Galantiya 1
1
1Min Pɔɔl wan ye Masiya a toom nan, maa nyann bininfob ban ni bee naa ye uninfo le tunimi, amaa Yisa Masiya nin ti Baa Uwonbɔr, wan fiin u nkumin nin, 2nin n nabum ban biɛn be n ban,
Le sɔb kugbɔŋ nan ki poor nim biwonjiɛm a laginn tan be Galantiya a timin:
3Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu, 4u ma ti yudaau Yisa nmɔn le ta uba ki siin ti taalin ti yaa toonbirin, ke un nyan ti dulinya birig kan a yonn wee ti be nan, ke ti Baa Uwonbɔr kaah ban man nin, 5Uma wan ye kupag hali nin n-yonn man kaa jɔɔ ndiɛmi. Ibamɔn.
Tibɔŋann tiba kpeŋileŋ le be
6Ni garim pam nin naah labir weem ki jiɛn Uwonbɔr wan yin ni Masiya a nyunyunbasanl bu-n wee ki labir nɔɔ tibɔr tan be ti binba nmɔn, 7taa le ye tibɔŋann ma kolibi. Ibamɔn buu bininfob biba li yin ta kuŋmaruŋ ki ŋa ni sufu ni ki degin ni Masiya a bɔŋann nmɔn. 8Amaa hali tim bee malaka le nyan papaab ki yin mɔɔn tibɔŋann wee ti be tiba kaa ye tan wee ti pii mɔɔn ki sei nin nke, che nŋmi man kaa jɔɔ njunimin ngaa u! 9Ke taah pii nan len man nin, le n ji bei ni daandaan nan: Ni ye uba mɔɔn tibɔŋann wee taa ye tan wee ni nan gaa-n ke, che nŋmi man kaa jɔɔ njunimin ngaa u!
10N gbaar ki ban bininfob le n ke n toon ŋan bee Uwonbɔr aa? Bee n ban bininfob a num le n gbee maa? Ni ye n le la bi gbaar ban bininfob a num le n gbeem ke, maa bi yin ye Masiya a yomu wi.
Pɔɔl kaah nan ŋa Yisa a toom man
11N nabum, n ban ni li nyi ke tibɔŋann tan wee n nan pagin, naa ye uninfosaal le ŋa ti. 12Maa gaa ti uninfosaal ban ni, naa ye uba mu le ta ti ki wɔɔnimi; amaa, n gaa ti Yisa Masiya wan kpiir ti ki wɔɔnimin ban le.
13Ni pii gbir maah nan jɔɔ nbinben man n-yonn man wee n nan nɔɔ Juu yaab a wonjiɛn samin a bɔra, nin maah nan mugir biwonjiɛm a laguŋ linunmanl ki gbaar ban n bii liwonjiɛnl man. 14N nan lii Juu yaab takpem tim Juu yaab a wonjiɛn samin, min nin ban nan yegin, n nan jɔɔ inunman takpem ki nɔɔ n yaajam a kaal kaah wɔɔn man.
15Amaa Uwonbɔr, wan nan gannim ke baa la ma min, naah nan nan gbee U num n-yonn man nin le U yim U nyunyunbasanl bu, 16ki kpiir U bija wan be n ni-n ki wɔɔn ke n ta u ki mɔɔn ki sei ban kaa ye Juu yaabin, maa nan gbeer uba, 17n mu kaa jon Jerusalam ke n tan kan ban nan chinn ye itoon n ni, amaa libol nmɔn n nan jon Arabiya le, ni bɔɔn bu le n jir Damasiko.
18Ibin itaa a bɔɔn, le n nan jon Jerusalam n tan gɔnn Piita#1:18 Piita a yinl liba le ji ye Sifasi. ki biɛ u, le ki nan be u ban iweehn piig nin iŋmu. 19Maa nan kan Yisa a tooi bimiɛnin a ni uba, see ti Yudaau a waal Jemisi a binba. 20Uwonbɔr buu, naa ye tibɔkar le n por ki sɔb tenn ni. 21Ni bɔɔn bu le n jon Siriya nin Silisiya. 22N-yonn nmɔn, biwonjiɛm a laginn ban nan be Judiya a tingbɔŋin ki be Masiya ni-n kaa nan nyimi. 23Bi le nan gbir bininfob biba le kaah pag ke: “Uja wan nan mugir ti-n, mu nin mɔɔn yada kan wee u nan ban un choo bii nle ki tenn bininfob.” 24Le bi don Uwonbɔr a yinl min bu.
Currently Selected:
Galantiya 1: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
