Lug 2

Baah ma Yisa man

(Matiu 1:18-25)

1Iyaayoo nmɔn le ubɔr yudaan Siiza Agusitu nan siin nsiim u tingbɔŋin ke bininfob biɛn n kun ki tan sɔb bi yin wee un lig bi kanl kaah kpaa man. 2(Ni ma nan ye chinchinn a ninfokanl, n-yonn man wee Kiriniu nan ŋmag Siriya a tiŋ a ninkpelu win.) 3Le bininfobin biɛn nan kun bi tim, bin tan sɔb bi yin.

4Josef mu nan ye ubɔr Defid a maalim ni uba le. Ni ma bu, u nan nyan Nazarif, kitiŋ kan be Galilii a tingbɔŋin nan, le ki jon ubɔr Defid a tiŋ, kan wee bi yi ki ke Betiliham, kan be Judiya a tingbɔŋin nin. 5Le u kun ke un tan sɔb u ma nin u jakpeŋ Meri a yin; iyaayoo nmɔn ki miin Meri jɔɔ lipool le.

6Baah la nan be Betiliham nan, le nmarwiɛn choo Meri, 7le u ma usapɔnmal kibijag, le ki ta u pɔbin likinkenlin, ki ta u ŋa kubulunkpoŋ a poolin; npaan kaa ji nan be bicham a diig n-yaan bin kɔɔ.

Bipeekpaab nin malakam

8Bipeekpaab biba nan be kitiŋ nmɔn yaan ki kpaa ipee kunyiɛg kulɔŋ. 9Le Uyudaan a malaka nan degir bi bu. Le Uyudaan nmɔn a pag a weem wonn bi bu. Le bijawaam nan choo bi takpem. 10Le malaka nmɔn bei bi ke, “Ni laa san bijawaami. N dan n nan bei ni tibɔr ŋan le, tan li sei bininfob biɛn nmɔn. 11Dinan nan Defid a tiŋin bi ma ufeerin na, U ma ye Uyudaan Masiya. 12Ni li kan kibig nmɔn kaah pɔb likinkenlin, ki dɔ tiwankor kaah ji kubulunkpoŋ kan yaan ni. Ni ma li ye limagil ki sei ni.”

13Iyaayoo nmɔn le malakam takpem nan nyan paab ki jiirin ki nan kpiɛ malaka n bu ki pagir Uwonbɔr ke,

14“Kupag ye Uwonbɔr wan be paab nan a yaan le.

Nposɔɔn li be dulinya nan a ninfob ban bu wee U nyɔɔr be-n.”

15Le malakam nin nan fɔɔr bipeekpaab nan ban, ki jir don papaab. Le bipeekpaab nan bei tab ke, “Ni che ti jo Betiliham ki tan lig niwann nan tun, wee ti Yudaau Uwonbɔr bei ti nan.”

16Ni ma bu le bi nan fii weem weem ki jon tan foo ki kan Meri nin Josef; le kibiliɛg n mu dɔ kubulunkpoŋ n-yaan poolin. 17Baah nan tan foo ki kan u nan, le bi bei bininfob Uwonbɔr a malakam kaah bei bi man, ki jiin kibig nmɔn paam, 18le baah nan gbir bipeekpaab nan kaah len man nin, le ni gar bi biɛn. 19Amaa Meri ma nan tiɛr nan nan tun nmɔn biɛn, ki ŋmag ni u sufu ni. 20Ni bɔɔn bu le bipeekpaab nan nan jir bi pee ban kulɔŋin. Baah nan chaa jir nmɔn le bi nan pagir ki donn Uwonbɔr a yinl, nin baah kan ki gbir nan biɛn nin bu; le ni sin ye le ke malaka kaah bei bi man nin.

Baah nan yin Yisa a yinl man

21Baah nan ma u a bɔɔn a ween iniin daal le bi nan jii u punl le ki yin u yinl ke Yisa, liyinl lan wee malaka nan pur ke baa la choo u poolin.

Baah nan ta Yisa ki sei Uwonbɔr iwonjiɛn niin man

22Ni nan nan foo nin Josef nin Meri n tun ke Moziz a siim kaah nan wɔɔn man nin, bin mann kumanug ki ŋa biba kasi Uwonbɔr ban. Ni ma bu le bi ni nan ta kibigin ki jon Jerusalam, ke bin tan taa u ki sei Uwonbɔr, 23(ke naah sɔb Uwonbɔr a siimin man nin, ke Kibininkpeeg kan ye kibijag biɛn ye Uyudaan yaau le.)#Nnyam 13:2 24Le bi ji nan mann kumanug ke Uyudaan kaah siin man nin, ke Bin ban kulɔŋ a lanjel ilee bee iniin a lanjebum milee ki mann kumanug nmɔn.#Biminmanib 12:8

25Uja uba le nan be Jerusalam, bi nan yi u ke Simiɛn. U nan ye uninfo buchinn le ki sin ŋmag Uwonbɔr a siimin nbamɔm, le Kasi a Naaŋ nan be u bu, ki lig lidaal man wee Uwonbɔr na li fee Iziral yaab ki jaa. 26Kasi a Naaŋ pii nan chinn ki kar wɔɔn u ke waa li kpo see ke u kan Uyudaan a Masiya. 27Iyaayoo nmɔn le Kinaaŋin nan che Simiɛn kɔɔ iwonjiɛn niin n-yaan, ki kan Yisa a baa nin u na kaah ta u dan ke bin nan ŋa u nsiim kaah wɔɔn man nin, 28le Simiɛn nan gaa kibigin u nɔɔ ki don Uwonbɔr ke,

29“N yudaau, min wan ye a yomu nan,

jaam nin nposɔɔn,

Ke ŋaah pii nan siin limɔsiinl man nin.

30Min tɔɔl a numbil kan a feegabin na#Azaya 40:5

31Wan wee a ŋaau sili ki siin ki sei bininfob biɛn nin.

32U li ye nwonween ki kpiir a samin ki wɔɔn ban kaa ye Iziral yaab nan#Azaya 49:6,

Ki ji ta kupag ki sei a tɔɔl a ninfob Iziral yaab.”

33Simiɛn kaah pag bi ki jiin kibig nmɔn paamin, le ni gar kibig nmɔn a ba nin ki na takpem. 34Le Simiɛn nan kaab jaa bi bu, le ki sin bei kibigin a na Meri ke, “Uwonbɔr gann kibig nmɔn ke u li che Iziral yaab takpem n lu yɔli u bu; le bininfob takpem mu li kan nŋmarim u bu. Uma nan yin ye limagil lan wee bininfob takpem li pag ki bii u nan; 35ni ma le li kpiir naah tiɛr man ni sufu ni nan n nya npaan ni. (Amaa a sufu li bii ke takoobi kaaŋ kaah li jiiŋ man ni.)

36Le upiininkpel uba nan be niin ki ye Uwonbɔr a linlenu, le bi yi u ke Ana, u nan ye Faniɛl a bisa le, ki ye Aser a bol a ninfou, u nan por takpema, ki be u chal ban ibin ilile a bɔɔn, 37le u chal kpo ki jiɛn u lipukɔɔl le ki nan ye ibin piniin nin ina; amaa waa nan per iwonjiɛn niin n-yaa kɔɔm nween nin kunyiɛgi, ki jiɛn nween ki lolig bimɔb ki miɛ u. 38Waah nan foon n-yonn man nni, le u sei Uwonbɔr kunɔɔpoog, ki nan pag kibigin a bɔr ki tenn bininfob ban biɛn nan guu n-yonn man wee Jerusalam yaab li kan nkpenim a manugin.

39Josef nin Meri kaah nan tun Uwonbɔr a kaal kaah wɔɔn bi man ki diɛ nan, le bi nan jir kun bitɔɔl a tiŋ Nazarif kitiŋ kan be Galilii a tingbɔŋin nin. 40Le kibigin nan yabig nin npɔɔn nin nbiɛm takpem, le Uwonbɔr a nyunyunbasanl li be u bu.

Kibijabig Yisa kaah be iwonjiɛn man

41Tɔ, ibin biɛn Yisa a baa nin u na ti chaa Jerusalam le ki tan jin yuglagir a chiig. 42N-yonn man wee Yisa nan nan foo ibin piig nin ilee-n, le bi nan jon ke bin tan ji kuchiig ke bi kaal kaah wɔɔn man nin. 43Kuchiig nmɔn a daai kaah nan nan diɛ n-yonn man ni, le bi nan piin n kum, le Yisa paar be Jerusalam, amaa u yaab kaa nan nyi ke u paari. 44Bi nan tiɛr ke u be kuninfobabug n-yaan le, ki nan choon lidamunl nmɔn biɛn. Ni bɔɔn bu le bi nan ban u bi niin yaab ban nin bijɔtiib ban, 45amaa le kaa kan wi. Le bi nan jir Jerusalam ki tan ban niin. 46Ni ween itaa daal le bi tan kan u iwonjiɛn niin a poolin, ki miin u lagin ki ka nin ban wɔɔnn a ninkpeeb ki pelig bi bɔr le ki sin baan bi ibinbaan. 47Le ni nan gar ban biɛn nan pelig u binbaan yin, nin waah ŋa man ki jɔɔ nbiɛm ki pag jiin bi. 48U baa nin u na kaah nan kan u niin nin, ni nan gar bi pam, le u na baan u ke, “N big, ba ŋa a ŋa man naa? Ŋaa nyi ke min nin a baa kan npoobiin hali ki choon baŋ ŋaa?”

49Le u jiin ki baan bi ke, “Ba ŋa wee ni bam maa? Naa nyi ke ni ye n li be n Baa a niin lee?” 50Amaa baa nan biɛ u bɔr nmɔn a taai.

51Le u nan nɔɔ bi ki jir Nazarif a tiŋin, ki chee bimɔb. Le u na ta nan biɛn ŋa nmɔn ki ŋa u sufu ni. 52Le Yisa nan yabirig ki kpiɛg nin nlam, le Uwonbɔr nin bininfob a pool nan sɔɔn u bu.

Currently Selected:

Lug 2: KUGL

Highlight

Copy