Luke 10

Jesus sen out som muo disaipl fi priich bout God Kingdom

1Afta dis, di Laad pik out seventy-two#10.1 Nuotis seh: Som uol taim teks seh seventy insida seventy-two. muo disaipl. Ahn ihn sen dem out two-two, fi go hed a im dah evry toun ahn plies weh ihn wehn gwain go. 2Ahn ihn tel dem seh, “Plenty grien deh fi pik, bot ongl likl bit a pipl deh fi work. So prie seh di Wan weh inchaaj a di haavis wi sen som muo pipl fi work iina ihn grong. 3Luk, Ah deh sen unu out jos laik som lam mongs di wolf dem. Unu golang now! 4Ahn no ker non mony, non travln bag, nar ekstra shuuz, ahn no iivn stap fi pie plenty atenshan tu nonbady lang di ruod.

5“Enytaim unu go iina wan hous, di fos ting unu fi seh dah, ‘God bles dis hous wid piis.’ 6If di pipl dem weh liv deh dah piisful pipl, den unu blesin gwain stie wid dem, bot if dehn no piisful, di blesin gwain kom bak tu unu. 7Ongl stie dah wan hous, ahn iit ahn drink enyting weh dehn gi unu, bikaaz wan workin man shuda get ihn pie. Ahn no deh go fahn hous tu hous.

8“Enytaim unu go iina wan toun ahn di pipl dehn aksep unu, iit weh dehn gi unu. 9Ahn if enybady dedeh weh sik, kyuor dem; ahn tel di pipl dem, ‘Now dah di taim wen unu kyan bii paat a God Kingdom.’ 10Bot enytaim unu go iina wan toun ahn di pipl dem no waahn unu deh, unu go out pan di ruod ahn seh tu dem, 11‘Wi iivn deh waip di dos a unu toun fahn aafa wi fut batam fi shuo seh unu iina dienja. Bot nuo dis: God Kingdom deh nier ahn unu kuda bii paat a ih, bot unu no waahn.’ 12Ah deh tel unu: wen Jojment Die kom, di pipl dem fahn Sodom gwain gat'ih muo iiziya an fi di pipl dem fahn daty toun.

Di pipl dem fahn Chorazin ahn Bethsaida iina dienja fahn God raat

(Matthew 11.20-24)

13“Main, unu pipl fahn Chorazin ahn Bethsaida, bikaaz if dehn wikid pipl fahn Tyre ahn Sidon wuda si di mirakl dem weh unu deh si, dehn wuda ripent fahn lang taim fahn dehn sin. Dehn wuda dres iina krokos bag ahn sidong iina ashis fi shuo how sary dehn sary. 14So ih gwain bii muo iiziya fi di pipl dem fahn Tyre ahn Sidon an fi unu pan Jojment Die! 15Ahn unu pipl dah Capernaum, unu tink seh God gwain ker unu op dah hevn? Nuo, sah! Unu gwain dong dah Hades!”#10.15 Nuotis seh: Hades dah di plies weh dehn kaal “Hel” tu.

16Den ihn tel di disaipl dem, “Enybady weh hier unu, hier mi tu. Bot if dehn rijek unu, den dehn rijek mii tu. Ahn enybady weh rijek mi, rijek di wan weh sen mii.”

Di seventy-two disaipl kom bak fahn dehn priichin trip

17Wen di seventy-two disaipl dem kom bak, dehn wehn glad, ahn dehn seh, “Laad, dongtu di bad spirit dem obie wi, wen wi kaal yo niem!”

18Jesus tel dem seh, “Yees, Ah si Satan drap laik laitnin fahn hevn. 19Yo si, Ah gi unu atarity fi uova-kom di powa a di enimy. Unu gwain waak pan sniek or skaapyan, ahn dehn no gwain du unu notn. 20So, no get glad seh bad spirit pie unu main; beta unu glad seh unu niem don rait dong iina hevn!”

Jesus rijais

(Matthew 11.25-27; 13.16, 17)

21Siem taim, Jesus get ful'op wid jai fahn di Holy Spirit ahn ihn seh, “Ah tank yuu, Faada, Laad iina hevn ahn pahn ort, bikaaz yo kiip di chruut bout di Kingdom fahn di pipl dem weh tink seh dehn waiz ahn dem weh seh dehn nuo bout demya tingz, bot yo shuo dem tu di aadinary pipl. Yees Faada, bikaaz yo wehn glad fi du'ih dis wie.”

22Den ihn tel ihn disaipl dem, “Mi Faada gi mi atarity uova evryting. Nonbady riily nuo di Son eksep di Faada, ahn nonbady riily nuo di Faada eksep di Son, ahn enybady els weh di Son waahn fi nuo im.”

23Den Jesus ton roun weh ongl ihn disaipl dem kuda hier, ahn ihn seh, “How gud fi enybady weh si weh unu si; dehn riily bles. 24Bikaaz Ah deh tel unu: plenty prafit ahn king dehn wehn waahn get fi si weh unu deh si, bot dehn neva si'it; ahn wehn waahn hier weh unu deh hier, bot dehn neva get fi hier'ih.”

Di parabl bout di gud man fahn Samaria

(Matthew 19.16-21; 22.35-40; Mark 10.17-21)

25Wan taim wan tiicha a di Laa get'op ahn aks Jesus wan kwestyan fi trai im out; ahn ihn seh, “Tiicha, dah weh Ah hafy du fi liv fareva?”

26Jesus ansa ahn seh, “Dah weh rait iina di Laa? Dah weh yuu riid iin deh?”

27Di man ansa, “Wi fi lov God wid aal wi haat, wid aal wi suol, wid aal wi strent ahn wid aal wi main; ahn wi fi lov wi nieba dem laik wi lov wiself.”

28Jesus seh, “Yo rait man, du dis ahn yuu wi liv fareva.”

29Bot di man neva satisfai, ahn ihn wehn waahn gat di rait uova Jesus, so ihn aks im, “Ahn huu egzakly dah mi nieba?”

30Jesus ansa seh, “Wan taim wan man wehn gaan dong fahn Jerusalem tu Jericho ahn som tiif atak im. Dem tiif ihn kluoz, biit'im op ahn lef im haaf ded. 31Now ih hapm seh wan priis gaan dong chruu di siem ruod, si di man, ahn paas pan di ada said! 32Aftawod wan Levite#10.32 Nuotis seh: Di Levite dah wehn wan a di ada rilijos man dem weh yuuztu work iina di Templ tu; dehn ansesta dah wehn Levi, Moses breda. man paas chruu di siem plies ahn si di man, bot ihn paas pan di ada said tu. 33Bot wan Samaritan man, huu wende travl chruu deh, bok'op pahn di man, ahn wen ihn si'im, ihn get sary fi him. 34So, ihn gaan op tu di man, ahn dres ihn suor dem wid ail ahn wain. Den ihn put im op pan ihn uon animal, ker im tu wan hous weh ihn rent wan ruum ahn tek kier a im. 35Di neks maanin ihn gi di hous uona two silva chienj ahn seh, ‘Tek kier a im, ahn if ih no nof, wen Ah kom bak, Ah wi pie yo eny ekstra mony yo spen pan im.’ ”

36Den Jesus aks di tiicha a di Laa seh, “Outa di three a dem, huu yuu tink ak laik wan nieba tu di man weh di tiif dem biit'op?”

37Di tiicha a di Laa seh, “Di wan weh wehn fiil sary fi im ahn help im.” So Jesus tel im, “Wel now, yuu go ahn du di siem ting.”

Jesus gaan dah Martha ahn Mary dehn hous

38Wail Jesus ahn ihn disaipl dem wende travl, dehn paas chruu wan toun weh wan uman niem Martha risiiv dem iina ihn hous. 39Martha sista —weh niem Mary— gaan ahn sidong fronta di Laad bai ihn fut dem fi hier weh ihn wende seh. 40Bot Martha wehn gat tuu moch tingz fi du fi di ges dem, so ihn gaan tu Jesus ahn aks im, “Laad, yo no kier seh mi sista lef mi fi du aal di work bai miself? Pliiz tel im fi help mi!”

41Di Laad ansa im ahn seh, “Martha, Martha, yo deh wory yoself ahn get beks uova plenty ting, 42bot ongl wan ting yo niid fi du. Mary chuuz di bes wan ahn nonbady kyaahn tek'ih weh fahn im.”

Currently Selected:

Luke 10: NTIC

Highlight

Copy