Joroma KOP KAME NYUTO
KOP KAME NYUTO
Bin Paulo owandiko baluwa but Joroma pi mino gi iikere pi iik mere me welao ekodet me jokirisito i kuno. Oudo iik mere tie pi timo tic i dier jokirisito me kuno pi kare moro, di do eko meede ot Sipania pi kony kame kimie. Bin en ewandiko baluwa noni pi niango jo ekite kame en eniang kede yei me jokirisito, kede gikame yei nono nyuto ne jokirisito timo i kuo gi. Itabu noni tie kede kope dedede kame Paulo bin omio.
Ingei en moto jo me ekodet me jokirisito i Roma, kede ingei en tatamo ne gi kop i kom ilega mere pirgi, Paulo oko mino cuny kop me baluwa noni be, “Ejiri nyuto epone kame Rubanga mio jo doko kede jo opoore i nyime: en egere kede yei di eko da jiko kede yei” (1.17).
Paulo di oko meede gero cuny kop noni. Jo dedede, Iyudayan kede jo kalikame Iyudayan, poore doko jo kame opoore i nyim Rubanga, pien gin dedede kitie i twer me dub. Jo bedo jo kame opoore i nyim Rubanga pi yei Yesu Kirisito. Kame lubo mere, Paulo nyuto ekite me kuo anyen i Kirisito, kame wok ki awotin anyen noni kede Rubanga. Dano koyei Kirisito tie kede anapakin kede Rubanga, doko Tipo ka Rubanga gonye ki twer me dub kede me to. I isulai me 5-8, Paulo doko da yamo kop i kom tic me iswil ka Rubanga kede twer me Tipo ka Rubanga i kuo me ngat koyei Kirisito. Di do en eko cane tatamo ekite kame Iyudayan kede jo kalikame Iyudayan bedo tie kede i iik ka Rubanga pi jo. En ejiko di ewaco be, Iyudayan odagi Yesu di lubere kede iik ka Rubanga pi kelo jo dedede tuno i kisa mere i Yesu Kirisito, doko en eyei be Iyudayan likame bino dagi Yesu nakanaka. Me ajikini mere Paulo owandiko kop i kom epone kame kuo me ngakirisito poore bedo kede, singo twatwal epone me bedo kede amara but jo icegun. En eyamo kope kame mako tic ne Rubanga, gikame ngakirisito poore timo ne apugan me piny gi kede ne jo icegun, kede kop i kom ngec me cuny jo. En ejiko baluwa noni kede kope mege kame make, kede da kope me pako Rubanga.
Wi Kope kame tie i Baluwa noni
Kope kame nyuto kede cuny kop kame tie iye 1.1-17
Gikame mio alako mitere 1.18—3.20
Epone kame Rubanga lako kede jo 3.21—4.25
Kuo anyen i Kirisito 5.1—8.39
Isirael i iik ka Rubanga 9.1—11.36
Epone me bedo me jokirisito 12.1—15.13
Kope kame cego kede amot 15.14—16.27
Currently Selected:
Joroma KOP KAME NYUTO: BILK13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.