न्यायकर्ता 21
21
बेन्यामीनीतय्गु निंतिं भमचात
1इस्राएली मनूत मिस्पाय् मुने धुंकाः “झीपिं मध्ये सुनानं थः म्ह्याय् सुं बेन्यामीनीतय्त बी मखु” धकाः पाफःगु खः। 2आः ला इपिं बेथेलय् वनाः ह्वाँय्ह्वाँय् ख्वख्वं सन्ध्याकाः ई तक परमेश्वरया न्ह्यःने च्वनाच्वन। 3इमिसं धाल, “हे परमप्रभु इस्राएलयाम्ह परमेश्वर, इस्राएलय् थथे छाय् जू वःगु? इस्राएलं छाय् थौं छगू कुल तनावन?”
4कन्हय् खुन्हु सुथ न्हापां इमिसं छगू वेदी दय्काः होमबलि व मेलबलि छाल। 5अले इस्राएलीतय्सं न्यन, “इस्राएलया फुक्क कुल मध्ये गुगु कुल परमप्रभुया सभाय् मवः?” छाय्धाःसा मिस्पाय् परमप्रभुयाथाय् मवंपिन्त स्याना हे छ्वयेमाः धकाः इमिसं पाफःगु खः।
6थः बेन्यामीनी दाजुकिजापिनिगु लागि इस्राएलीत दुःखी जुल, छाय्धाःसा इमिसं धाल, “थौं इस्राएलयागु छगू कुल तनावंगु दु।” 7ल्यंदुपिं बेन्यामीनी मिजंतय्गु निंतिं झीसं गनं मिसात हयेगु? 8अले इमिसं हानं न्यन, “इस्राएलया कुल मध्ये गुगु कुल मिस्पाय् परमप्रभुयाथाय् मवः?” इमिसं याबेश-गिलादं सुं नं सभाया निंतिं छाउनीइ मवःगु धइगु खँ सीकल। 9उबलय् मनूतय्त ल्याःखाबलय् ला याबेश-गिलादयापिं छम्ह नं मनू अन मदु।
10उकिं व इस्राएलीतय्गु सभां ल्वायेसःपिं झिंनिद्वः सिपाइँतय्त थथे आज्ञा बियाछ्वत, “याबेश-गिलादय् वनाः अन दुपिं सकलें मिजं, मिसा व मस्तय्त स्या। 11छिमिसं याबेश-गिलादय् दुपिं मिजंत व मिस्तलिसें लसपस याये धुंकूपिं सकलें मिस्तय्त स्या। तर कुमारीतय्त म्वाकाति।” 12इमिसं अथे हे यात। इमिसं याबेश-गिलादयापिं मनूत मध्ये प्यसःम्ह कुमारी मिस्तय्त नापलाकल। इपिं मिस्तय्त इमिसं कनानया शीलोया छाउनीइ हल।
13अले इस्राएलीतय्गु व सभां रिम्मोनया ल्वहंधिकय् दुपिं बेन्यामीनीतय्थाय् सन्धियागु बुखँ छ्वल। 14उकिं बेन्यामीनीत अबलय् हे लिहां वल, अले इस्राएलीतय्सं याबेश-गिलादं हःपिं भम्चा इमित बिल। इमिसं इपिं मिस्तय्त मस्यासें म्वाकातःगु खः। तर इपिं फुक्क मिस्त बेन्यामीनीतय्गु लागि मगात।
15अले मनूत बेन्यामीनीतय्गु लागि दुःखी जुल। छाय्धाःसा परमप्रभुं इस्राएली कुलतय्त फायादीगु दु। 16अले सभाया थकालितय्सं धाल, “बेन्यामीनी कुलय् मिस्त मदु। ल्यंदुपिनिगु लागि भम्चा मालेत छु यायेगु?” 17इमिसं धाल, “बचय्जूपिं बेन्यामीनीतय्त अधिकारया भाग दयेमाः। मखुसा इस्राएलीत मध्येया छगू कुल तनावनी। 18तर झीसं थःम्ह्याय्पिं इमित ब्याहा यानाः बी फइ मखु, छाय्धाःसा सुं बेन्यामीनीयात म्ह्याय्मस्त ब्यूम्ह मनूयात सराः लाइ धकाः झीसं पाफयागु दु।” 19अय्नं बेथेलया उत्तरपाखे, बेथेलं शकेम वनीगु मू लँया पुर्बपाखे व लबोनया दच्छिनपाखे शीलोय् परमप्रभुया निंतिं दँय्दसं जुइगु नखः इमिसं लुमंकल।
20अथे जुयाः इमिसं बेन्यामीनीतय्त थथे आज्ञा बिल, “वनाः दाखक्यबय् सुला च्वँ। 21नखः खुन्हु शीलोयापिं कुमारी मिस्त प्याखं हुलेत वइबलय् छिपिं दाखक्यबं पिहां वयाः छम्ह छम्हय्सिनं छम्ह छम्हय्सित भम्चा दय्केत ज्वँ। कुमारी मिस्तय्त थःनापं थःगु देशय् ज्वनाः हुँ। 22अनंलि इमि बौ वा दाजुकिजापिं जिमिथाय् वयाः धाःवल धाःसा जिमिसं धाये, ‘इमित ग्वाहालि यानाः जिमित दया यानादिसँ, छाय्धाःसा लडाइँलय् इमिगु निंतिं झीसं भम्चा हयाबी मफुत। छिकपिन्त दोष लाइ मखु। छाय्धाःसा छिकपिन्सं थःम्ह्याय्पिं ब्यूगु मदु।’”
23उकिं बेन्यामीनीतय्सं अथे हे यात। इपिं कुमारी मिस्त प्याखं हुला च्वंबलय् हे छम्ह छम्ह मनुखं छम्ह छम्ह कुमारी मिसायात ज्वन अले थः कलाः दय्केत यंकल। इपिं थथःगु थासय् लिहां वन। अले शहरयात हाकनं दय्काः इपिं उकी च्वन।
24अबलय् इस्राएलीत व थाय् त्वःताः थथःगु कुल व वंशतय्थाय् वन, सकलें थथःगु थासय् वन।
25उगु इलय् इस्राएलय् जुजु धयापिं हे मदुनि। सुनानं छु याये मंदत व हे यानाजुइगु खः।
Currently Selected:
न्यायकर्ता 21: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
