Tice 26

Paulo Opido i nyim Aguripa

1Aguripa oko waco ne Paulo be, “Nan koyei ni yamo piri keni.” Paulo oko rieno cinge di eko pido kaman:

2“Ango aparo be man obedo winyo na me pido i nyimi, in Abaka Aguripa, i kom kope dedede kame Iyudayan opida iye. 3Pien in iniang kiber itok kede piem mogo kame Iyudayan tie kede. Pi mano, ango akwai idire iwiny pido na.

4“Iyudayan dedede ngeo epone me kuo nango, cako i tino na, ekite kame abedo kede i dier jo me ateker na kede i Yerusalem cako ki agege. 5#Tice 23.6; Jopilipi 3.5Ka cabo kiyei tuco, gin kibedo ngeno pi kare alac epone kame ango abedo kede bala Ngaparisayo, kame obedo ajange me edini wa kame lubo iswilia wa odocon. 6Nan ango acungo kan di kopida pi gen i kom cikere kame bin Rubanga omio but joakwari wa, 7kame atekerin wa tomon kiwie are tie kede gen me udo, di kiketo cuny gi woro Rubanga iwor kede iceng. Okwe abaka, gen noni en kame Iyudayan tie pida iye. 8Pinyo kara komio wun likame iyeunu be Rubanga yaruno jo oto?

9 # Tice 8.3; 22.4-5 “Ango da kikoma oudo ayei kiber be miero atim gi dedede pi yi pi gengo nying Yesu me Nasaret. 10Doko da ako timo kamanono i Yerusalem. Jodongo me josaseredoti bin omia twer di ako rwako jo kame yei Kirisito i otkol; doko i kare kame koneko gi kede, ango da oudo agango tam nono. 11Oudo abedo mino gi alola dikdik i sinagogan dedede di atamo dino gi tetek pi bedo kede acae i nying Yesu. Kite kame oudo ango ager kede gi, omio oudo awapo gi kiton i bomban me obukui pi ot tidilo gi.

Paulo Otatamo epone me Lokere mere

(Tice 9.1-19; 22.6-16)

12“Kop nono en komio oudo jodongo me josaseredoti oora Damasiko kede akarunikin. 13Adwong abaka, kakame oudo atie kede i egudo i dier iceng, ako neno asara kame oudo rieny kalamo ceng di wok ki malo, di etie cara luka karacel kede jo kame oudo upere keda. 14Kakame wan dedede otieko popoto kede piny, ako winyo dwan moro di penya kede leb Eburania be, ‘Saulo, Saulo, pinyo komio in itie tidilo ango? Iudo lito kame igwere bala diang kame gweo ebela.’ 15Ango ako penyere be, ‘In ngai Rwot?’ Di Rwot oko waco be, ‘Ango en Yesu kame in itie tidilo. 16Do yai icungi, pien ango anyutere buti pi yeri bedo ngatic na. Ibino mino ijura i kom gikame otimere, gikame in inena kiye, kede i ace kame abino nyutere kede buti. 17Ango abino laki ki cing jo me Isirael kede ki cing jo kalikame Iyudayan, jo kame ango atie oori but gi 18pi yabo wang gi, me wek kilokere tenge ki colo kiko dok i lero, kede ki twer ka Sitani kiko dok but Rubanga. Man bino mino kiudo isasir ki dub kede da kiko udo kabedo i dier jo kolonyere pien kiyei ango.’

Paulo Otatamo Kop i kom Tic mere

19“Pi mano, Abaka Aguripa, ango likame ako dagi lubo kop me gianyuta kowok ki malo. 20#Tice 9.20, 28-29Do ako cako tero kop ne jo me Damasiko, di do ako tero ne jo me Yerusalem, tuno kede i piny me Yudea dedede, kede da but jo kalikame Iyudayan. Oudo awaco ne gi be miero kiswilaro di kiko lokere but Rubanga, di kiko cako timo tice kame nyuto be kitieko swilaro. 21Kop noni en komio Iyudayan omaka i tempulo di kiko mito neka. 22Cako i kare nono tuno tin, ango Rubanga en kame konya, pi mano, ango acungo kan di amio ijura but jo atino kede jo kame koworo. Likame tie kop moro apat kame ango awaco ne gi, do kwanyo gikame inabin kede Musa bin owaco be bino timere. 23#Isaya 42.6; 49.6; 1 Jokorinti 15.20Gin oudo kiwaco be Kirisito miero bei i can, kede be, kite kame en ebedo kede dano me agege me yaruno kikom jo oto, ebino pwonyo kop me lero ne Iyudayan kede ne jo kalikame Iyudayan.”

24Kakame Paulo opido kede kamano, Pesito oko waco kede dwan amalo be, “Paulo, in ipoi; isoma atek tie mini idoko amang.”

25Do Paulo oko dwoko ne be, “Adwong kame koworo Pesito, ango likame apoi, do ango atie yamo kop me ateni. 26Abaka ngeo gigi dedede, doko ango ayamo kede en abongo lworo moro; pien ango angeo kiber be en likame ebwot ngeno gi nogi, pien likame kopwono kede timo gi. 27Abaka Aguripa, mam in iyei kop me inabin? Ango angeo be in iyei.”

28Aguripa oko waco ne Paulo be, “In kom iparo be itwero lokango adoko ngakirisito i kare acecek ni!”

29Paulo oko waco be, “Akadi pi kare acecek arabo abor, ango akwao Rubanga be, koto likame in kenekene, do koto jo dedede da kame tin tie winyo kop na odoko bala ango, do likame i epingo.”

30Di do abaka oko yai malo karacel kede ngapug adwong, kede Berenike kede jo kame oudo tie bedo kede gi. 31Kakame kitieko yai kede malo, kiko donyo yamo ken gi ken gi be, “Icuo ni likame tie timo gimoro kame poore mino koneke, arabo kotwee i otkol.” 32Di Aguripa oko waco ne Pesito be, “Oudo icuo ni poore agonya ki otkol ka koto oudo likame ejuro pido mere but Kaisari.”

Currently Selected:

Tice 26: BILK13

Highlight

Copy