Popular Bible Verses from Joroma 1

Share

Ango lewic likame maka pi ejiri; en ebedo twer kame Rubanga lako kede jo dedede kame tie kede yei, me agege twer me alako but Iyudayan, kede da but Jogurik.

Pien ejiri nyuto kite kame Rubanga mio dano doko kede ngat kopoore, en egere kede yei eko jik da kede yei; bala kame kowandiko kede be, “Ngat kame opoore pi yei bino kuo.”

Cako Rubanga cweno piny, epone mere kalikame neeno, en twer mere kame bedo nakanaka, kede epone me kuo mere bala Rubanga, otieko ngere i jame kame en ecweo. Pi mano, gin likame kitie kede kacungo me pido

pien akadi bed bala oudo kingeo Rubanga, do likame kiko wore bala Rubanga, akadi mine pwoc da. Do par gi oko doko gikame kony mere li, kede wi gi kalikame tamo oko umere odoko col.

Etimo kaman pien gin kiseso ateni i kom Rubanga kede gi me angalo, di kiko donyo woro kede tic ne giacwea akaka Ngacwec, en ngat kame jo poore pako ikar kede ikar! Amen.

Pien lilo ka Rubanga onyutere di yai ki malo bino piny i kom jo dedede kalikame woro Rubanga, kede kame timo tim areco, kame i tim gi areco nogo, kigengo jo ngeno ateni i kom Rubanga.

Pi mano, Rubanga oko jalo gi i mit me lewic. Mon gi oloko ekite gi me anywali me mito cuo oko doko do ekite kalikame anywali ka dano me mito buto kede mon wad gi. Iepone nono da, cuo oweko ekite gi me anywali me mito mon, di kiko bedo kede mit aliet i kom gin ken gi. Cuo timo gi me lewic kede cuo wad gi, di kiko udo adwokini me tim gi areco nogo i kom gi. Do bala kite kalikame kineno kede be epoore pi keto Rubanga i tam gi, omio Rubanga oko jalo gi i tam otop kede i tim gi kalikame opoore.

Gin oudo kitero be gin jorieko, do kiko doko jomingo, di kiko seso deyo ka Rubanga kalikame to kede cal me dano kame to, kede me winy, kede me leini, kede me gikame liao alia.