Luke 12

No fried fi nonbady eksep God

(Matthew 10.26-31)

1Wen di pipl bai di thousands wende pail op roun Jesus, so moch til dehn wende mash wan anada, Jesus ton roun ahn seh tu ihn disaipl dem, “Unu no fi bii hipokrit laik di Pharisee dem. Dehn two-fies wiez kyan spred mongs unu laik how iis spred iina flowa. 2Bikaaz enyting weh haid, gwain kom out weh pipl kyan si'it, ahn enyting weh kova op, aftawod evrybady gwain get fi nuo bout'ih. 3Ahn enyting weh unu seh iina di daaknis gwain kom out iina di lait. Ahn evryting weh unu taak bout iina siikrit bihain shet op duo, dehn gwain baal'ih out fahn di hous-tap dem fi evrybady kyan hier'ih.

4“Ah deh tel unu, mi fren: no fried a huu kyan kil unu bady, bikaaz afta dat dehn kyaahn du unu notn els. 5Bot Ah deh waan unu dah wada unu fi fried fah: fried fi God huu gat di powa fi kil di bady ahn den chruo unu suol iina hel. Yees, unu fi fried fi him!

6-7“Unu nuo seh five likl bord kaas two kapa chienj —haaly notn ataal, no chruut? Bot stil yet, God no farget non a dem! So unu no fried fi nonbady, bikaaz evry wan a unu wot muo tu him an wan huol flak a bord. Dongtu di amount a hier pan unu hed ihn kount!

Yo no fi shiem fi Jesus

(Matthew 10.32-33)

8“Mek Ah tel unu somting: enybady weh uon mi fronta ada pipl ahn seh ihn chros iina mi, di Son a Man gwain seh ihn uon him fronta God ienjel dem tu. 9Bot di wan weh seh ihn no nuo mi fronta ada pipl, Ai gwain seh Ah no nuo im niida fronta God ienjel dem tu.

10“Ahn enybady weh seh bad tingz gens di Son a Man kyan get paadn, bot enybady weh seh bad tingz gens di Holy Spirit ahn spail ihn niem, no gwain get paadn ataal.

11“Ahn wen dehn ker unu tu di liida dem iina di sinigag, or di ruula or ada pipl dem weh gat powa, unu no fi fret bout how unu gwain difen unuself, or weh unu gwain seh, 12bikaaz di Holy Spirit gwain tel unu weh unu hafy seh wen di taim kom.”

Di parabl bout di griidy rich man

13Den, wan man iina di kroud seh tu Jesus, “Tiicha, tel mi breda fi shier op wid mi di inheritans weh wi pupa weh ded lef.”

14Jesus seh, “Man, nonbady neva gi mi di rait fi fiks inheritans uova lan prablem bitwiin di two a unu.” 15Den ihn tel di kroud, “Main; unu watch out fi groj ahn griidinis, bikaaz dis laif dah no fi si huu kyan get muo tingz.”

16Den Jesus tel dem dis parabl: “Wan rich man grong wende prodyuus plenty. 17Ahn wan die, di man seh tu ihnself, ‘Dah weh Ah gwain du now? Ah no gat non wie weh big nof fi huol aal mi krap.’ 18Den ihn seh, ‘Aa-haah, Ah nuo weh Ah gwain du: Ah gwain brok dong mi stuor-hous ahn bil som biga wan. Den Ah gwain gat nof spies fi put mi krap ahn aal mi ada tingz. 19Afta dat Ah gwain sidong ahn seh tu miself, “Bwai, Ai tel yo; yo gat nof tingz put'op fi laas yo fi yierz tapa yierz! Now tek'ih iizy; iit ahn drink ahn injai yoself!” ’ 20Bot God seh tu im, ‘Yo fuul yo! Tinait yuu gwain ded. Den dah huu gwain injai aal demde tingz weh yo put'op fi yoself?’ ”

21Den Jesus seh tu dem, “Dis dah weh gwain hapm tu enybady weh put'op richiz fi demself pan ort, bot no pie no main tu di richiz weh kom fahn God.”

How God gwain tek kier a unu

(Matthew 6.25-34; 6.19-21)

22Den Jesus ton tu ihn disaipl dem ahn seh, “Das wai Ah deh tel unu: no fret ahn wory bout unu laif, weh unu gwain iit, nar weh unu gwain wier; 23bikaaz laif dah muo an wat wi iit ahn wat wi wier, no chruut? 24Luk pan di blak bord dem: dehn no plaant nar gyada, nar put'op fuud iina wan stuor-hous, bikaaz God fiid dem. Ahn unu wot plenty muo tu im an eny bord! 25Unu tink seh if unu wory, unu kyan ad aan wan nada owa muo pan unu laif? Nuo, sah! 26If unu kyaahn du likl tingz laik dat, den wai unu deh wory bout di res? 27Luk pan di lily graas dem how dehn gruo. Dehn niida work nar mek kluoz; bot, Ah deh tel unu: nat iivn King Solomon, wid aal ihn paila prity kluoz wehn luk gud laik dem. 28If dat dah how God dres op di graas weh deh iina di fiil, weh deh yahso tudeh, ahn weh dehn chruo iina di faiya tumaara, unu no tink seh ihn no gwain mek shuor seh unu dres op plenty beta? Wai unu gat so likl fiet, man!

29“Ahn unu no fi fret bout weh unu gwain iit or drink —jos no wory! 30Demde kain a tingz dah weh di pipl iina di worl, weh no nuo God, dehn deh ron afta. Bot unu Faada don nuo aredy weh aala unu niid. 31So put ihn Kingdom work fos iina unu laif; den unu gwain get aal demde tingz tu.

Richiz iina Hevn

(Matthew 6.19-21)

32“No fried, mi fren; alduo unu dah ongl wan likl gruup weh deh fala mi, unu Faada glad fi gi unu di Kingdom. 33Sel aal weh unu gat ahn gi di puor dem di mony, ahn unu gwain get mony bag weh no gwain wier out. Put unu richiz iina hevn weh paat ih no gwain don, ahn weh non tiif kyaahn kom nier dem ahn non wud-lais kyaahn distrai niida, 34bikaaz enywie weh paat unu richiz deh, dah rait dehso unu gwain kiip unu haat tu.

Bii redy fi wen Jesus kom bak

(Matthew 24.43, 44)

35“Tai op unu kluoz so unu wi redy fi work. Kiip unu lamp dem deh bon, 36laik di sorvant dem weh deh wiet fi dehn maasta fi kom bak fahn wan wedn paaty. So, wen ihn kom ahn nak, dehn kyan uopm di duo siem taim fi im. 37Ih gwain gud fi dem, wen di maasta fain dem redy deh wiet fi wen ihn kom bak. Ah deh tel unu: di maasta gwain put aan wan iepran ahn mek dem sidong fi iit, ahn sorv dem ihnself. 38Ih gud fi di sorvant wen dehn maasta fain dem redy, iivn if ihn kom dah migl nait or suun iina di maanin.

39“Unu andastan dis: if di uona a wan hous wehn nuo di owa wen wan tiif gwain kom, ihn no gwain mek im brok iina ihn hous. 40Jos so, unu fi aalwiez redy tu, bikaaz pahn di siem owaz weh unu no espek di Son a Man fi kom, dah dat taim ihn gwain kom bak.”

Di sensabl sorvant ahn di wan weh no fietful tu ihn maasta

(Matthew 24.45-51)

41Peter aks im, “Laad, dis parabl dah jos fi wii or fi evrybady?” 42Ahn di Laad ansa im seh, “Ah deh taak bout eny sensabl sorvant weh ihn maasta kyan chros fi put im inchaaj a di ada sorvant dem ahn mek shuor seh dehn iit dehn fuud iin taim. 43Ih gwain gud fi dah sorvant, if di maasta kom bak ahn fain im deh du di jab weh ihn lef im fi du! 44Ah deh tel unu di chruut: di maasta gwain put dah sorvant inchaaj ah aal weh ihn gat. 45Bot sopuoz di sorvant seh tu ihnself, ‘Mi maasta gwain tek wan lang taim fi kom.’ So den, ihn staat biit di ada man ahn uman sorvant dem, ahn iit, drink ahn get jronk. 46Wel, di sorvant maasta gwain kom bak pahn wan die weh ihn gwain liis espek ahn sopraiz im. Den, ihn maasta gwain gi'im wan tof ponishment: ihn gwain kot'im op iina piisiz ahn put im iina di siem plies weh paat aala dem weh no fietful deh.

47“Di sorvant weh nuo weh ihn maasta wehn waahn im fi du, ahn ihn no du'ih, gwain get plenty biitn. 48Bot di sorvant weh du somting rang, bikaaz ihn neva nuo weh ihn maasta wehn waahn ihn fi du, ongl gwain get wan likl biitn. Ahn if di Laad gi'yo plenty, ihn gwain espek bak plenty fahn yo, ahn di muo ihn gi'yo, di muo ihn gwain espek bak fahn yo tu.

Divizhan gwain deh, sieka som gwain chuuz Jesus, ahn di res a dem no

(Matthew 10.34-36)

49“Laik wan man weh lait wan big faiya pan di ort, Ah kom fi separiet di gud fahn di bad pan ih. Ahn Ah wish ih wuda wehn staat aredy.#12.49 Or di vors kuda seh: “Ah wehn kom fi chruo faiya pan di ort, ahn Ah wish ih wuda wehn staat aredy.” 50Bot Ah gat wan teribl sofarin fi go chruu fos, ahn Ah gwain deh aanda wan paila presha til'ih don. 51Unu tink seh Ai deh kom fi bring piis pan dis ort? No, sah; Ai kom fi mek pipl disaid wish said dehn gwain deh pan.#12.51 Or di vors kuda seh: “Ah no kom fi bring piis, bot wan suod.” 52Fahn now go bak, five pipl iina wan famaly gwain fait gens wan anada, three gens two ahn two gens three. 53Dehn gwain get divaid op:

Pupa gwain deh gens son,

ahn son gens pupa;

muma gens daata,

ahn daata gens muma;

madanlaa gens daatanlaa,

ahn daatanlaa gens madanlaa, ahn jos laik so.”

Andastan di taim weh wi deh iina

(Matthew 16.2-3)

54Den Jesus ton tu di kroud ahn seh, “Wen unu si seh di kloud staat set op iina di wes, unu nuo seh, ‘Ih gwain rien.’ Ahn dat dah weh hapm. 55Wen sout briiz deh bluo, unu seh, ‘Ih gwain hat laik faiya demya diez.’ Ahn dat dah weh hapm. 56Unu hipokrit! Unu nuo how fi tel di weda bai di luk a di tingz dem weh hapm pan di ort ahn iina di skai. So den, wai unu kyaahn andastan di tingz dem weh shuo weh God deh du rait now?

Fiks unu prablem wid God ahn man bifuor ih tuu liet

(Matthew 5.25-26)

57“Wai unu kyaahn fiks'op mongs unuself weh rait fahn weh rang? 58Enytaim sombady gat somting gens unu, trai fi fiks unu uon prablem pan di wie, bifuor unu get fronta di inspekta; if nat, unu maita get dreg fronta wan joj, ahn him gwain han unu uova tu di kyapm a di gyaad weh gwain ker unu dah jiel! 59Ah deh tel unu: unu no gwain kom out fahn iin dehso til unu pie bak di laas sent!”#12.59 Or: “…dongtu di laas quadrans.” Wan quadrans wot haaly notn ataal, 1/64 a dehn diely wiej iina demde diez.

Currently Selected:

Luke 12: NTIC

Highlight

Copy