Luke 17

Jesus taak bout sin, fargivnis ahn fiet

(Matthew 18.6, 7, 21, 22; Mark 9.42-48)

1Jesus seh tu ihn disaipl dem, “Unu gwain aalwiez gat temtieshan fi sin, bot ih gwain bii big trobl fi di wan weh kaaz pipl fi sin! 2Ih wuda beta fi dehn tai wan big rak roun ihn nek ahn chruo im iina di sii an fi ihn kaaz wan a demya likl wan fi sin. 3So main weh unu deh du!

“If eny a yo breda sin, golang ahn fies im bout'ih; if ihn sary fi weh ihn deh du ahn waahn chienj ihn wiez, den unu fi paadn im. 4Iivn if ihn du unu rang seven taim iina wan die, ahn kom bak seven taim ahn seh, ‘Ah sary,’ den unu fi fargiv im evry taim.”

5Di apasl dem seh tu Jesus, “Laad, mek wi fiet stranga no.”

6Jesus seh, “Iivn if unu fiet smaal laik wan mostad siid, unu kyan tel dis sikimuor#17.6 Or: wan sycamine trii, weh dah wehn wan big-big trii laik wan siida trii. trii, ‘Pul op yo ruut ahn go, go plaant yoself iina di sii,’ ahn ih gwain obie unu.

7“Sopuoz wan a unu gat wan sorvant weh deh kom iin fahn work yo grong, or tek kier a yo shiip. Yo wuda tel im fi hory kom ahn tek ihn plies dah di tiebl ahn iit? 8Nuo sah. Insida dat yo gwain tel im, ‘Kom get mi sopa. Put aan wan iepran ahn ten tu mi; wiet til Ah iit ahn drink. Den aftawod yuu kyan iit ahn drink.’ 9Yo no iivn gwain tel im ‘tanks’ fi du weh yo tel im fi du! 10So ih hafy bii wid unu. Wen unu don du aal weh di Laad tel unu fi du, unu fi seh, ‘Wi dah jos aadinary sorvant; wi ongl deh du weh wi hafy du.’ ”

Jesus kyuor ten man wid bad skin diziiz

11Wail Jesus wende pan di wie gwain Jerusalem, ihn wende paas chruu di plies bitwiin Samaria ahn Galilee. 12-13Wen ihn wende get nier wan toun, ten man weh gat leprosy kom tu im. Dehn stap faar fahn Jesus ahn hala tu im seh, “Jesus, Tiicha, get sary fi wi no!”

14Wen Jesus si di man dem, ihn seh tu dem, “Go mek di priis dem si unu.”

Ahn az dehn wehn gwain lang, dehn get kyuor; dehn skin get beta! 15Den, wen wan a dem nuotis seh ihn get hiil, ihn ton bak ahn staat priez God pan tapa ihn vais. 16Ihn chruo dong ihnself flat bai Jesus fut ahn tank im. Ahn fi si ihn dah wehn wan Samaritan man, 17Jesus aks, “Dah neva ten a unu man weh get hiil? So weh di neks nine deh? 18Dah mosy ongl dis man weh dah wan farina nuo fi kom bak, kom priez God?” 19Den Jesus tel di man, “Get'op ahn go bout yo bizniz. Dah sieka yo fiet, yo get hiil.”

Nonbady no nuo di die nar di taim wen Jesus deh kom bak

(Matthew 24.23-28, 36-44; Mark 13.32-37)

20Now, wan taim di Pharisee dem aks Jesus, “Wen God Kingdom gwain kom?” Jesus ansa dem ahn seh, “God Kingdom no gwain kom iina wan wie weh unu kyan si chruu som fony mirakl seh ih deh yah. 21So nonbady kyaahn seh, ‘Luk, ih deh yah,’ or ‘Ih dedeh!’ Bikaaz fi chruut, God Kingdom deh rait iina unu ahn deh mongs unu now.”

22Den Jesus seh tu ihn disaipl dem, “Di die gwain kom wen unu gwain lang fi spen iivn wan die wid di Son a Man, bot unu gwain kyaahn du'ih. 23Pipl gwain tel unu seh, ‘Luk, di Son a Man wehn dedeh!’ or tel unu seh ihn wende yah, bot unu no fi ron afta dem. 24Wen di laitnin flash kraas di skai ahn aalava sodn lait'ih op fahn wan en tu di nada en, dah rait so di Son a Man gwain kom bak, ahn den dehn wi si'im gud. 25Bot fos ihn gwain hafy sofa plenty ting, ahn disya jinarieshan gwain rijek im. 26Jos how tingz wehn hapm iina Noah diez, dah rait so ih gwain bii wen di Son a Man kom bak. 27Pipl iina Noah diez wende iit ahn drink op, deh get marid ahn deh put fi marid rait op til di die wen Noah gaan iina di big-big buot. Den di flod kom ahn kil aala dem. 28Siem wie, jos laik iina Lot diez, dehn wende iit ahn drink plenty, deh bai ahn deh sel; deh du dehn faamin, ahn deh bil dehn hous dem tu. 29Bot pan di die wen Lot gaan fahn Sodom, faiya ahn solfa kom dong laik rien fahn hevn ahn kil aala dem. 30Ih gwain bii jos so pan di die wen di Son a Man kom bak. 31Pahn Dat Die, enybady weh deh pan dehn hous-tap, no fi luuz taim deh get dong iina di hous fi tek somting wid im, bot rait awie dehn fi ron weh. Ahn di man weh deh work iina ihn grong, no fi go bak huom fi notn.

32“Memba weh hapm tu Lot waif! 33Enybady weh trai fi liv ihn laif iina ihn uon wie, gwain end'op deh luuz ih; bot enybady weh wi risk ihn uon laif jos fi mii, gwain siev ih. 34Ah deh tel unu seh: dah nait two pipl gwain deh sliip iina wan bed; wan a dem gwain get ker weh, ahn di nada wan gwain get lef. 35Rait so, two uman gwain deh grain flowa dah di mil tugeda; wan a dem gwain get ker weh ahn di nada wan gwain get lef. 36Ahn two man gwain deh work iina di fiil; dehn gwain ker weh wan a dem, ahn lef di nada wan.”

37Di disaipl dem aks Jesus, “Laad, dah weh paat dis gwain hapm?”

Jesus tel dem, “Enywie weh wan ded bady deh, dah rait dehso, di jankro dem gwain gyada op.”

Currently Selected:

Luke 17: NTIC

Highlight

Copy