Lug 5
5
Yisa kaah nan yin u chinchinn a bɔɔnɔɔbin man
(Matiu 4:18-22; Mag 1:16-20)
1Weem ba daal le Yisa nan si Genesareti a mɔgilin a gbaam, le kuninfogbaluŋ nan si ki jin u ki pelig Uwonbɔr a bɔr. 2Tiŋalin tilee mu nan si limɔgil nmɔn a gbaam, le bijanchoob nan jiɛn ki sin jon niba paam ke bin tan ŋunn bi janlann. Yisa kaah nan kan tiŋalin nmɔn nin, 3le u nan kɔɔ Simɔnn yaagin, ki bei u ke un tir ki jiin nnyumin wamau. Waah nan tir jiin nin, le Yisa nin ka kuŋaluŋ nmɔn yaan ki wɔɔn bininfob Uwonbɔr a bɔr.
4Waah nan pag ki diɛ n-yonn man nin, le u bei Simɔnn ke, “Tir kuŋaluŋ nmɔn ki kɔɔn nnyum man yaan nyɔɔ wee ki jaa ni janlann wee ki choo ijan.” 5Le Simɔnn bei u ke “N ninkpelu, ti won ban ijan kunyiɛmuŋ taa kan niba. Amaa ŋaah len man nin bu n li jaa tijanlann nmɔn.”
6Baah nan ŋa man nin, le bi choo ijan takpem, le bi janlann nin nan nan chinn. 7Ni ma bu le bi nan yin bi kpiɛtiib ban nan be kuŋaluŋ kumiɛn nin yaan ke bin dan nan ter bi. Le bi nan dan ki nan gbeen bi ŋalin tilee nmɔn biɛn le ti nan piin ki miig.
8Simɔnn Piita kaah nan kan man nan, le u gbaan Yisa a taatum, ki bei u ke, “Fɔɔr n ban ki li chaau, Uyudaan, n ye tibirdaan le!” 9Nan bu-n ni nan gar u ma nin u tabin le, baah nan choo ijan ni man nin, 10ni nan ye man le ki sei Jemisi nin Jɔnn, Simɔnn a kpiɛtiib ban nan ye Zebedi a naachimin.
Le Yisa bei Simɔnn ke, “Laa san bijawaami. Naah nyan dinan ki jɔɔ chaa, ni yin mɔɔn bininfob le ki tenn Uwonbɔr.” 11Le bi nan tir bi ŋalin nmɔn don nkpengbaan, ki jiɛn bi wan yɔɔr biɛn nin yaan le ki nɔɔ Yisa.
Yisa kaah nan teb uja wan ye kikɔŋ man
(Matiu 8:1-4; Mag 1:40-45)
12Yisa nan be kitiŋ kiba ni-n, le uja uba dan u ban ki ye kikɔŋ. N-yonn man wee u kan Yisa, le u lu ki ta u num chigin tum ki balin u ke, “Uyudaan, ni ye a ban ke, a li fir che n pɔɔg.”
13Le Yisa tann u nɔɔ ki maa u, ki ke “N ban man. A wiɛm diɛu!” Libol nmɔn yaan, le u kan kutebug. 14Le Yisa bei u, “Laa bei uba, amaa li chaa Uwonbɔr a minmanu ban ki tan ta a ba ki wɔɔn u, ki mann kumanug ki sei Uwonbɔr ke Moziz a kaal kaah wɔɔn man nin. Ni ma ye siɛra ki sei bi.”
15Amaa Yisa a yinl nan mann mɔɔn le nin yaan biɛn. Le bininfobin biɛn nan lagin u ban ke bin gbir u bɔr, ki ban ke un che bibaarib ban be bi ban nin pɔɔg. 16Amaa le Yisa yaan ti nyan ki jon u binba a bol ki tan miɛ Uwonbɔr.
Yisa kaah nan che tigbanann kpiindaan kan kutebug man
(Matiu 9:1-8; Mag 2:1-12)
17Weemba daal Yisa kaah nan be ki wɔɔn le Farasii yaab nin ban wɔɔnn Uwonbɔr a siim ban nan nyan Galilii a timin nin Judiya a timin nin Jerusalam a timin nan ka u ban. Le Uwonbɔr a pɔɔm nan be u ban le u che bibaarib kan kutebug. 18Le bijab biba mu nan dan ki tu ubaar wan a gbanann nan kpo, likinkenlin, ki ban bin ta u ki kɔɔn kudiig kan yaan wee Yisa nan be-n, ki tan ta u ki bil Yisa a nintogil. 19Amaa baa nan kan npaan ki li kɔɔ, bininfobin kaah nan yaabin bu, le bi nan ta u ki don kudiig a paab, ki feer limɔɔpinl le ki ta u nin u wan dɔɔnwaŋ jiir bininfobin a sisiigin ki tan bil Yisa a nintogil.
20N-yonn man wee Yisa kan bi yada-n, le U bei uja wan a gbanann kpe-n ke, “N jɔ, n jiɛn a bir periŋa.”
21Le Farasiim nin ban wɔɔnn Uwonbɔr a samin tiɛr bi sufu ni ke, “Ninfo boliba ye u ki sugir Uwonbɔr aa? Uba li fir jiɛn tibir per u kpiɛg kaa ye Uwonbɔr a binba?”
22Yisa nan biɛ baah tiɛr man na, le ki baan bi, “Ba ŋaa wee ni tiɛr man ni sufu ni naa? 23Maah bei ubaarin ke, ‘N jiɛn u bir ki per waah’ nin maah li bei ke ‘Fii ki li chaau’. Ni la ba pɔɔ? 24Amaa wee n che ni biɛ ke Uninfosaal a Big jɔɔ tininkper a pɔɔm dulinya nan yaan ki li jiɛn tibir per…” Le u bei uja wan a gbanann kpe-n ke, “N beiŋ le, Fiim, ki yuur a wan dɔɔn waŋ ki li chaa kun na.”
25Libol nmɔn le u fii bi numin, ki yuur u wan dɔɔn waŋ, ki chaa kun, le ki choon ki pagir Uwonbɔr. 26Le ni gar bininfobin biɛn. Le bi pag Uwonbɔr, ki san u bijawaam, ki bei ke, “Dinan ti kan ligaril a toonla.”
Yisa kaah yin Liifai man
(Matiu 9:9-13; Mag 2:13-17)
27Ni bɔɔn bu le Yisa nyan iniin nmɔn yaan ki chaa, le ki tan kan ulanpo gaar ka bilanpogaab a nanbonn, bi nan yi u ke Liifai. Le Yisa bei u ke, “Li nɔɔm ni.” 28Le Liifai fii ki jiɛn u wan yɔɔr biɛn le ki nɔɔ u.
29Le Liifai ŋa tijiir takpem u niin ki sei Yisa; le bilampo gaab nin bininfob takpem nan dan ki nan lagin jin nin bi. 30Amaa le Farasii yaab nin ban wɔɔnn Uwonbɔr a siimin nan fu Yisa a bɔɔnɔɔb ban ki ke, “Ba ŋa wee ni lagin ki ji ki nyu nin bilampo gaab nin tibirdamaa?”
31Le Yisa jiin bi ke, “Ban pɔɔ kaa ban utebiri, see ban bu-n. 32Maa dan ke n nan yin bibuchim le, amaa tibirdam wee bin kpenn bi binbem.”
Limɔlol a bɔr
(Matiu 9:14-17; Mag 2:18-22)
33Le bi nan bei Yisa ke, “Jɔnn a bɔɔnɔɔb lolig imɔɔŋ le ki miɛ Uwonbɔr iyoo biɛn man le Farasii yaab a bɔɔnɔɔb tɔɔl ŋaan, ke ba ŋaa wee iyoo biɛn a yaa bɔɔnɔɔbin ma ji ki nyuu?”
34Le Yisa jiin bi ke, “Ni li fir che bicham ban dan bin nan ji Lipiichanil a jiir nan n lol bimɔb n-yonn man wee lipiichanil daan la be bi ban nan naa? 35N-yonn chaan, le bi na li nyan lipiichanil daan nin bi ban; iyaayoo le bi li lol bimɔb.”
36Le Yisa gaa bi libɔŋal ke, “Uba kaa li chee ki jii litanl daala pɔŋin ki tan ta legin daala kpegi. Ni ye u ŋa man ke u chiɛ daala pɔŋin na, litanl pɔnl nin litanl kpegil kaa piɛ. 37Uba mu kaa li ta ndapɔm ki ŋuun libokpegilin ni. Ni ye u ŋa man wee ndapɔmin nan mɔɔ ke, mi li pɔɔ liboolin, le ndaamin wur yɔli, le libool n mu bii. 38Aai see u ta ndapɔmin ki ŋuun liboopɔnlin. 39Wan mu nyun ndakpegim ke, waa ji ban ndapɔmi, u li ke, ‘Ndakpegim mɔ ki jon ndapɔma.’ ”
Currently Selected:
Lug 5: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
