न्यायकर्ता 19
19
गिबाय् जूगु मभिंगु ज्या
1उगु इलय् इस्राएलय् जुजु धयापिं हे मदुनि।
छन्हु एफ्राइमया पहाडी देशयागु तसकं वने थाकुगु थासय् च्वनीम्ह छम्ह लेवीं यहूदाया बेथलेहेमं छम्ह मथ्याःम्ह कलाः हल। 2तर व थः भाःतलिसें तंचायाः वयात त्वःताः यहूदाया बेथलेहेमय् थः छेँय् लिहां वन, अले अन व प्यला तक च्वन।
3अले वया भाःत थः च्यः व निम्ह गधा ज्वनाः वयात ह्यय्काः लितः हयेत व मिसाया छेँय् वन। अले व मिसां इमित थः बौया छेँय् यंकल। व लेवीयात खंबलय् व मिसाया बौनं लय्तायाः वयात लसकुस यात। 4वया ससःबौनं कर याःगुलिं व अन स्वन्हु तक च्वन। व नयात्वनाः अन हे चा च्वन।
5प्यन्हु दुखुन्हु इपिं सुथ न्हापां दन अले वनेत्यंबलय् मिसाया बौनं थः जिलाजंयात धाल, “न्हापा छुं नयाः आराम यानादिसँ, अले झासँ।” 6उकिं इपिं निम्ह फ्यतुत। अले नापं च्वनाः नयेगु त्वनेगु यात अले मिसाया बौनं धाल, “अज्ज मेगु छचा च्वनाः न्ह्यइपुकादिसँ।” 7व वनेत दन। वया ससःबौनं धाःसा वयात च्वनेत कर यात अले व अज्ज छचा च्वन। 8न्यान्हु दुखुन्हु व वनेत सुथ न्हापां दन। तर मिसाया बौनं धाल, आः झासु नि लंकादिसँ, न्हिनय् तक पियादिसँ। उकिं इपिं निम्हय्सिनं नापं च्वनाः नयेगु त्वनेगु यात।
9अले व मनू थः मथ्याःम्ह कलाः व च्यःलिसें वनेत हानं छकः दन। तर वया ससःबौनं धाल, “स्व सन्ध्याकाः ई जुइ धुंकल। थौं चच्छि थन हे च्वनाः न्ह्यइपुकादिसँ, अले कन्हय् सुथ न्हापां दनाः छेँ लिहांझासँ।” 10तर व मनू उखुन्हु चान्हय् अन च्वनेत मानय् मजुल। उकिं व सामान क्वबिका तःपिं निम्ह गधा व मथ्याःम्ह कलाःनापं यबूस शहर (थ्व यरूशलेम शहर खः) पाखे वन।
11इपिं यबूस लिक्क थ्यंबलय् सन्ध्याकाः ई जुइन। वया च्यलं थः मालिकयात धाल, “थौं चान्हय् झीपिं थन हे च्वनेनु।”
12तर वया मालिकं धाल, “मखु, इस्राएलीत मदुगु थ्व परदेशी थासय् झीपिं च्वने मज्यू। बरु झीपिं गिबाय् वनेनु।” 13वं हानं धाल, “वा, गिबाय् वा रामाय् थ्यंकः वनेत कुतः यायेनु। थौं झीपिं चान्हय् अन हे बाय् च्वने।” 14उकिं इपिं न्ह्यज्याल। बेन्यामीन कुलया लागा गिबाया लिक्क थ्यंकः वःबलय् निभाः बित। 15लँ त्वःताः इपिं चा च्वनेत गिबाय् दुहां वन। शहरय् थ्यंकाः इपिं चक्कंगु चुकय् च्वन। तर इमित चान्हय् बाय् च्वनेत सुनानं छेँय् मयंकू।
16व सन्ध्याकाः इलय् गिबाय् च्वनीम्ह छम्ह बुराम्ह मनू बुँइ ज्या यानाः लिहां वयाच्वंगु जुल। व एफ्राइमया पहाडी देशयाम्ह तर गिबाय् च्वनीम्ह खः। (अन बेन्यामीनीत च्वनीगु खः) 17वं थय्क च्वय्पाखे स्वःबलय् शहरया चुकय् फ्यतुनाच्वंम्ह व यात्रीयात खन। व बुराम्ह मनुखं न्यन, “छ गन वनेत्यनागु? छ गनं वयागु?”
18वं लिसः बिल, “जिपिं यहूदाया बेथलेहेमं एफ्राइमया पहाडी देशयागु तसकं वने थाकूगुथाय्पाखे वनाच्वनागु। जि अनयाम्ह हे खः। जि यहूदाया बेथलेहेमय् वनागु खः आः जि थःगु छेँय्#१९:१८ थःगु छेँय् हिब्रू बाइबलय् परमप्रभुया छेँ वनाच्वंनागु वनाच्वनागु। तर सुनानं जितः थःगु छेँय् बाय् मब्यू। 19जिमिके नयेगु त्वनेगु फुक्क दु। जिके गधायात नकेत सु व दाना नं दु। जि, जिमि मिसा व जिमि च्यःया निंतिं मरि व दाखमद्य दु। जिमित छुं म्वाः।”
20बुराम्ह मनुखं धाल, “जिगु छेँय् झासँ, छिकपिन्त लसकुस दु। जिं छिमित बाय् बी। छिकपिं चुकय् चा च्वनेम्वाः।” 21अले इमित वं छेँय् दुने यंकल, गधायात नसा त्वँसा बिल। इमिसं थःगु तुति सिल, नये त्वनेगु यात।
22इपिं न्ह्यइपुका च्वंबलय् हे आकाझाकां व शहरयापिं छुं मभिंपिं मनूत वयाः व छेँयात घेरय् यात। खापाय् घारा घारा यानाः इमिसं व छेँयाम्ह बुराम्ह थुवाःयात धाल, “छंगु छेँय् दुहां वःम्ह मनूयात पिका, जिमित वलिसें लसपस याये मास्ति वः।”
23व छेँ थुवाः बुराम्हं पिने पिहां वयाः धाल, “मखु जिमि पासापिं, थज्याःगु मभिंगु ज्या छता याये मते, थ्व मनू ला जिमि पाहां खः। थज्याःगु मछालापुस्से च्वंगु ज्या याये मते। 24स्व, थन ब्याहा मजूम्ह जिमि म्ह्याय् व वया मथ्याःम्ह कलाः दु। जिं इमित छिमिथाय् हये। छिमिसं इमित स्यंकाः थःयःथे या। तर थ्व मनूयात थज्याःगु घच्चाइपुगु ज्या याये मते।”
25तर मनूतय्सं वयागु खँ मन्यं। अले व मिजंनं थः मथ्याःम्ह कलाःयात ज्वनाः इमिगु न्ह्यःने पिने घ्वाना छ्वल। इमिसं वलिसें जबरजस्ती यात, अले चच्छि हे क्वह्यंगु व्यवहार यात। अले सुथ न्हापा जुइ धुंकाः इमिसं वयात वनेबिल। 26अथे जुयाः सुथ न्हापां व मिसा थः भाःत दुगु छेँ वयाः लुखाय् ग्वार्तुल अले निभाः त्वयेधुंका तक अन ग्वार्तुलाच्वन।
27व मिसाया भाःत सुथ न्हापां दन, अले थःगु यात्राय् वनेत छेँया लुखा चायेकूबलय् अन वं थः मथ्याःम्ह कलाःयात छेँ न्ह्यःने थःगु ल्हाः लुखा खलय् चकंका ग्वारा तुलाच्वंगु खन। 28वं वयात धाल, “दँ, झीपिं वनेनु।” तर वं छुं लिसः मब्यू। उकिं वं वयात गधाया म्हय् तल अले छेँपाखे वन।
29छेँ थ्यनेधुंकाः वं छपु छुरि काल। थः मथ्याःम्ह कलाःया सीम्हयात कुचा कुचा यानाः ध्यन। उकिं झिंनिप्वः चिनाः इस्राएलया प्यखेरं छ्वयाबिल। 30अले थ्व खंपिं सकसिनं धाल, “इस्राएलीत मिश्र देशं वःबलय् निसें थौं तक थज्याःगु गुबलें नं जूगु मदुनि। थुकिया बारे बांलाक बिचाः या! छु यायेमाः जिमित धा।”
Currently Selected:
न्यायकर्ता 19: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
