin ki che bininfob pɔɔgir n bu.

Npopeen nin npoobiin a bɔr

(Matiu 5:1-12)

20Le Yisa nan lig u bɔɔnɔɔbin ki bei ke:

“Tikaar be nim ban ye bilanjiimin bu,

nan bu-n Uwonbɔr a naam ye ni yaan le.

21Tikaar be nim ban wee nkom jɔɔ ni daandaan nan,

nan bu-n ni na li ji ki gbee.

Tikaar be nim ban mɔr daandaan nan,

nan bu-n ni na li la.

22Tikaar be ni bu, n-yonn man wee bininfob nan ni,

n-yonn man wee bininfob wiɛr ni, ki sugir ni,

kaa ban ni yin tibir bu-n, Uninfosaal a Bigin bu.

23“Ni che ni li mɔn ni takpem lidaal nmɔn na, nan bu-n ni nyɔɔr tan be paabin yaba. Man a fala le bi baam nan jɔ ŋaan Uwonbɔr a linlem.

24Amaa woo, nim bijɔɔndam,

nan bu-n nim pii kan ni wiiba.

25Woo, nim ban ji ki gbeeg daandaan,

nan bu-n nkom na li choo ni.

Woo, nim ban laa daandaan nan,

nan bu-n ni na li mɔɔ tikpemɔr ki ji mɔɔ tinyinyinn.

26Woo, nim ban wee bininfob biɛn pagir ni nan,

nan bu-n man le bi baam nan pagir tibɔkar a linlem.

Ti li jiɛ ti dataama

(Matiu 5:38-48; 7:12)

27“N bei nim ban pelig n bɔr nan le: Ni li jiɛ ni dataam, ki li tun nan ŋan ki tenn ban nan ni. 28Kaab ti kaar ki ŋa ban poog imɔɔŋ ki jaar ni bu nan ki li miɛ Uwonbɔr ki tenn ban bii ni. 29Wan pebiŋ kitapag kiba ke, a labir kan gurin sei un peb. Wan yuur a daala takpeŋ ke, laa ke u laa yuur kuwan bigin ni. 30Wan mu miɛŋ nan ke, a sei mu. Wan fee a wan yɔɔr ke, laa ji ban a gaa jiin ni. 31Ni li tun tenn bininfob ke naah ban bi li tun tenn ni man nin na.

32“Ni ye ni jiɛ ban jiɛ ni a binba ke, ni ye ba a nyɔɔr ki sei naa? Hali ‘tibirdam’ tɔɔl jiɛ ban jiɛ bi-n le. 33Ni ye ke ni tun nan ŋan ki tenn ban tun nan ŋan ki tenn ni nan a binba ke, ni ye ba a nyɔɔr ki sei naa? Hali tibirdam tɔɔl ŋaan man le. 34Ni ye ke ni peŋ ban wee ni ji na li ga-n ke, ni ye ba a nyɔɔr ki sei naa? Hali ‘tibirdam’ tɔɔl peŋ man le ki tenn ‘tibirdam’, ki jin na gaa bi wan yɔɔr nmɔn a mɔb.

35“Amaa ni li jiɛ ni dataama, ki li tun nan ŋan ki tenn ba, ki li peŋ ba, ki laa tiɛr ke bi li yɔ jiin ni. Ni nyɔɔr na li yab, le ki ji na li ye Uwonbɔr wan be paab nan a buwaab, nan bu-n u ma tun nan ŋan ki tenn ban a num kaa gbee niba nin bipootondam. 36Ni li jɔɔ linyunyunbasanl ke ni Baa kaah jɔɔ linyunyunbasanl man nin na.

Tab a bɔr a jim

(Matiu 7:1-5)

37“Ni laa ji bininfob tibɔr wee bi nan laa ji ni tibɔri. Ni laa bii bininfobi wee bi mu laa nan bii ni. Jiɛn per bininfoba wee bi mu nan jiɛn per ni. 38Ni li pu, wee bi mu npu ni nin nmag ŋam man, ki nyii nyii, ki dam dam, wee li nan gbee nin imɔgban, ki nin nan wur, ni pan bu. Nan bu-n kiyiikpoŋ kan wee ni jɔɔ magir tiwann yɔɔr ki pu bininfob nan, bi mu li ta kima le ki mag ki pu ni.”

39Le Yisa ji gaa bi libɔŋal ke, “Ujɔɔn li fir da ujɔɔn kpiɛgaa? Bi biɛn kaa li lu libogilin naa? 40Wan tinn kaa jon wan wɔɔnn ni, ni ye wan tinn biɛ diɛ ke, u ni yin nann wan wɔɔnn le.

41“Ba ŋa wee a kan lidabul lan be a kpiɛg a numbil ni, wee kaa sin kan lidagenl lan be a baantɔɔl a numbil ni nan naa? 42A ŋa nii, ki bei a kpiɛg ke “N jɔ, che n nyan lidabul lan be a numbil ni nan, le kaa sin gar lidagenl lan be a tɔɔl a numbil ni nan naa? Fin ulinlaril nan, choo ki nyan lidagenl lan be a numbil ni, wee ki nin fir kan nbamɔm ki nyan lidabul lan be a kpiɛg a numbil ni.

Kisiig nin ki looi a bɔr

(Matiu 7:16-20; 12:33-35)

43“Kisiŋaŋ kaa lo tiloonbiri, le kisibiig mu kaa lo iloon ŋan ni. 44Bisib a loon le bi jɔɔ biɛr bi. Baa ker ikinkan bikunkom bu ki mu kaa ker igbiin kigansiig bu. 45Uninfo ŋan tun itoon ŋan le, nan bu-n u sufu ni ŋan le, le kuninfobiig mu tun titoonbir, nan bu-n u sufu ni kaa ŋan ni. Nan bu-n nan gbee uninfosaal a sufu ni, ni ma le u pag.

Biniinmaab bilee a bɔr

(Matiu 7:24-27)

46“Ba ŋa wee ni yim ‘Uyudaan, Uyudaan,’ kaa sin tun maah len man naa? 47Wan chaan n ban ki pelig n bɔr ki chee ki tun maah ban man nin, n li wɔɔn ni waah nann man. 48U nann uja wan nan maa u niin nan le. U nan gbii le jiir tum ki tan pii kutangbapiig, le ki bil lifiɛl tɔɔn li bu ki maa. Ni bɔɔn bu le utaal dan ki nan nun takpem, le nkpen gbee, le kunyunmaŋ don ki nan tel iniin nmɔn, amaa yaa nan lu, waah nan maa i timaaŋann nin bu. 49Amaa wan gbir n bɔr nan wee kaa chee nan, u nann uja wan mu nan maa u niin litanbiiril bu wee kaa nan gbii jiir tum ki bil lifiɛl nan le, nnyum nan gbee ki don ki nan tel iniin nmɔn le i lu ki ber pelpel.”

Currently Selected:

Lug 6: KUGL

Highlight

Copy