Luke 11

Jesus tiich ihn disaipl dem how fi prie

(Matthew 6.9-13)

1Wan die Jesus wende prie iina wan plies. Afta ihn don prie, wan a ihn disaipl seh tu im, “Laad, tiich wi how fi prie, laik how John tiich ihn disaipl dem.”

2Jesus tel dem, “Wen unu prie, unu fi seh:

‘Faada:

Mek wi kiip yo niem huoly;

ahn mek yo Kingdom kom pan ort.

3Pliiz gi wi di fuud weh wi niid evry die,

4ahn fargiv wi sin dem,

jos laik wii fargiv evrybady

weh du wi bad tingz tu.

Ahn kiip wi weh fahn temtieshan.’ ”

Fi get God blesin kiip deh prie ahn no stap

(Matthew 7.7-11)

5Den Jesus seh tu dem, “Supuoz wan a unu gat wan fren, ahn yo go, go wiek'im op iina di migl a di nait ahn seh, ‘Breda, len mi three bred, 6bikaaz wan a mai fren fahn foor kom vizit mi ahn Ah no gat notn fi aafa im.’ 7Bot di wan iinsaid seh, ‘No bada mi, man! Ah don lak mi duo aredy, ahn mii ahn mi famaly don iina bed. Ah kyaahn get'op fi gi'yo notn.’

8“Ah deh tel unu: iivn duo ihn no get'op fi gi'im di bred bikaaz ihn dah ihn fren, if ihn kiip deh aks im uova ahn uova, ihn gwain get'op ahn gi'im weh ihn niid. 9So, dis dah weh Ah deh tel unu: kiip deh aks, ahn unu gwain get; kiip deh luk, ahn unu gwain fain; kiip deh nak pan di duo, ahn di duo wi uopm fi unu. 10Bikaaz evrybady weh aks, gwain get; dem weh luk, gwain fain weh dehn deh luk fah; ahn dem weh nak pan di duo, ih gwain uopm fi dem.

11“Pierans, wish wan a unu wi gi ihn son wan sniek, wen ihn aks fi wan fish? 12Or gwain gi'im wan skaapyan, wen ihn aks fi wan eg? 13No kya how yo bad, yo nuo seh yo wi gi gud tingz tu yo pikniny dem. So ho moch muo unu Faada iina hevn gwain gi di Holy Spirit tu dem weh aks im?”

Jesus ahn Beelzebul —di baas a di bad spirit dem

(Matthew 12.22-30; Mark 3.19b-30)

14Wan nada die, Jesus wehn ron out wan bad spirit outa wan man weh kudn taak. Az suun az di bad spirit lef im, di dom man staat taak, ahn di paila pipl weh wehn dedeh get uova sopraiz. 15Bot som a dem seh, “Dah Beelzebul gi'im powa fi ron out di bad spirit dem. Beelzebul dah di baas ah aal di bad spirit dem.”

16Ahn som ada pipl weh wehn dedeh —weh wehn waahn trap Jesus— dem kiip deh aks im fi mek wan mirakl, wan sain fahn hevn. 17Jesus nuo weh dehn wende tink, so ihn seh tu dem: “If wan set a pipl iina wan kontry fait mongs demself, dehn gwain kom tu notn. Ahn if wan famaly fait mongs demself, dah famaly gwain mash'op.#11.17 Or di vors kuda seh: “…Evry kingdom weh get divaid gens ihself ton wan dezart, ahn di hous faal pan di neks hous.” 18If Satan deh fait gens ihnself, how ihn atarity gwain get enywie? Ah seh dis bikaaz unu seh dah Beelzebul gi mi powa fi ron out di bad spirit dem. 19Ahn if dah Beelzebul deh gi mi di powa fi ron out bad spirit, den dah huu gi powa tu unu falowa dem fi ron dem out? Dem dah di siem wan dem weh gwain joj unu. 20Bot if dah God Spirit#11.20 Insida “God Spirit” iina ihn Greek teks, Luke wehn rait: “God finga,” weh dehn yuuztu yuuz fi indikiet di Holy Spirit. gi mi di powa fi ron out bad spirit, den God Kingdom don kom pan unu.

21“If wan strang man weh aarm ihnself op gud gyaad ihn uon plies, ihn nuo seh ihn tingz gwain sief. 22Bot if wan stranga man go afta im ahn atak im ahn den kanchruol im, ihn gwain tek weh aala ihn aarm dem weh ihn wehn chros iina, ahn den shier op aal ihn tingz.

23“Enybady huu no deh wid mi, deh gens mi; ahn huu no deh help mi gyada, deh skyata.”

No lef unuself uopm tu di bad spirit dem

(Matthew 12.43-45)

24“Wen wan bad spirit kom outa wan porsn, ihn go bout iina demde plies weh emty ahn drai op, deh luk fi somweh fi res. Ahn wen ihn no fain no weh, ihn seh, ‘Ah gwain rait bak weh Ah kom fram.’ 25Bot wen ihn get bak, ihn fain di plies swiip out kliin ahn fiks'op gud. 26So ihn ker seven muo bad spirit muo wosa an him, fi go wid im. Ahn aala dem kom iin ahn liv dehso. So dah porsn stie wosa an how ihn wende bifuor.”

Dah demde weh obie God Wod weh gwain bii hapy

27Siem taim wen Jesus wende seh demde tingz, wan uman hala out fahn iina di kroud, “How hapy di muma deh weh gat yo ahn tek kier a yo!” 28Bot Jesus ansa ahn seh, “Bot beta fi dem weh hapy deh hier God Wod, ahn obie ih!”

Som man waahn si wan mirakl weh shuo seh Jesus kom fahn God

(Matthew 12.38-42)

29Wen di kroud staat get biga ahn biga, Jesus seh, “Unu dah wan uova bad jinarieshan, bikaaz unu kiip deh aks fi wan sain, bot unu no gwain si non sain ataal apaat fahn weh wehn hapm tu Jonah. 30Jos laik how Jonah dah wehn wan sain tu di Nineveh pipl dem, rait so di Son a Man gwain bii wan sain fi disya jinarieshan fi shuo seh ihn kom fahn God fi priich ihn mesij. 31Di Kwiin a di Sout gwain riez'op pan Jojment Die wid unu pipl fahn disya jinarieshan ahn gwain kandem unu, bikaaz shii wehn kom fahn di en a di ort fi hier Solomon wizdom. Ahn now, wan grieta man an Solomon deh yahso. 32Jos so, di pipl dem fahn Nineveh gwain riez'op pan Jojment Die wid unu pipl fahn disya jinarieshan ahn dem tu gwain kandem unu, bikaaz dehn ton tu God wen Jonah priich. Ahn now, wan grieta man an Jonah deh yahso, bot unu no waahn hier im!

Kiip unuself kliin so evrybady wi si di lait iina unu

(Matthew 5.15; 6.22-23)

33“Nonbady no gwain lait wan lamp ahn den put'ih aanda wan baaskit or somweh els weh paat nonbady kyaahn si'ih. Insida dat dehn gwain put'ih op pan wan stan weh evrybady kyan si di lait wen dehn kom iin. 34Unu ai dah laik di lamp fi unu bady. Wen ih ongl luk pan gud tingz, den di huol a unu gwain ful'op a lait; bot wen ih ongl luk pahn bad tingz, den dah jos daaknis gwain deh kom iina unu haat. 35So mek shuor seh dah lait iina unu, ahn no daaknis. 36If unu ful'op a lait, ahn unu no gat non kain a daak spat ataal iina unu, den di huol a unu gwain lait'op, jos laik how wan brait lait deh shain pan unu.”

Som rilijos liida deh iina dienja a God raat

(Matthew 23.13-36; Mark 12.38-40)

37Afta Jesus don taak, wan Pharisee man invait im fi iit wid im. So Jesus gaan ahn sidong roun di tiebl. 38Di Pharisee man wehn sopraiz fi si seh Jesus neva wash ihn han dem bifuor ihn staat iit. 39Bot di Laad seh tu im, “Now, unu Pharisee! Unu mek shuor seh unu kliin evryting pan di outsaid weh pipl kyan si, laik unu kop ahn unu pliet, bot iina unu haat unu griidy ahn wikid! 40Unu fuul-fuul pipl! Dah no di siem wan weh mek di outsaid mek di iinsaid tu? 41Dah wen unu shier wid di pipl dem weh gat muo niid, dat dah wen unu haat riily kliin.

42“How haad unu gwain gat'ih, unu Pharisee pipl! Dah chruut unu gi God ten porsent ah aal weh unu gat, iivn dongtu di mint ahn di siiznin bush dem weh unu gat iina unu yaad, bot unu no fier wid pipl ahn unu no gat God lov iina unu haat. Wail ih gud fi gi God ihn ten porsent, unu fi pie main tu di ada impuotant tingz tu.

43“How haad unu gwain gat'ih, unu Pharisee pipl! Unu lov fi sidong iina di muos impuotant siit iina di sinigag, ahn wen unu deh waak iina di maakit plies dem, unu mek evrybady hiel unu op wid rispek.

44“How haad unu gwain gat'ih, unu Pharisee pipl! Unu jos laik di uol griev weh pipl waak pan, bikaaz dehn no nuo bout di ratnis weh deh iinsaida dem.”

45Den wan a di tiicha a di Laa ansa Jesus, “Tiicha, wen yuu seh dem kain a tingz, yo insolt wi tu, yo nuo.” 46Jesus ansa im ahn seh, “Ahn unu tiicha a di Laa, how haad unu gwain gat'ih tu! Unu put wan paila strik ruul pan pipl, weh nat iivn unu uonself kyan kiip, ahn unu neva iivn trai fi muuv wan finga fi trai help dem. 47Unu iina dienja, bikaaz unu deh bil tuum#11.47 Nuotis seh: Wan tuum dah wan plies weh dehn ber pipl; dis no siem laik di griev wen dehn ber iina di ort. fi di prafit dem, weh unu ansesta dem wehn kil! 48So unu dah laik som wiknis weh aksep weh unu pupa dem wehn du, wen dehn kil'op aal di prafit dem. Bot stil yet unu deh prity op dehn griev. 49Bot God iina ihn wizdom wehn seh, ‘Ah gwain sen prafit ahn apasl tu dem, ahn dehn gwain kil som a dem ahn ron dong di res.’ 50So den dis jinarieshan gwain hafy pie fi aal di ded prafit dem weh dehn ron dong sins di biginin a di worl, 51fahn di taim wen Cain kil Abel tu di taim wen dehn kil Zachariah bitwiin di alta ahn di huoly plies. Yees, Ah deh tel unu: disya jinarieshan gwain hafy ansa fi aala dat.

52“How haad unu gwain gat'ih, unu tiicha a di Laa, bikaaz unu tek weh di kii fi andastan God Wod. Unu uonself no aksep di chruut, ahn unu hinda dem weh waahn laan ih.”

53Den, wen Jesus gaan outa duo, di Pharisee ahn di tiicha a di Laa dehn staat pres im ahn deh trai provuok im fi taak bout plenty ting. 54Dehn wende dag im fi kech im deh seh somting outa di wie.

Currently Selected:

Luke 11: NTIC

Highlight

Copy