Lug 3
3
Jɔnn Wan nan Fu Bininfob Uwonbɔr a Nyunful nan kaah mɔɔn man
(Matiu 3:1-12; Mag 1:1-8; Jɔnn 1:19-28)
1Ubɔr yudaan Tiberiya Siiza kaah nan jin u naam ibin piig nin iŋmu-n wee Pontiɛ Palati mu ye Judiya a bɔru win, le Herɔd mu ye Galilii a bɔru, le u naal Filib mu ye Ituriya nin Tirakoniti a bɔru, Lisaniɛ mu ye Abilene a bɔru, 2n-yonn man wee Anasi nin Kayafasi nan ye Uwonbɔr a minmanib a ninkpeebin, le Uwonbɔr a mɔleen foo Jɔnn wan ye Zakariya a bija-n kukunkɔɔg bu. 3Le u nan jin ntim man nan be Jɔdann ni biɛn ki mɔɔn ke bin jiɛn bi toonbira wee un fu bi Uwonbɔr a nyunful, wee bin kan tibir a jiɛn per. 4A li ke naah sɔb ulinlenn Azaya a gbɔŋin ke:#Azaya 40:3-5
“Uba a kukɔl le be kukunkɔɔg bu ki yi,
‘Mann Uyudaan a sama,
mann u sam wee mi li tel ki sei u.
5Nfatam biɛn na li gbeen,
ijɔɔ nin igungon biɛn na li ber ki naa tum,
tisangɔnn biɛn na li naar,
tisanbogir biɛn piin.
6Uninfosaal biɛn na li kan Uwonbɔr a feeja.’ ”
7Le Jɔnn bei kuninfogbaluŋ ban nan dan u ban ke un fu bi Uwonbɔr a nyunfulin ke, “Nim iwaalab a bum, ŋma kpaan ni ke ni nya kiŋuufiiŋ kan chaan nan naa? 8Ni li lo iloon yan wɔɔn ke ni sin kpenn ni binbema. Wee ki laa piin ki bei ni ba ke, ‘Ti jɔɔ Abiraham wan ye ti yaaja.’ N bei ni le, Uwonbɔr li fir che itangbag yan be nan n kpann Abiraham a yaabili. 9Lilajal pii be isiig a nyagin, ki li gaa busub ban biɛn kaa lo iloon ŋan ki jaa tum ki ta bi gab nŋmi ni.”
10Le kuninfogbaluŋ nmɔn nan baan, “Ke ti ni li ŋa nii?”
11Le u bei bi ke, “Uninfo wan jɔɔ daala bilee ke, un nyan kiba ki sei wan kaa jɔɔu, le wan mu jɔɔ tijiir ke, un ŋa sei wan kaa jɔɔu.”
12Bilanpogaab#3:12 Iyaayoo nmɔn bilanpogaab nan ye ban ji bininfob dulim le. mu nan dan bi nan gaa Uwonbɔr nyunful u ban. Le ki baan ke, “Wan wɔɔn, ti mu yin ŋa nii?” 13Le u bei bi ke, “Ni laa gaan ki lagir naah ye ni gaa man ni.” 14Le bitɔtob mu baan u, “Ti mu yin ŋa nii?”
Le u jiin ke, “Ni laa feen iligi, ki laa por tibɔkar ki paag bininfob bu; che ni num n gbee ni yɔr tan wee ni gaan nin.”
15Bininfobin kaah pii nan guu nin tama-n le bi tiɛr bi sufu ni ke Jɔnn le par ye Masiya nna. 16Le Jɔnn jiin bei bi biɛn ke, “Min fun ni nnyum le, amaa wan jom chaan, wan a naatagil ŋmim wee maa kpaan n gbinn ni. U na li fu ni Kasi a naaŋ nin nŋmi ki ŋunn ni jaginn. 17U ŋmag u dilenn yikpeŋin le u nɔɔn ke un lenn nbamɔm, ki nyan ndibimin ki ŋuun u binbolin, amaa le ki sin ta kufoŋin ki jaa nŋmi man gaan kaa jɔɔ njunimin yaan.” 18Jɔnn nan ta imɔbon le takpem ki mɔɔn tibɔŋann nin ki kpaan bininfob.
19Amaa jɔnn kaah nan fuun ubɔr Herɔd, u waal a poo Herɔdiya bu-n, nin titoonbir tan wee u nan tun nin, 20Herɔd nan ta ni niɛ nan biɛn le ki kpiɛ: U nan loon Jɔnn le kuloondiigin.
Yisa kaah nan gaa Uwonbɔr a nyunful man
(Matiu 3:13-17; Mag 1:9-11)
21N-yonn man wee bininfob biɛn nan gaa Uwonbɔr a nyunfulin, le Yisa mu nan gaa Uwonbɔr a nyunful. Le waah nan be miɛ Uwonbɔrin le paab loor, 22le Kasi a Naaŋ jiirin u bu nin tigbanann ki nann ulanjel. Le likukɔl nyan paab ki len ke, “Fin le ye n bija, wan wee n jiɛ; fin le n num gbee.”#Npiinim 22:2; Azaya 42:1; Ilan 2:7
Yisa a yaajam
23N-yonn man wee Yisa nan piin Uwonbɔr a toon yin, u nan jɔɔ ibin pita le. U baa nan ye, ke baah nan tiɛr man nin, Josef le, le
Josef mu nan ye Heli a big,
24le Heli mu ye Matat a big,
le Matat mu ye Liifai a big,
le Liifai mu ye Meliki a big,
le Meliki mu ye Janai a big,
le Janai mu ye Josef a big,
25le Josef mu ye Matatiya a big,
le Matatiya mu ye Emosi a big,
le Emosi mu ye Nahum a big,
le Nahum mu ye Esili a big,
Le Esili mu ye Nagai a big,
26le Nagai mu ye Maaf a big,
le Maaf mu ye Matatiya a big,
le Matatiya mu ye Semiɛn a big,
le Semiɛn mu ye Joseg a big,
le Joseg mu ye Joda a big,
27le Joda mu ye Joanann a big,
le Joanann mu ye Resa a big,
le Resa mu ye Zerubabel a big,
le Zerubabel mu ye Sealitel a big,
le Sealitel mu ye Neri a big,
28le Neri mu ye Meliki a big,
le Meliki mu ye Adi a big,
le Adi mu ye Kosam a big,
le Kosam mu ye Elimadam a big,
le Elimadam mu ye Er a big,
29le Er mu ye Josuwa a big,
le Josuwa mu ye Eliɛzer a big,
le Eliɛzer mu ye Jorim a big,
le Jorim mu ye Matat a big,
30le Matat mu ye Liifai a big,
le Liifai mu ye Simiɛn a big,
le Simiɛn mu ye Juda a big,
le Juda mu ye Josef a big,
le Josef mu ye Jonam a big,
le Jonam mu ye Elayakim a big,
31le Elayakim mu ye Meliya a big,
le Meliya mu ye Mena a big,
le Mena mu ye Matata a big,
le Matata mu ye Netann a big,
le Netann mu ye Defid a big,
32le Defid mu ye Jesi a big,
le Jesi mu ye Obed a big,
le Obed mu ye Bɔɔzi a big,
le Bɔɔzi mu ye Salimonn a big,
le Salimonn mu ye Nasonn a big,
33le Nasonn mu ye Aminadab a big,
le Aminadab mu ye Ram a big#3:33 Tigbann tiba sɔb ke Amindadab mu ye Adimin a big, Adimin mu ye Ani a big,
le Ram mu ye Hezironn a big,
le Hezironn mu ye Perisi a big,
le Perisi mu ye Juda a big,
34le Juda mu ye Jekɔb a big,
le Jekɔb mu ye Azig a big,
le Azig mu ye Abiraham a big,
le Abiraham mu ye Tera a big,
le Tera mu ye Naho a big,
35le Naho mu ye Serug a big,
le Serug mu ye Reu a big,
le Reu mu ye Peleg a big,
le Peleg mu ye Iber a big,
le Iber mu ye Sela a big,
36le Sela mu ye Kanann a big,
le Kanann mu ye Afagzad a big,
le Afagzad mu ye Sem a big,
le Sem mu ye Nowa a big,
le Nowa mu ye Lameg a big,
37le Lameg mu ye Metusela a big,
le Metusela mu ye Enog a big,
le Enog mu ye Jarid a big,
le Jarid mu ye Mahalalel a big,
le Mahalalel mu ye Kanann a big,
38le Kanann mu ye Adam a big,
le Adam mu ye Uwonbɔr a big.
Currently Selected:
Lug 3: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
