Galantiya 2
2
Pɔɔl nin u toon kpiɛtiib a bɔr
1Ibin piig nin ina a bɔɔn le n ji nan jon Jerusalam, min nin Banabasi. N nan ta Tatusi tɔɔl jon na. 2Uwonbɔr le nan kpiir wɔɔnim ke n jo, ki tan bei bi tibɔŋann tan wee n ti mɔɔn ban kaa ye Juu yaab ban nin. Amaa n nan yin biwonjiɛn sanliibin a binba le ki wɔɔn bi, nan bu-n, n nan san le kaa ban maah tun nan nin bee nan wee n la yin tun nin n gab yɔli. 3Hali Tatusi, wan nan be n ban nin, nin waah le nan ye Girig a ninfou nmɔn biɛn ni, baa nan mugir u ke un jii u punli. 4Tibɔr nmɔn nan nyan nnabum man por tibɔkar tenn bi ba ke bi mu ye Yisa a bɔɔnɔɔbin le, bi nan be ti sisiigin le ki pigir ti ki ban bin biɛ taah gaa ti ba Masiya#2:4 Ni ye Pɔɔl sɔb ke Yisa Masiya ke, ni wɔɔn waah nan be nin tigbanann le, amaa ni ye u sɔb ke Masiya bee Masiya Yisa ke, ni wɔɔn u kum a bɔɔn waah ye kinaaŋ le. bu man wee ki ŋa ti nsiim a yomi. 5Taa nan chee sei bi hali wama, naah li ŋa man wee tibɔŋannin a bamɔn li be nin ni.
6Ban wee bi lig bi ki miin bi ye ban kpaa talarin, baah nan ye bininfob ban nin kaa jɔɔ nbɔgirim min ban ni; Uwonbɔr kaa ji bininfob tibɔr baah nann man ni, bininfob nmɔn kaa kpiɛgim niba imɔleen n-yaan ni. 7Amaa, baah kan nan n ban ye Uwonbɔr kaah gannim ke n mɔɔn u bɔŋann nin ki sei ban kaa ye Juu yaab ke waah nan gann Piita ke un mɔɔn tibɔŋann nmɔn ki sei Juu yaab man nin. 8Uwonbɔr wan nan tun nin Piita wee u nan ye ntoon ki sei Juu yaabin, Uwonbɔr nmɔn le tun nin n mu le n ye ntoon ki sei ban kaa ye Juu yaabi. 9Jemisi nin Piita ki kpiɛ Jɔnn ban wee bi lig ki miin bi ye bininfojabin, bi tɔɔl nan biɛ ke Uwonbɔr le seim itoon gannkaa nmɔn; ni ma che bi nan sei min nin Banabasi inɔɔ. Ni ma nan ye chee sei tab a nɔɔseil. Tim nin bi ma nan chee sei tab ke min nin Banabasi li mɔɔn tibɔŋannin ki tenn ban kaa ye Juu yaaba, wee bi mu li mɔɔn ti ki tenn Juu yaab. 10Nan biɛn wee bi nan pag joor ye le ke ti li tiɛr bilanjiim bu, nan wee n jɔɔ linunmanl ki ban n tun.
Pɔɔl kaah fuun Piita bu Antiɛg man
11Piita kaah nan foon Antiɛg nan, n nan yii u bɔrin le u numin, nan bu-n u le sin nan jɔɔ igalin le. 12Bininfob ban nan nyan Jemisi ban ki dan nin kaah kaa la nan foon nin, u nan lagin ki ji tijiir nin ban kaa ye Juu yaabin le. Amaa bijab nmɔn kaah nan nan foon n-yonn man nin, le u jir bɔɔn ki yiɛr kaa ji lagin ji tijiir nin ban kaa ye Juu yaabin ban ni, nan bu-n u nan san bijab ban nan nyan bipunjiib a paabim ki dan nin le. 13Le Juu yaab ban nan be niin nmɔn mu kpiɛ Piita bu u larug nmɔn yaan, bi larug nmɔn nan boon Banabasi tɔɔla. 14Maah nan nan kan baah tun man nin kaa nɔɔ tibɔŋannin a bamɔn yin, le n bei Piita bininfobin biɛn a nintogil ke, “A ye Juu a ninfou le, amaa a be le ke ban kaa ye Juu yaabin, ŋaa nann Juu a ninfou wi. Ni ŋa nii wee a mugir ban kaa ye Juu yaab ki ban bin nɔɔ Juu yaab a kaalaa?
15“Tim ban wee bi ma ti wee ti ye Juu yaab, wee kaa ye ban kaa ye Juu yaab tibirdam nan, 16ti nyi ke naa ye uninfo wan ŋmag nsiim le bi ke u ye uninfo ŋan Uwonbɔr ban ni, amaa ban ŋa Yisa Masiya yada-n. Ti tɔɔl ŋa Masiya yada le ke nin che ti bɔr li ŋan Uwonbɔr ban, ti yada n bu, amaa naa ye taah ŋmag nsiim n bu, uba kaa li fir ŋa uninfo ŋan Uwonbɔr ban nsiimin bu. 17Ni ye ke, taah ban ti ŋa bininfoŋam Masiya nin, ni nan wɔɔn ke ti baantɔɔl ye tibirdam ke, ni ji wɔɔn ke Masiya si tibirdam a chaŋ lee? Naa ye man kolibi. 18Ni ye n bi jir maa nan wee n nan choo bii n le ke, ni ma bi wɔɔn ke n ye wan bii nsiim le. 19Uwonbɔr a siimin bu le n kpo sei nsiim nmɔn, ke n fir ki be Uwonbɔr kaah ban man. 20Bi nan kpaam lidapunpunl bu le nin Masiya le naa ji ye min le be, amaa Masiya nmɔn le be nim. Limiɛfol lan wee n jɔɔ be nin tigbanann nin, n be nin yada le Uwonbɔr a bija-n bu, wan jiɛm wee ki ta u ba seimin. 21Maa yii Uwonbɔr a nyunyunbasanlin ni, ni ye nbuchin binben bi nɔɔ nsiim bu le ke, Masiya bi kpo yɔli le!”
Currently Selected:
Galantiya 2: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
