Lug 4

Sintani kaah nan bigin Yisa man

(Matiu 4:1-11; Mag 1:12-13)

1Le Yisa nan nyan Jɔdann a mɔgil paam, ki gbee nin Kasi a Naaŋ le Kinaaŋ nmɔn nan ta u don kukunkɔɔg bu 2ki be niin iweehn pina, le ulinlaril nan bigin u. Waa nan jin niba iweehn nmɔn biɛn ni; le nkom nan nan choo u,

3Le ulinlaril nmɔn bei u ke, “Ni ye ke a sin ye Uwonbɔr a Bija ke, a bei litangbagil nan wee lin kpann tijiir.”

4Le Yisa bei u ke, “Ni sɔb Uwonbɔr a gbɔŋin ke: ‘Uninfosaal kaa be tijiir a binba bu le.’#Ikaal 8:3”

5Ni bɔɔn bu le ulinlarilin ji yuur u ki ta u don lijɔɔl lan kper a paab, ki tan wɔɔn u kutingbɔŋ nan a wan yɔɔr biɛn, 6ki bei u ke, “N li seiŋ tininkper a pɔɔm nin njɔɔm biɛn. Bi nan ta ni biɛn seima le n mu li fir ta sei wan wee n ban. 7Mambu a bi jiɛnim ke, ni biɛn nan bi yin ye a yaan le.”

8Le Yisa jiin ke, “Ni sɔb Uwonbɔr a gbɔŋin ke, ‘Li jiɛn Uyudaan Uwonbɔr a binba, ki sin tun tenn u a binba.’#Ikaal 6:13”

9Le ulinlaril ji nan yuur u ki jon Jerusalam, ki tan don iwonjiɛn niin a paab#4:9 Iwonjiɛn niin a paab nan, nan jɔɔ nan yaan wee kumanug a yudaau nan ti tɔɔg ki pee u naatuŋ ki mɔɔn likpakɔɔl daal a piinim nin li diɛm., le ki bei u ke, “Ni ye a sin ye Uwonbɔr a Bija ke a yug do ki lu tuma. 10Nan bu-n ni sɔb Uwonbɔr a gbɔŋin ke:

‘U li pag sei u malakam a bu

wee bin guuriŋ nbamɔm.

11Le bi li yuuriŋ bi nɔɔn, wee a taal laa gbiɛr litangbagili.’#Ilan 91:1,12”

12Le Yisa jiin ke, “Ni len ke: ‘Uba laa bigin u Wonbɔru wi.’#Ikaal 6:16”

13Ulinlarilin kaah nan bigin Yisa diɛ n-yonn man nin, le u la fɔɔr ki sin jiɛn u ki guu iyoo yan kpaan.

Yisa kaah nan piin u toon Galilii man

(Matiu 4:12-17; Mag 1:14-15)

14Yisa nan jir Galilii le Kinaaŋ pɔɔmin. Le u bɔr nan mɔɔn itingbaa biɛn. 15U nan mɔɔn Uwonbɔr a bɔr le bi wonjiɛndirin, le bininfob biɛn pag u.

Baah yii Yisa Nazarif man

(Matiu 13:53-58; Mag 6:1-6)

16Le Yisa nan jon Nazarif, nan yaan wee bi nan wubiri u, u buwaan nin nan. Le likpakɔɔl daal nan foo, le u kɔɔ kuwonjiɛndiigin, ke waah pii ti kɔɔ man nin, ki nan fii ke un karin Uwonbɔr a gbɔŋ. 17Le bi ta ulinlenn Azaya a gbɔŋ kpabkaag ki sei u. Waah kpar ki-n, le u kan nan yaan wee ni sɔb ke:

18“Uyudaan a Naaŋ be nim,

nan bu-n U ma kpaar nkpam jaa n bu,

ke n mɔɔn u bɔr ŋan nmɔn ki sei bilanjiim.

U tunim ke n pag feeja a bɔr ki sei biloondiikɔɔb,

wee ki ligir bijɔɔm a num,

ki nyan limugildam bi mugilin,

19ki sin mɔɔn libinl lan wee Uyudaan jiɛn.”#Azaya 61:1-2

20Le u kpab kugbɔŋin ki jiin sei kuwonjiɛndiig n-yaa toontunn uba, le ki sin kal. Le bininfob ban biɛn be kudiig nmɔn yaan nin lig u. 21Le u piin ki pag tenn bi ke, “Tibɔr tan wee n karin Uwonbɔr a gbɔŋin nan, dinan Uwonbɔr a mɔleen gbeen nin naah gbir yin na.” 22Le bi biɛn pag u nin ligaril u nyunyunbasanl lan nyan u mɔnn ni. Le bi baan tab, “Waa ye Josef a bija nnaa?”

23Le Yisa bei bi ke, “N pii nyi ke ni li gaam libɔŋal ke, ‘Utebir, tebim a ba! Ŋa a tiŋ nan yaan ke taah gbir ke a ŋa Kapeniɛm man nin.’ ”

24Le u ji ke, “N bei ni ibamɔn le, baa cheel ulinlenn a mɔb u tɔɔl a tiŋin ni. 25Ibamɔn le n wɔɔn ni, ipukɔɔ takpem le nan be Iziral n-yonn man wee Elaja la nan be-n. N-yonn nmɔn wee utaal kaa nan nun ibin itaa nin iŋmal iloob, le nkom nan lu kitiŋ nmɔn yaab biɛn bu, 26Amaa Uwonbɔr kaa nan tun Elaja bi ni uba ban ni see lipukɔɔl lan nan be Zarifa n-yaa binba ban. Zarifa be Sidonn a tiŋin le. 27Nkɔm takpem nan be Iziral a tiŋin ulinlenn Elasiya a yonn, amaa bi ni uba kaa nan kan kutebugi see Nemann a binba wan nan ye Siriya a ninfou nan.”

28Le bininfob ban nan be kuwonjiɛndiigin a poolin kaah nan gbir Yisa a bɔr nmɔn nin, bi nan fiin bi ŋuui le u bu, 29le bi fii ki ŋɔɔr u nyan kitiŋ nmɔn yaan, ki ta u jon ligungonl lan bu wee bi nan maa bi tiŋ nmɔn a gbaam, ke bin ta u ki jaa ligungonl nmɔn a tum. 30Amaa le u bɔgir bi siigin ki choon jon.

Yisa kaah ŋɔɔr kinaanbiig nyan man

(Mag 1:21-28)

31Le Yisa nan jir Kapeniɛm kan be Galilii a tiŋin nan. Le likpakɔɔl daal ke u wɔɔn bininfob Uwonbɔr a mɔleen; 32le u wɔɔnim nmɔn nan gar bi, nan bu-n u wɔɔnim nmɔn kaah nan jɔɔ tininkper a pɔɔmin bu.

33Le uja wan wee kinaanbiig nan be u ban nan, nan be kuwonjiɛndiigin yaan ki tann nmɔpɔɔn ke, 34“Fin Yisa wan ye Nazarif a ninfo nan, a ban baa ti ban naa? Aah! A dan ke a nan bii tim lee? N nyi ŋa ye wan, a ye Uwonbɔr a kasi a toom le.

35Le Yisa tiɛn kinaanbiig n bu ke, “Ŋmim tifur, ki sin nya uja nmɔn yaan na.” Le kinaanbiigin nyiɛ uja-n tum, bi sisiigin, le ki sin nyan u ni; waah nan nyiɛ u tumin, waa nan sei u kidaŋi.

36Le ni nan ŋa bi biɛn ligaril, le bi baan tab ke, “Ba a wɔɔm ye naa? U jɔɔ tininkper a pɔɔn le nin npɔɔn ki bei nnaanbiim bimɔb le bi nyan bininfobin.” 37Le bi nan mɔɔn Yisa a yinl kitiŋ nmɔn nin itingbaa biɛn.

Yisa kaah nan teb kuninfobabug man

(Matiu 8:14-17; Mag 1:29-34)

38Le Yisa nan nyan kuwonjiɛndiig nmɔn yaan ki jon Simɔnn a niin, ki miin kugbanantoŋ le jɔɔ Simɔnn a chɔɔpii, le bi nan bei Yisa upii nmɔn a wiɛn bu. 39Le Yisa nan bɔɔn upii-n bu ki fuun kugbanantoŋin bu, le ku jaau; le upii-n paa nan fii ki ŋa bi kuchɔŋ. 40Nween kaah nan nan yin lu n-yonn man ni, le ban biɛn nan jɔɔ bibaarib bi niin yin ni nan ta bi ki dan Yisa ban; bi nan bu iwiɛn a booli a booli le u ta u nɔɔ ki ma ma bi, le bi kan kutebug. 41U ji nan che nnaanbiim nyan bininfobin takpem. Baah nan nyan diɛ nan le bi tiɛn nmɔpɔɔn ke, “A ye Uwonbɔr a Bija le.” Amaa le u nan fuun bi bu kaa ji nan che bi pag jigin ni, nan bu-n bi nan nyi waah ye Masiya.

Yisa kaah nan mɔɔn tibɔŋann kuwonjiɛndiigin man

(Mag 1:35-39)

42Naah nan won kutaagin le Yisa nan nyan kitiŋ nmɔn yaan ki kɔɔ kulɔŋin; le bininfobin nan choon ki ban ki tan kan u. Baah nan kan u nan, le bi nan gɔɔ u ki ke un laa yaar ki sin jiɛn bi. 43Amaa le u ke, “See ke n jon ntim man gurin yaan ki tan mɔɔn tibɔŋann ki jiin Uwonbɔr a naam paam nan, ni ma bu le Uwonbɔr tunim.” 44Ni ma bu le u nan jin Judiya a timin ki kɔɔ tiwonjiɛndirin ki wɔɔn bininfob tibɔr nmɔn.

Currently Selected:

Lug 4: KUGL

Highlight

Copy