Joroma 1

Amot

1Baluwa kowok kibut Paulo ngatic ka Yesu Kirisito, ngat kame kolwongo pi bedo ngaor, di oko poke pi tuco ejiri ka Rubanga.

2Bin Rubanga ocikere i dog inabin mege i iwandik kacil pi mino ejiri noni, 3en ejiri kame mako kop i kom Wode, kame obedo akwar Daudi i anywali me kom. 4I kom kop kame mako en bedo dano kacil kowok kibut Rubanga, konyute kede twon twer be en Wot ka Rubanga pi yaruno mere ki to. 5Ango atieko udo kisa kede or ka Rubanga di beo kibute, pi mino atekerin dedede bedo kede wor pi yei nyinge. 6Man ribo kiton wuda jo kame kolwongo wu pi doko jo ka Yesu Kirisito.

7Butun jo dedede kame Rubanga maro, wun jo kame itienu Roma, jo kame kolwongo pi bedo jokacil, wek Rubanga Papa kede Rwot wa Yesu Kirisito mi wu kisa kede mulem.

Ilega me pwoc

8Ango ageo ber pwono Rubanga na i Yesu Kirisito pi wun dedede, pien jo tie tatamo kop me yei wu i piny lung. 9Rubanga, ngat kame ango atio ne kede cunya lung di atuco ejiri ka Wode, en kame obedo mujura na be, ango nakanaka ayutuno wu i ilega na. 10Akwao abongo keng be, ka twerere, wek Rubanga nan do mia akaruno bino butu pi mit mere. 11Pien cunya paro neno wu me wek ami wu iudunu giamia mogo me cuny, pi mino yei wu doko tek. 12Dwong mere be, wan otwerunu udo teko me cuny ki yei wa wan kenwa kenwa, ki meru kede ki mera da.

13 # Tice 19.21 Imiegu kede amiegu na, amito ingeunu be, tien atot cunya obedo mito bino butu tetekeny alok cuny jo i diere wu bala kame atimo kede i dier jo icegun kalikame Iyudayan (do tuno nan tie gikame genga). 14Pien atie kede banya, but Jogurik kede but jo kame tie kede tim me asonya, but jo kame riek kede but jo kame ming. 15Pi mano, cunya mito tuco ne wuda ejiri, wun jo kame ibedunu Roma.

Twer me Ejiri

16 # Marako 8.38 Ango lewic likame maka pi ejiri; en ebedo twer kame Rubanga lako kede jo dedede kame tie kede yei, me agege twer me alako but Iyudayan, kede da but Jogurik. 17#Abakuk 2.4Pien ejiri nyuto kite kame Rubanga mio dano doko kede ngat kopoore, en egere kede yei eko jik da kede yei; bala kame kowandiko kede be, “Ngat kame opoore pi yei bino kuo.”

Raco ka Dano

18Pien lilo ka Rubanga onyutere di yai ki malo bino piny i kom jo dedede kalikame woro Rubanga, kede kame timo tim areco, kame i tim gi areco nogo, kigengo jo ngeno ateni i kom Rubanga. 19Pi gikame karuno ngere i kom Rubanga tie ne gi kakaler, pien Rubanga otieko nyuto ne gi. 20Cako Rubanga cweno piny, epone mere kalikame neeno, en twer mere kame bedo nakanaka, kede epone me kuo mere bala Rubanga, otieko ngere i jame kame en ecweo. Pi mano, gin likame kitie kede kacungo me pido; 21#Joepeso 4.17-18pien akadi bed bala oudo kingeo Rubanga, do likame kiko wore bala Rubanga, akadi mine pwoc da. Do par gi oko doko gikame kony mere li, kede wi gi kalikame tamo oko umere odoko col. 22Gin oudo kitero be gin jorieko, do kiko doko jomingo, 23#Iswilia 4.16-18di kiko seso deyo ka Rubanga kalikame to kede cal me dano kame to, kede me winy, kede me leini, kede me gikame liao alia.

24Pi mano, Rubanga oko jalo gi i mit kareco me cuny gi, i timo caro kede bedo abongo wor i kom gi ken gi i diere gi. 25Etimo kaman pien gin kiseso ateni i kom Rubanga kede gi me angalo, di kiko donyo woro kede tic ne giacwea akaka Ngacwec, en ngat kame jo poore pako ikar kede ikar! Amen.

26Pi mano, Rubanga oko jalo gi i mit me lewic. Mon gi oloko ekite gi me anywali me mito cuo oko doko do ekite kalikame anywali ka dano me mito buto kede mon wad gi. 27Iepone nono da, cuo oweko ekite gi me anywali me mito mon, di kiko bedo kede mit aliet i kom gin ken gi. Cuo timo gi me lewic kede cuo wad gi, di kiko udo adwokini me tim gi areco nogo i kom gi.

28Do bala kite kalikame kineno kede be epoore pi keto Rubanga i tam gi, omio Rubanga oko jalo gi i tam otop kede i tim gi kalikame opoore. 29Gin oudo kipong kede epone me tim areco dedede, raco, paro jame me jo, kede tam areco i kom jo. Oudo kipong kede nyeko, nek, lok, angalo, cuny acol, kede akwot, 30di kidubo nying jowot gi, kidagi Rubanga, kinywaro jo, kitingere ken gi, kiwakere, ki iiko tam me timo tice areco, kede di likame kiworo jonywal gi. 31Kimiming, kili kede yei, kili kede amara kede cuny me kisa. 32Akadi bed bala kingeo iswil ka Rubanga kame waco be jo kame timo akodi gi nogi poore to, gin kimeede ameda timo gi nogi, doko da kipwoyo jo apat kame timo gi nogi.

Currently Selected:

Joroma 1: BILK13

Highlight

Copy