Galantiya 3

Nsiim bee yada a bɔr

1Nim Galantiya yaab, tijɔri nan! Unyɔgdaan u la baa ŋmarin ni sufuu? Yisa Masiya a kum lidapunpunlin bu a bɔr nan kar ki wɔɔn ni npaan nin ni tɔɔl a numin. 2N ban n biɛ niwann niba le kpeŋileŋ ni ban: Naah ŋmag Uwonbɔr a siimin bu le che ni gaa Kinaaŋin bee naah gbir tibɔŋannin ki ŋa ti yada-n buu? 3Ni jɔrig lee? Nim ban nan piin nin Uwonbɔr a Kasi a Naaŋ a pɔɔm nan, ni nin gbaar ban ni ta uninfosaal a pɔɔm le ki jooraa? 4Naah jin fala wan takpem nan ye yɔli lee? Ke ni sin ye ke ni ye yɔli ke, 5Uwonbɔr nan ta U Kasi a Naaŋin ki sei ni nin ligaril a toon yan wee U nan tun ni sisiigin nin ke naah ŋmag nsiim nbu le, bee naah gbir tibɔŋannin ki ŋa ti yada n buu?

6Man le, ni sɔb Uwonbɔr a gbɔŋin ki len ke; “Abiraham nan ŋa Uwonbɔr le yada, le ni wɔɔn ke u ye ubuchin le.” 7Mambu, ni biɛm ke bininfob ban ŋa yada nan ye Abiraham a yaabili le. 8Ni ji sɔb dɔ Uwonbɔr a gbɔŋin ke, bininfob ban kaa ye Juu yaab nan a bɔr na li ŋaŋ bi yada bu. Baah kaa la nan gbir tibɔŋannin n-yonn man nin le U nan chinn mɔɔn ti sei Abiraham ke, “Fin bu, N li kaab tikaar jaa dulinya nan yaab biɛn bu.” 9Mambu ban ŋa u yada kan tikaar ke Abiraham, wan ye yada daan nin, kaah kan man nin.

10Bininfob ban biɛn nɔɔ nsiim ke bin kan nŋmarimin, limɔpool be bi bu, nan bu-n ni sɔb Uwonbɔr a gbɔŋin ke, “Wan biɛn kaa nɔɔ nsiim man biɛn sɔb dɔ nsiim a gbɔŋin ke, limɔpool be u bu.” 11Ibamɔn, nsiimin bu ke uba kaa be wee Uwonbɔr ke u bɔr ŋan ni, nan bu-n, “Ubuchin le be yada bu.” 12Amaa nsiim kaa nɔɔ nin yada; nan bu-n, “Uninfo wan tun nsiimin kaah wɔɔn man nin li be nsiim nmɔn bu.”

13Masiya nan ta u ba le ki mann nkpenim a manug ki fee ti nyan nsiim a mɔpool lan nan nɔɔ ti-n ki jaa, waah nan gaa ti a sisibol ki sir ki che limɔpool nmɔn jin u nbu, nan bu-n ni sɔb Uwonbɔr a gbɔŋin ke: “Limɔpool be wan biɛn bi jɔn u busub bu.” 14U nan sei ti nkpenim a manug le ke Masiya#3:14 Lig 2:4 man dɔ tum. bu le ban kaa ye Juu yaabin mu nkan tikaar tan wee Uwonbɔr nan ŋa Abiraham bu-n ni, ke ni ye ti ŋa yada ke, ti li kan Kinaaŋ kan wee U nan siin limɔsiinl ke U li sei ti-n.

Nsiim nin limɔsiinl a bɔr

15N nabum, n ban n ta idaa biɛn a binbem le ki mag wɔɔn ni tibɔr nan. Bininfob kaah lagin ki poo tipoor tan ke, uba kaa li fir bii ti bee ki ta niba kpiɛ ni bu man nin, man le ye ni niɛ mu. 16Limɔsiinl nmɔn nan siin ki sei Abiraham nin u yaabil le. Uwonbɔr a gbɔŋ kaa ke, “Nin a yaabili yi” wee ni wɔɔn ke kuninfogbaluŋi amaa u nan ke “Nin a yaabil”, le ni wɔɔn ke uninfo uba u ma ye Masiya. 17Maah wɔɔn nan nmɔn ye nan le: Uwonbɔr le nan poo tipoor, ibin kobina nin ibin pita kaah jon a bɔɔn le u ta nsiim mu ki sei bininfob, ni ma bu nsiim nmɔn kaa li fir bii Uwonbɔr a poor tan wee u nan poo siin nmɔn ni. 18Ni ye nsiim a ŋmagim bu le Uwonbɔr tenn bininfob U faal ke, mambu ke waa bi li sei uba lifaal U mɔsiinlin bu, amaa ni nan ye Uwonbɔr a nyunyunbasanl bu le U sei Abiraham U faal nmɔn limɔsiinlin bu.

19Ke babu wee Uwonbɔr nan siin nsiim nmɔn naa? Nsiim a biim bu le Uwonbɔr nan ta nsiim nan ki sei bininfob ki kpiɛ U mɔsiinl bu, ki ban nsiim nmɔn li ŋmag bi hali nin n-yonn man wee Abiraham a yaabil lan wee U ma Uwonbɔr nan siin limɔsiinl ki sei-n kaah na li foon. Le malakam ta nsiim nmɔn ŋubin usandanfaar a nɔɔn. 20Usandanfaar nan kaa si uninfo uba bu; amaa Uwonbɔr ye uba le.

Nsiim kaah be nan bu

21Mambu nsiim kɔn nin Uwonbɔr a mɔsiinlin lee? Naa ye man ni! Ni ye Uwonbɔr bi siin nsiim man li fir sei uninfo limiɛfol ke, U bi li ke bininfob ye bibuchim le U ban, nsiim nmɔn a ŋmagim bu. 22Amaa Uwonbɔr a gbɔŋin bei ke, uninfo biɛn be tibir a loondiigin le, naah li ŋa man wee Uwonbɔr kaah nan siin limɔsiinl ke U li sei ban ŋa Yisa Masiya yada lifaal lan nin, bi yada nmɔn bu le U yin sei bi.

23Yada nan kaah kaa la nan foon nin, nsiimin nan ŋa ti biloondiikɔɔb le, le ki loon ti ki nan kpaa n-yonn man wee Uwonbɔr nan kpiir yada a ŋaam a bɔr ki wɔɔn ti-n. 24Mambu, nsiim nmɔn nan ye uguguur le ki jɔɔ ti chaa Masiya ban, naah li ŋa man wee Uwonbɔr n len ke ti bɔr ŋan yada bu. 25Daandaan nan yada a ŋaam a sam kaah dan nan, nsiimin kaa ji ye ti guguuru wi.

26Ni biɛn nan ye Uwonbɔr a buwaab le naah ŋa Masiya yada-n bu. 27Nim ban wee bi fun ni Uwonbɔr a nyunful Masiya a yinlin nin, nim le ta Masiya ki yee ke kuwan yeewaŋin. 28Mambu, nbɔgirim kaa ji be ban ye Juu yaab nin ban kaa ye Juu yaab a sisiigin ni, kaa be biyom nin ban ye bi ba nan a sisiigin ni, kaa be bijab nin bipiib mu a sisiigin ni, ni ma bu ni biɛn ye nba le Masiya ni. 29Ni ye Masiya le ye ni ke, man ke ni ye Abiraham a yaabili#3:29 Lig Galantiya 3:16. Abiraham a yaabil wan ji Uwonbɔr a faal le ye Yisa Masiya. Ni ye ti be Masiya ni ke, ti mu kpiɛ Abiraham yaabili le. le, ki li ji u faal ke Uwonbɔr a mɔsiinlin kaah wɔɔn man nin.

Currently Selected:

Galantiya 3: KUGL

Highlight

Copy