Luke 14

Jesus kyuor wan nada porsn pan di Sabat die

1Wan die, pan di Sabat, Jesus wehn gaan dah wan a di liida a di Pharisee hous fi iit. Evrybady wende dag Jesus fi si weh ihn wehn gwain du. 2Siem taim wan man kom fronta im weh wehn gat drapsy.#14.2 Drapsy dah wan siknis weh mek yo bady get swela ahn swela. 3Jesus aks di Pharisee ahn di tiicha a di Laa dem, “Wat wi Laa seh wi fi du; ih rait fi kyuor pan di Sabat die or ih no rait?”

4Bot nonbady neva ansa Jesus, so ihn toch di sik man ahn kyuor im, ahn sen im weh. 5Den ihn ton tu dem ahn aks, “If unu pikniny or unu kow drap iina wan wel, unu no gwain hory fi tek im out, iivn if dah di Sabat die?” 6Bot dehn kudn ansa im ataal.

Unu fi ombl unuself

7Wen Jesus si how di ges dem wende pik di bes plies nier di hed tiebl, ihn tel dem dis parabl: 8“If dehn invait yo dah wan wedn paaty, yo no fi ron, go sidong iina di bes siit. Supuoz dehn invait sombady els weh muo impuotant an yuu, 9ahn di porsn weh invait yo kom ahn seh tu yo, ‘Mek im sidong yahso.’ Den yo gwain fiil shiem, ahn yo gwain hafy tek di siit weh deh dah di bak! 10Bot, wen dehn invait yo, sidong dah di bak a di tiebl. Ahn den di wan weh invait yo gwain tel yo, ‘Mi fren, muuv op yahso; wan beta siit deh yah fi yo!’ Den yo gwain fiil gud, bikaaz yo gwain gat preferens fronta aal di ada ges dem, 11bikaaz enybady weh priez'op im uonself, gwain get dreg dong. Ahn enybady weh ombl ihnself, gwain get priez'op.”

12Den Jesus ton tu di man weh invait im ahn seh, “Wen yo gat wan speshal lonch or bankwet, no invait yo fren dem, nar yo breda, nar yo famaly or yo rich nieba dem; jos bikaaz dehn kyan invait yo bak dah fi dem hous, ahn so yo tink seh dah so dehn deh pie yo bak. 13Bot wen yo gat wan bankwet, invait dem weh puor ahn weh kripl, ahn dem weh liem ahn weh blain. 14Den God gwain bles yo, bikaaz yo invait dem weh kudn pie yo bak. Yo gwain get yo pie wen dem weh raichos kom bak tu laif.”

Di parabl bout di big bankwet

(Matthew 22.1-10)

15Wen wan a di man dem weh wende sidong roun di tiebl hier dis, ihn seh, “Ih dah wan blesin fi dem weh gwain iit iina di bankwet weh God gwain gat iina ihn Kingdom!” 16Jesus ansa seh, “Wan taim wan man wehn gat wan big bankwet ahn ihn sen gaan invait wan paila pipl. 17Wen evryting wehn redy, ihn sen ihn sorvant fi tel evrybady huu ihn wehn invait seh, ‘Unu kyan kom iit now; evryting redy.’ 18Bot den, aala dem staat fain aal kain a ekskyuus: Di fos wan seh, ‘Ai jos bai wan piis a lan, ahn Ah hafy go luk pan ih. So Ah beg yo fi ekskyuuz mi.’ 19Wan nada wan seh, ‘Ai wehn bai five set a kow fi plow mi lan, ahn Ah gwain trai dem out; so Ah deh beg yo fi pliiz ekskyuuz mi.’ 20Ahn wan nada wan seh, ‘Ai jos get marid, ahn Ai kyaahn kom.’

21“Di sorvant kom bak ahn tel ihn maasta weh di pipl dem wehn seh. Ihn maasta get so beks, ihn seh, ‘Mikies, go bak out pan di big ruod ahn di trak ruod dem iina di sity, ahn invait aal di puor pipl dem —dem weh kripl, dem weh liem, ahn dem weh blain.’ 22Wen di sorvant kom bak, ihn seh, ‘Saar, Ah don du aal weh yo tel mi fi du, ahn wi stil gat spies fi muo pipl.’ 23So ihn maasta seh, ‘Go out pan aal di big ruod ahn di likl trak ruod dem, ahn fuos enybady weh yo kyan fain out deh fi kom, kom ful'op mi hous.’ 24Ah deh tel unu: non a dem weh Ah wehn invait fos nat iivn gwain get wan likl ties ah weh Ah wehn fiks fi dem.”

Ho moch ih gwain kaas fi fala Jesus

(Matthew 10.37)

25Now wan paila pipl wende fala Jesus, ahn ihn ton roun ahn seh tu dem, 26“If enywan a unu kom tu mi, ahn no lov mi muo an how unu lov unu pupa ahn muma, waif ahn pikniny, breda ahn sista, dongtu unu uon laif, unu kyaahn bii mai disaipl. 27Ahn nonbady kyaahn bii mai disaipl, if ihn no wilin fi bak ihn uon kraas —pripier fi sofa— ahn fala mi. 28Sopuoz wan a unu waahn put op wan hous. Yuu no gwain sidong fos ahn figa out ho moch ih gwain kaas, fi si if unu gat nof mony fi finish'ih? 29If unu get fi put dong di foundieshan ahn kyaahn don bil'ih, evrybady gwain laaf afta unu. 30Dehn gwain seh, ‘Luk pan dah wan weh staat dat hous ahn kudn don ih!’ 31Or wish king weh waahn go waar gens wan neks king, no gwain sidong fos ahn tink if wid fi him ten thousand man ihn kuda win gens twenty thousand a dem? 32If ihn kyaahn win, ihn gwain sen mesinja ahn aks fi piis, wail di ada king stil deh faar fahn im. 33So, nonbady kyaahn bii wan a mai disaipl, if ihn no lef aal weh ihn gat fi fala mi.

Kiip unuself pyuor laik saalt

(Matthew 5.13; Mark 9.50)

34“Saalt dah wan gud ting, bot ih no gud if ih luuz ih ties; how ih gwain ties laik saalt agen? 35Saalt weh no gat non ties, no gud fi notn; ih no gud fi di grong nar fi di hiip a manyuor. So, dehn jos chruo'ih weh!”

Den Jesus seh tu dem, “Unu stap unu haad iez, ahn unu hier weh Ah deh seh.”

Currently Selected:

Luke 14: NTIC

Highlight

Copy