Tice 25

Paulo Ojuro Pido but Kaisari

1Kakame Pesito otuno kede i adul mere kame epugo, en eko tieko ceng adek di do eko yai ki Sisiria eoto Yerusalem. 2Jodongo me josaseredoti karacel kede joadongo me Iyudayan oko tatamo ne raco ka Paulo, di kiko kwano cunye 3pi timo ne gi bero, emi ter Paulo Yerusalem do di gin oudo kitieko iikere pi ot kine i yongayo pi neke. 4Do Pesito oko dwoko ne gi be kotie gwoko Paulo i otkol i Sisiria, doko eda kikome etie mito ot kuno i kare iyapiyapi. 5En eko waco be, “Pi mano, wek joadongo wu upere keda kuno, di gin kiko pide, ka tie gimoro arac i kome.”

6Ingei bedo kede gi pi kare kalikame kalamo bala ceng kanyauni arabo tomon, Pesito oko yai eoto Sisiria. Oru mere en eko bedo i kom mere me ngolo kop, di eko ciko be kel Paulo. 7Kakame Paulo otuno kede, Iyudayan kame bin owok ki Yerusalem oko cungo oluke, di kiko cako kelo pido mogo atot adongodongo i kome, pido kalikame kitwero nyuto ateni gi. 8Paulo oko pido be, “Ango likame aturo Iswil me Iyudayan arabo timo raco moro i tempulo amoto ne Kaisari akadi acel.”

9Do pien Pesito oudo mito timo bero ne Iyudayan, omio en eko penyo Paulo be, “In imito be teri ot pidi i kope nogi i nyima i Yerusalem?”

10Do Paulo oko dwoko be, “Ango atie cungo i nyim kom me ngolo kop ka Kaisari, kakame kopoore pida iye; doko da in kikomi ingeo kiber be ango gira likame atimo ne Iyudayan gimoro arac. 11Aso, ka ango abedo ngat arac di atimo gimoro arac kame poore mino koneka, ango likame ayaro mito be abwot ki to; do ka gikame kitie pida iye tiene li, likame tie ngatamoro kame tie kede twer me jala i cing gi. Ango ajuro pido na but Kaisari.”

12Ingei winyere kede kansulo mere, Pesito oko dwoko ne Paulo be, “In ijuro pido ni be ter but Kaisari; ibino ot but Kaisari.”

Kotero Paulo i nyim Aguripa kede Berenike

13Ingei ceng mogo, Abaka Aguripa kede Berenike oko bino Sisiria pi gamo Pesito. 14Di kitieko ceng atot kuno, Pesito oko tero kop kame kopido iye Paulo i nyim abaka di ewaco be, “Tie icuo kame Pelik oweko i otkol. 15I kare kame ango oudo atie kede Yerusalem, jodongo me josaseredoti karacel kede joadongo me Iyudayan oko mina ngec i kom kop mere, di kikwao be ngol ne kop. 16Do ango ako dwoko ne gi be, likame obedo ekite me Joroma pi jalo ngatamoro i cing jo di pwodi likame eriamakin kede jo kame tie pide wang i wang, me wek eda eud kare me pido i kom kope kame kopide iye. 17Pi mano, kakame gin kicokere kede kan, ango likame ako gal, do oru mere ango ako bedo i kom na me ngolo kop, di ako ciko be kel icuo nono. 18Kakame jo kame oudo pide oyai kede malo, likame kiko kelo pido moro arac i kome bala kite kame ango audo aparo be romo timere kede. 19Do gin oudo kitie kede kope mogo kame kipiemo iye i kom edini gi, kede i kom icuo moro kame nyinge Yesu kame bin oto, do Paulo yamo be ekuo. 20Wia oko cungo epone kame amoi kede tien kop noni, omio ango ako penye ka oudo emito ot Yerusalem me wek ot pide ki kuno pi kope nogo. 21Do kakame Paulo okwao kede be ber gwoke i otkol di kodaro kede kite kame ngapug adwong bino ngolo kede kop nono, ango di do ako ciko be ber gwoke tuno kede ka ango acwae but Kaisari.”

22Aguripa oko waco ne Pesito be, “Ango kikoma amito winyo yamo me icuo nono.”

Pesito oko dwoko ne be, “Ibino winyo yamo mere diki.”

23Oru mere Aguripa kede Berenike oko bino kede angosibib adwong, kiko donyo i ot me winyo kop, di kiupere kede jodongo me isirikalen karacel kede jo kame koworo i bomba. Pesito oko mino kokelo Paulo kanono, 24di eko waco be, “Abaka Aguripa karacel kede jo dedede kame tie kede wa kan, inenunu icuo kame Iyudayan dedede obako dog gi buta pire i Yerusalem kede i kan da, di kilelemo be kuo mere poore jiki. 25Do ango ako udo be likame etimo gimoro arac kame romo mino koneke. Aso kite kame en kikome eko juro kede pido mere but ngapug adwong, omio ango ako cwane. 26Do ango likame atie kede kop moro kibecokina i kom icuo noni, kame aromo wandiko ne ngadwong na. Pi mano, ango akele i nyimu, do singo twatwal i nyim in Abaka Aguripa, me tetekeny ka wan otieko pepenyo en, ango aromo udo kop moro kame make kame abino wandiko. 27Pien kibuta, eneeno gikame kony mere li pi cwano mabus i nyim ngapug adwong abongo nyuto gikame kopide iye.”

Currently Selected:

Tice 25: BILK13

Highlight

Copy