न्यायकर्ता 20
20
इस्राएलीतय्सं बेन्यामीनीतलिसें लडाइँ यायेत तयारी याःगु
1अले उत्तरय् दानंनिसें दच्छिनय् बेर्शेबातक व पुर्बय् गिलादंनिसें सकलें इस्राएलीत पिहां वल। इपिं छप्पँ जुयाः परमप्रभुया न्ह्यःने मिस्पाय् मुन। 2इस्राएलया फुक्क कुलयापिं नायःत व तरवार घानातःपिं प्यंगू लाख सिपाइँत परमेश्वरया मनूतय्गु मुंज्याय् मुन। 3बेन्यामीनीतय्सं इस्राएलीत मिस्पाय् वंगु खँ न्यन। अले इस्राएलीतय्सं धाल, “थज्याःगु बांमलाःगु खँ गथे यानाः जुल, जिमित धा।”
4अथे जूगुलिं व स्यानातःम्ह मिसाया भाःत लेवीं धाल, “जि व जिमि मथ्याःम्ह कलाः चा च्वनेत बेन्यामीनया गिबाय् वया। 5उखुन्हु चान्हय् गिबायापिं मनूतय्सं जितः स्यायेगु बिचालं जि च्वनागु छेँयात घेरय् यात। इमिसं जिमि मथ्याःम्ह कलाःयात जबरजस्ती यात अले व सित। 6जिं थः मथ्याःम्ह कलाःयात कयाः वयागु सीम्हयात कुचा कुचा यानाबिया अले छकु छकु इस्राएलया झिंनिगू कुलयाथाय् छ्वयाः छाय्धाःसा इमिसं इस्राएलय् थज्याःगु क्वह्यंगु व इज्जत कायेगु ज्या यात। 7आः छिकपिं सकलें इस्राएलीतय्सं न्यनादिसँ, थुकिया बारे छु यायेगु खः धयादिसँ। छिकपिन्सं हे फैसला यानादिसँ।”
8सकलें मनूत छम्ह मनू थें जुयाः थथे धाधां दन, “झीपिं सुं नं थःगु छेँ वने मखु, झीपिं मध्ये सुं नं थःगु छेँ वने मखु। 9आः गिबायात झीसं थथे याये। गोला तयाः झीपिं हमला यायेत वने। 10झीसं इस्राएलया फुक्क कुलं झिम्हय् छम्ह मनूयात सिपाइँतय्गु निंतिं नयेगु सामान तयार यायेत काये। अले सेना बेन्यामीनया गिबाय् वये धुंकाः इमिसं इस्राएलय् याःगु फुक्क क्वह्यंगु ज्याया निंतिं गिबाय् च्वंपिन्त सजाँय बी।” 11थुकथं इस्राएलीत सकलें छप्पँ जुयाः गिबाय् हमला यायेत मुन।
12इस्राएलीतय्सं बेन्यामीन कुलयाथाय् थथे धकाः मनूत छ्वत, “छिमिगु दथुइ याःगु थ्व तसकं मभिंगु ज्या छु खः? 13आः गिबायापिं इपिं मभिंपिं मनूतय्त जिमिगु ल्हातय् ब्यु अले जिमिसं इमित स्यानाः इस्राएलं मभिंगु ज्या चीकाछ्वये।”
तर बेन्यामीनीतय्सं थः दाजुकिजा इस्राएलीतय्गु खँ मन्यं। 14इपिं इस्राएलीतलिसें ल्वायेत बेन्यामीनी शहर शहरं गिबाय् मुंवल। 15गिबाय् च्वंपिं न्हय्सःम्ह ल्ययातःपिं मनूत बाहेक बेन्यामीनीतय्सं थत्थें इमिगु शहर शहरं इस्राएलीतलिसें ल्वायेत निइखुद्वःम्ह तरवार घानातःपिं मनूतय्त मुंकल। 16थुपिं मध्ये न्हय्सःम्ह ल्ययातःपिं खव ल्हाः चले जूपिं सिपाइँत खः। इमिसं न्यातिं कय्कीबलय् थ्याक्क थासय् लाके फु। 17बेन्यामीनीत बाहेक इस्राएलीतय्सं प्यंगू लाख तरवार चले याइपिं मनूत मुंकल। इपिं सकलें ल्वायेसःपिं सिपाइँत खः।
बेन्यामीन कुल नाप लडाइँ
18इस्राएलीत थत्थें बेथेलय्#२०:१८ बेथेल बेथेलया अर्थ परमेश्वरया छेँ वनाः अन इमिसं परमेश्वरयात थथे धकाः न्यन, “बेन्यामीनीतय्त हमला यायेत गुगु कुल न्हापा वनेमाः?”
परमप्रभुं धयादिल, “यहूदा न्हापा वनेमाः।”
19उकिं इस्राएलीत सुथ न्हापां गिबाया लिक्क वनाः छाउनी तल। 20इस्राएलीत बेन्यामीनीतलिसें लडाइँ यायेत पिहां वल। इमिसं बेन्यामीनीतलिसें ल्वायेत गिबाय् तयार जुयाच्वन। 21बेन्यामीनीत गिबां पिहां वल अले इमिसं निइनिद्वःम्ह इस्राएलीतय्त लडाइँया ख्यलय् स्यानाबिल।
22तर इस्राएलीतय्सं छम्हय्सिनं मेम्हय्सित हःपाः बिल। अले हाकनं थः सेनायात न्हापांगु न्हि थें थाय् थासय् तल। 23अथे जुयाः इस्राएलीत थाहां वनाः परमप्रभुया न्ह्यःने सन्ध्याकाः ई तक ख्वल, अले इमिसं परमप्रभुयात न्यन, “जिमि दाजुकिजा बेन्यामीनीतलिसें जिपिं हाकनं ल्वाः वनेगु ला?”
परमप्रभुं लिसः बियादिल, “इमित हाकनं हमला या।”
24थथे निन्हु खुन्हु नं इपिं बेन्यामीनीतलिसें लडाइँ यायेत न्ह्यज्यात। 25बेन्यामीनीत नं इपिंलिसें लडाइँ यायेत गिबां पिहां वल, इमिसं तरवार चले याइपिं १८,००० म्ह इस्राएलीतय्त स्यानाबिल।
26सकलें इस्राएलीत बेथेलय् लिहां वन, अले ख्वयाः अन इपिं उखुन्हु सन्ध्याकाः ईतक परमप्रभुया न्ह्यःने अपसं च्वन। इमिसं परमप्रभुया न्ह्यःने होमबलि व मेलबलि छाल। 27इस्राएलीतय्सं परमप्रभुयाके न्यन। उबलय् परमेश्वरया बाचाया सनू बेथेलय् दुगु जुल। 28अबलय् हारूनया छय् व एलाजारया काय् पीनहास पुजाहारी खः। इमिसं न्यन, “जिपिं जिमि दाजुकिजा बेन्यामीनीतलिसें हाकनं लडाइँ याः वनेमाः कि म्वाः?”
परमप्रभुं लिसः बियादिल, “इमित हमला या! कन्हय् जिं इमित छिमिगु ल्हातय् बी।”
29अले इस्राएलीतय्सं गिबाया प्यखेरं मनूत सुचुका तल। 30स्वन्हु दुखुन्हु इस्राएलीत बेन्यामीनीतलिसें ल्वायेत न्ह्यज्यात, अले सेनायात न्हापायागु थासय् हे तल। 31बेन्यामीनीत धाःसा व सेनायात हमला यायेत पिहां वल। इपिं शहरं तापाक्क तक वन। अले चक्कंगु ख्यलय् बेथेलय् व गिबा वनीगु लँपुइ न्हापा थें हे इस्राएलीतय्त हमला यानाः इमिसं स्विम्ह इस्राएलीतय्त स्यात।
32अले बेन्यामीनीतय्सं थथे धाल, “जिमिसं हाकनं इमित त्याकाच्वनागु दु।” तर इस्राएलीतय्सं इमित शहरं पिकयाः मू लँपुइ हयेत बुनाः बिस्युं वंपिं थें यानाः क्यंगु खः।
33सकलें इस्राएलीत थथःगु थाय् त्वःताः लडाइँया लागि बाल-तामारय् मुन। उघ्रिमय् हे सुलाच्वंपिं इस्राएलीत गिबाया पच्छिमया थासं हथासं पिहां वल। 34अले इस्राएलयापिं झिद्वः मनूतय्सं न्ह्यःनं गिबाय् हमला यात। याकनं तसकं ल्वापु जुल। तर बेन्यामीनीतय्सं थःगु न्ह्यःने नाश वये धुंकल धयागु खँ मस्यू। 35थुकथं परमप्रभुं इस्राएलीतय्गु ल्हातं बेन्यामीनीतय्त बुकादिल। उखुन्हु इस्राएलीतय्सं तरवार चले याइपिं निइन्याद्वः व सछिम्ह बेन्यामीनीतय्त स्यानाबिल। 36अले “झीपिं बुत” धकाः बेन्यामीनीतय्सं सिल।
गथे यानाः बेन्यामीनीतय्त बुकल?
सकलें इस्राएलीत गिबाया न्ह्यःने सुलाच्वंपिं मनूतके भलसा तयाः थः बूपिं थें यानाक्यंगु खः। 37इपिं सुलाच्वंपिं मनूतय्सं गिबाय् आकाझाकां हमला यात, अले प्यखेरं न्यनावनाः अन दुपिं सकसितं स्यात। 38इस्राएलया मनूत व सुलाच्वंपिं मनूतय् दथुइ इमिसं शहरं मित्याः आकाशपाखे छ्वयेगु चिं क्वःछिनातःगु जुयाच्वन। 39इस्राएली मनूत लिहां वया बेन्यामीनीतय्त हमला याइगु खः।
“न्हापायागु लडाइँलय् थें झीसं इस्राएलीतय्त बुकाच्वनागु दु,” धकाः धयाः बेन्यामीनीतय्सं स्विम्ह इस्राएलीतय्त स्याये धुंकूगु खः। 40तर शहरं मित्याः आकाशपाखे थाहां वंबलय् बेन्यामीनीतय्सं लिफः स्वल। स्व, इमिसं शहर न्यंक मि नयाच्वंगु खन। 41अले इस्राएलीतय्सं फहिलाः बेन्यामीनीतय्त हमला यात। थःगु नाश जुइगु ई वःगु खनाः बेन्यामीनीत ग्यानाः आत्ते जुल। 42उकिं इपिं इस्राएलीतय् न्ह्यःनं मरुभूमिपाखे बिस्युं वन। तर इपिं बिस्युं वने मफुत। शहर शहरं वःपिं इस्राएलीतय्सं बेन्जामीनीतय्त दथुइ लाकाः पालाः स्यानाबिल। 43इमिसं बेन्यामीनीतय्त घेरय् यात। अले दि हे मद्युसे लिना हे च्वन, गिबाया पुर्बय् छगू थासय् इमित त्याकल। 44झिंच्याद्वःम्ह बेन्यामीनीतय्त स्यात। इपिं सकलें ल्वायेसःपिं सिपाइँत खः। 45बचय्जूपिं धाःसा लिहां वया मरुभूमिइ दुगु रिम्मोनया ल्वहंधीपाखे बिस्युं वन। इमिसं इपिं मध्ये न्याद्वःम्हसित, लँय् नापलाकाः स्यानाबिल। इमिसं बेन्यामीनतय्त गिदोम तक हे लिनाच्वन अले मेपिं निद्वःम्हय्सित स्यानाबिल।
46उखुन्हु २५,००० म्ह बेन्यामीनीतय्त स्यात। उपिं स्याःपिं सकलें ल्वायेसःपिं सिपाइँत खः। 47खुसःम्ह मनूत धाःसा लिहां वनाः मरुभूमिइ दुगु रिम्मोनया ल्वहंधिकय् बिस्युं वन। अले इपिं अन प्यला तक च्वन। 48अनंलि इस्राएलीत बेन्यामीनीतय्थाय् वल। अले शहरय् दुपिं मनूत, सा द्वहं व नापलाःपिं फुक्क पशुतय्त इमिसं तरवारं स्यात। इपिं शहर शहरय् वन इमिसं नापलाक्वः फुक्क शहरतय्त मिं नकाबिल।
Currently Selected:
न्यायकर्ता 20: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
