Tice 27

Kotero Paulo Roma

1Kakame komoko kede be wan poore okwang ooti Itali, oko mino Paulo kede mabus ace i cing ngadwong me isirikalen me ekodet ka Agusito, kame oudo nyinge Julias. 2Wan oko donyo i emeri moro me Aduramatio, kame oudo oyaro ot tuno i idoketa me Esia. Wan oko kwang oupere kede Arisitaku kame obedo dano me Makedonia, kame oudo wok ki Tesalonika. 3Oru mere oko tuno Sidon. Julias oko timo Paulo ber, en eko weke eoto but jowote pi gin gwoke. 4Oko yai ki kuno, do pi kite kame oudo yamo buko kede wok ki nyim wa, wan oko kwang oririo ki nget cula me Sipuro pi dapo yamo. 5Kakame okwango kede di oko ngolo nam ki nget Kilikia kede Pampulia, oko tuno Mura kame tie i piny me Lisia. 6Ki kuno, ngadwong me isirikalen oko udo Emeri moro kame bin owok ki Alekesanderia di eoto Itali, en eko rwako wa iye.

7Di oko kwang momot pi ceng atot, oko tuno Kinido peko peko. Kite kame yamo oudo likame yei ne wa meede kede ot, omio oko kwang oririo Kurete di odapo Salamone pi lworo yamo. 8Oririo kane kede peko adwong di oko tuno kabedo kame kolwongo be Edoket Aber, kame oudo iyapiyapi kede bomba me Lasea.

9Bala kite kame oudo otieko tero kede kare alac, doko oudo beo ki nam otieko doko rac, pien kare me kanyo kec otieko kato. Di do Paulo oko mino gi ikwenyar be, 10“Jodongo na, ango atieko ngeno be ot wa ni oyaro kelo awanon kede kei adwong, likame i jame kede i emeri kenekene, do kiton i kuo wa da.” 11Do ngadwong me isirikalen likame oko paro gikame Paulo owaco, do en eko keto tam mere i kom ngadwong me jokwang emeri kede won emeri erume. 12Kite kame oudo likame eber pi bedo i edoket nono i kare me ngico me piny, jo atot oko mino tam be oyai ki kuno di oko dok i nam, me wek amotoko winyo mak wa otun Poenike, kame obedo edoket kame tie Kurete, tetu malo me tetu kide kede tetu piny me tetu kide, di oko bedo kuno i kare me ngico me piny.

Yamo Atek Obuko i Nam

13Kakame yamo me tetu piny ocako buko kede momot, gin kiko paro be kiudo do gikame oudo kimito, kiko kwanyo nangari ki pii, di kiko kwang kiririo cula me Kurete. 14Oyotoyot yamo atek kame wok ki tetu malo me kide oko buko di ewok kiye itela; 15kakame yamo ocere ne kede emeri, wan do oko jalakino emeri omol kede wa. 16Kakame oringo obeo kede i nget cula moro atitidi kame kolwongo be Kauda, kame oudo ogalao ne wa yamo, oko cane di oko mako yee kame bedo cen me emeri; 17ingei wane malo i emeri, gin kiko tweno tol rimaro di beo ki piny i dud emeri. Oudo kitie kede lworo be cengemogo kiromo pororo i asinge me dog nam, omio kiko didio mac me emeri, di do yamo oko molo emeri. 18Kite kame oudo yamo tie puno wa kede kitek, oru mere gin kiko cako uco yec kame oudo tie i emeri i yi pii. 19I ceng me adek mere, gin kiko donyo kwanyo jame mogo me tic me emeri di kiuco i pii. 20Kakame ceng kede acer likame oneeno kede pi ceng atot, doko di yamo atek oudo tie buko i kom wa, gen wa me bwot di do oko kwanyere atwal.

21Kite kame oudo kitieko kede ceng atot abongo cam, Paulo oko yai ecungo i nyim gi di eko waco ne gi be, “Jo na, koto bin wun iwinyunu kop na di likame ikounu yai cako kwang ki Kurete, koto awanon kede kei likame obedo tie. 22Do ango nan akwao wu imiunu cunyu bed nwang, pien likame tie ngatamoro kikom wa kame kuo mere bino rwenyo, kenekene emeri en koyaro kei. 23Pien iwor aoki, malaika ka Rubanga na kame ango aworo ocungo i ngeta, 24di eko waco na be, ‘Paulo, kur ibed kede lworo; in miero icung i nyim Kaisari. Doko neni, Rubanga otimi ber, eyaro mino jo dedede kame tie kedi i emeri bwot.’ 25Pi mano, jo na, bedunu kede nwangcuny, pien ango atie kede yei i kom Rubanga be gi dedede bino bedo bala kite kame kowaco na kede kikokome. 26Do yamo kong oyaro cwano wa omotar i cula moro.”

27Iwor me ceng me tomon kiwie ongwon, di oudo otie mol ngolo nam adwong me Aduria, tetu esawa kanyape me iwor, jokwang emeri oko paro be oudo kinoko itela. 28Kiko uco tol i pii pi pimo tuto mere, di kiko udo tuto me pii oudo tie puti tol acel kede ot are; kiko nyiko momot bobo kiko pimo, di kiko udo tuto me pii tie puti ot kanyangon. 29Kite kame oudo kilwor kede be cengemogo emeri romo ot dipere i mori, omio kiko jalakino nangari ongwon ki dud emeri cen, di do kiko donyo lego be piny suny ru. 30Jo kame oudo kwango emeri oudo mito lwi, omio kiko yololo yee i nam, di kiko cuko be oudo kitie uco nangari ki nyim emeri. 31Paulo oko waco ne ngadwong me isirikalen karacel kede isirikalen be, “Kwanyo di cuo gi odong i emeri, likame ibinunu bwot.” 32Di do isirikalen oko ngolo tol kame oudo kotweo kede yee, di kiko jalakino en eoto.

33Di bin piny oyapuno ru, Paulo oko donyo ngangao gin dedede pi ber camo gimoro, di ewaco be, “Tin en ceng me tomon kiwie ongwon, kame wun itiekunu di tam wu tie atatai abongo camo gimoro. 34Pi mano, ango nan akwao cunyu be ber icamunu gimoro; ebino mino wu teko, pien likame tie ngatamoro kikom wu kame bino kei akadi yer wie acel.” 35Ingei yamo kamano, en eko kwanyo mugati, eko pwono Rubanga pire i nyim jo dedede, di eko tuturo eko cako camo. 36Di do gin dedede cuny gi oko dwogo, di kiko cam. 37(Wan dedede jo kame oudo tie i emeri oudo oromo jo tol are kede ot kanyaare kiwie kanyape.) 38Kakame do kitieko kede cam kiko yeng, gin kiko donyo uco ipukoi me engano i pii pi mino emeri doko yoyot.

Emeri Otuturun

39Kakame piny oru kede, jo kame bin kwango emeri likame oko twero ngeno itela kakatek kame oudo kituno iye, do kiko neno kakoguraun i dog nam, kame kiko tamo be ka koto twerere, koto kiwoto emeri iye. 40Gin kiko ngolongolo tol me nangari di kiko weko gi kilwiny i nam. Esawa nono da oudo kitie jajaro tol kame oudo kotweo kede gikame wiro nyim emeri; di do kiko wano esuka malo me nyim emeri, esuka kame yamo buke kede, kiko do mol ot i dog nam. 41Do emeri oko dipere i asinge kame ebuka ocoko i dog nam di eko moko iye; ume oko moko dangadang, di ebuka oko turo dud emeri cen.

42Isirikalen oko iiko tam me neko mabus tetekeny kur moro kikom gi sanyi di eko bwot. 43Do ngadwong me isirikalen oudo mito be Paulo bwoti, omio en eko gengo gi timo iik gi nono. En eko waco ne jo kame twero isany pi ber cako somo i pii di kiko isany ot itela kakatek. 44Do jo icegun ko bino mako ibaon kede adulion kotuturun me emeri. Manono oko mino jo dedede obwot oko tuno itela kakatek.

Currently Selected:

Tice 27: BILK13

Highlight

Copy