Luke 13

Ripent or Ded

1Bout dis siem taim, som pipl kom ahn tel Jesus bout how Pilate wehn kil som pipl fahn Galilee lan, wail dehn wende mek sakrifais tu God. 2Jesus aks dem, “Unu tink seh dehn pipl wehn sofa so moch bikaaz dehn dah wehn wosa sina an aal di ada pipl dem fahn Galilee? 3No! Ah deh tel unu: if unu no ripent ahn ton tu God, unu gwain ded tu. 4Or unu tink seh di eighteen man weh ded, wen di towa ah Siloam faal dong, dehn dah wehn wosa sina an evrybady els iina di huol Jerusalem? 5No! if unu no ripent, unu gwain ded tu.”

Du gud tingz fi God; no bii laik wan wotlis trii weh no bier fruut

6Den Jesus tel dem dis parabl, “Wan man wehn gat wan fig trii plaant iina ihn grong, ahn ihn gaan, gaan luk fi fain fruut pan ih, bot ihn neva fain non. 7So ihn seh tu di man weh tek kier a ihn grong, ‘Fi three yierz Ah deh kom luk fi fig pan daty trii ahn neva fain non. Chap'ih dong! Ih jos deh tek op spies weh wi kyan yuuz fi somting els.’ 8‘Saar,’ di man seh, ‘Lef ih wan nada yier, ahn Ai wi dig roun ih ahn put manyuor pan ih. 9If ih bier fruut neks yier, gud! If nat, mek wi chap'ih dong.’ ”

Jesus kyuor wan kripl uman pan di Sabat die

10Wan Sabat die, Jesus wende tiich iina wan sinigag, 11ahn ihn si wan uman weh wan bad spirit get im kripl fi eighteen yierz. Ihn wehn ben rait uova ahn kudn iivn strietn op ihnself. 12So wen Jesus si'im, ihn kaal im tu im ahn seh, “Uman, yo get kyuor fahn yo siknis!” 13Den ihn toch im, ahn siem taim di uman stan op striet, ahn ihn staat priez God!

14Di liida a di sinigag wehn beks bikaaz Jesus kyuor di uman pan di Sabat die. Ihn kiip deh row ahn seh tu di kroud, “Yo gat six diez weh wi fi du work, so kom pan wan a demde diez fi get kyuor; no pan di Sabat!”

15Bot di Laad ansa seh, “Unu hipokrit! Aala unu no luus unu kow or unu danky dem outa di pen fi ker dem go drink waata pan di Sabat die? 16Wel, dis uman dah wan a Abraham daata,#13.16 Or: Abraham disendant. weh Satan wehn gat aanda bandij fi huol a eighteen yierz; so unu no tink ih rait fi kyuor im jos bikaaz tudeh dah di Sabat die?”

17Wen Jesus seh aala dis, ihn enimy dem wehn shiem, bot di res a pipl dem wehn glad fi si aal di wandaful tingz weh ihn wende du.

Di parabl bout di mostad siid ahn di iis

(Matthew 13.31-33; Mark 4.30-32)

18Den Jesus kantinyo ahn seh, “Wat wi kyan kompier God Kingdom wid? 19Dah laik wan likl mostad siid, weh wan man plaant iina ihn grong, weh gruo ahn ton wan trii. Ahn di bord dem fahn iina di ier kyan kom ahn mek dehn nes pan di lim dem.”

20Jesus seh agen, “Wat els wi kyan kompier God Kingdom wid? 21Dah laik iis weh wan uman miks wid three kop a flowa fi mek bred. Dehn ongl put wan likl bit a iis iina di flowa, bot ih stil mek di huol bred riez.”

Di wie fi get hevn dah laik deh paas chruu wan naro duo

(Matthew 7.13-14, 21-23)

22Den Jesus gaan chruu plenty big ahn smaal toun deh tiich, wail ihn wehn gwain Jerusalem. 23Pan di wie, wan man aks Jesus, “Laad, ongl likl bit a pipl gwain siev?”

Jesus ansa seh, 24“Di duo fi go iina hevn naro, so beta trai du aal weh yo kyan du fi get iin. Plenty pipl gwain trai fi go iin, bot dehn gwain kyaahn du'ih. 25Wen di uona a di hous get'op ahn lak di duo, ih gwain tuu liet. Ahn den, dem weh neva get iin, gwain deh stan op outa duo deh nak ahn deh beg, ‘Laad, uopm di duo fi wi no!’ Bot ihn gwain ansa dem seh, ‘Ah neva nuo unu, nar weh unu kom fram ataal.’

26“Den unu gwain seh, ‘Laad, wi yuuztu iit ahn drink tugeda wid yo, wen yo wende tiich mongs wi lang di ruod!’ 27Bot di uona a di hous gwain seh, ‘Ah tel unu aredy seh: Ah neva nuo unu, nar weh unu kom fram. Golang faar fahn upaa Ah deh, aala unu bad pipl!’ 28Ahn unu gwain hala, ahn grain unu tiit jos sieka di pien, wen unu si Abraham, Isaac, Jacob ahn aal di prafit dem iina God Kingdom, ahn dehn chruo unu out. 29Pipl gwain kom fahn iis ahn wes, ahn naat ahn sout, ahn gwain tek dehn plies iina di fiis iina God Kingdom. 30Ah deh tel unu: iina dat taim, som weh deh iina laas plies now, gwain get fos plies; ahn dem weh deh fos now, gwain get laas plies.”

Jesus sary fi di Jerusalem pipl dem

(Matthew 23.37-39)

31Siem taim som Pharisee seh tu Jesus, “Gwaan fahn yah, if yo waahn liv, bikaaz Herod waahn kil yo!”

32Jesus ansa seh, “Go, go tel dah faks seh tudeh ahn tumaara Ah gwain kiip deh ron out bad spirit ahn kyuor pipl; den pan di third die, Ah gwain don mi work. 33Ah hafy kiip aan gwain tudeh ahn tumaara ahn di neks die, bikaaz wan prafit neva ded outsaida Jerusalem!

34“Ai Jerusalem, Jerusalem pipl, unu weh kil di prafit dem ahn lik dong wid rak dem weh di Laad sen tu unu! Plenty taim Ah wehn waahn bring unu tugeda, laik how wan hen gyada ihn likl chikin dem aanda ihn wing, bot unu neva waahn Ah du'ih! 35Lisn! God no deh iina unu sity no muo; unu deh pan unu uon.#13.35 Or: “…unu hous don get farsiekn.” Ah deh tel unu: unu no gwain si mi agen til di taim kom wen unu seh, ‘Bles dah di Wan weh kom iina di Laad niem.’ ”

Currently Selected:

Luke 13: NTIC

Highlight

Copy