Tice 24

Kopido Paulo

1Di ceng okato kany, Anania kame oudo obedo Ngatel Josaseredoti oko bino kede joadongo mogo me piny, karacel kede won iswil kame nyinge Teretulo. Di kiko mino kop kame kipido kede Paulo i nyim ngapug. 2Kakame kolwongo kede Paulo i nyim ngapug, Teretulo oko cako pide kaman:

“Adwong me awora Pelik, wan otie kede mulem adwong pi in, doko in en kame imio kokelo alokaloka abeco i piny wa kan. 3Wan otieko gamo gi nogi kede pwoc adwong i yore dedede kede i kabedo dedede. 4Do di likame ameede dubo kare ni, akwai itim mwol iwiny kwac wa pi esawa moro atitidi. 5Wan otieko udo be icuo ni tie kede elol, doko tic mere en cako arubaruba i dier Iyudayan i piny lung. En ebedo ngatel me ekodet moro me jo me Nasaret. 6En etamo munao tempulo da, do wan oko make, 7(do Lusia, kame obedo ngadwong kame lo isirikalen dedede oko bino kede gero adwong, di eko mane ki cing wan, di ewaco ne jo kame oudo pide pi bino buti.) 8Ida i komi ka ipepenyo en, ibino niang kibute gi dedede kame wan otie pide iye.”

9Iyudayan oko donyo i pido nono di kimoko be kope nogo tie kamanono.

Pido ka Paulo i nyim Pelik

10Kakame ngapug oporo kop kede cinge ne Paulo be egei yamo, Paulo oko waco kaman:

“Kite kame ango angeo kede be in itieko bedo ngangolkop i piny wa kan pi mwakini atot, ango ayaro nan pido di atie kede yomcuny. 11Bala kite kame ida ibino udo kede ateni mere, pwodi likame ceng tomon kiwie are okato cako i ceng kame ango aoto kede Yerusalem pi woro Rubanga, 12di likame gin kiko wuda di atie piem kede ngatamoro arabo supo ekodet moro i tempulo arabo i sinagoga, amotoko i bomba. 13Doko da likame kitwero nyuto ni be, gikame gin kipida iye tie me ateni. 14Do ango ayei i nyimi be, ango aworo Rubanga ka joakwari wa di alubo Yongayo kame gin kitero be obedo ajange moro, doko ango ayei gi dedede kame tie i Iswil arabo kame inabin owandiko. 15Atie kede gen i kom Rubanga, kame gida nogi ikom gi kiyei, be yaruno me jo opoore kede kalikame opoore bino bedo tie. 16En komio ango nakanaka atamakino kede teko na dedede pi neno i cunya be, ali kede raco moro i nyim Rubanga kede i nyim jo da.

17 # Tice 21.17-28 “Aso, ingei mwakini mogo ango nan ako bino pi kelo ne ateker na kony mogo kede kelo giamia na me woro Rubanga. 18Kakame ango oudo atie timo kede gini, gin kiko wuda i tempulo di atieko lonyere abongo ekodet moro arabo woo. Do Iyudayan mogo kame oyai ki Esia da oudo tie kuno; 19oudo koto gida kipoore bino i nyimi kan di kiko pida ka kitie kede kop moro i koma. 20Aso ka li, wek jogi ikom gi wac tim arac kame gin kiudo i koma i kare kame ango acungo kede i nyim kansulo, 21#Tice 23.6kwanyo kenekene gikame ango bin awaco di acungo i diere gi be, ‘Tin kotie pida i nyimu kan pi kop kame mako yaruno me jo oto.’ ”

22Do pi kite kame Pelik oudo tie kede ngec odocon i kom Yongayo nono, omio en eko ber peruno gi di ewaco ne gi be, “Ango ayaro ngolo kop wu noni ka Lusia ngadwong kame lo isirikalen dedede obino.” 23Di en eko ciko ngadwong me isirikalen be gwok Paulo, do di koweko ne kare moro me alakanar, doko kur geng ngawote moro mine kony.

Paulo i nyim Pelik kede Durusila

24Ingei ceng mogo, Pelik oko bino kede dako mere Durusila, kame oudo obedo Ayudayat. En eko cwano kolwongo Paulo obino bute, di kiko donyo winyo kop kame epwonyo i kom yei Yesu Kirisito. 25Kakame Paulo otatamo kede kop kame mako ngolo kop me ateni, dino mit me kom, kede ngolo kop me ajikini waru, lworo oko mako Pelik di eko waco ne Paulo be, “Ber kong ot tenge, ka audo kare abino bobo lwongi.” 26Bobo da Pelik oudo tie kede gen be Paulo romo mine sente moro, omio en eko donyo lwongo Paulo bute dikdik di kinywako yamo.

27Do ingei mwakini are, Porukio Pesito oko lunyo wang Pelik; do pi mito yomo cuny Iyudayan, Pelik oko weko Paulo odong i otkol.

Currently Selected:

Tice 24: BILK13

Highlight

Copy