Sak 5

Mesomkulola ga cikalata cewunukuce

1Nayiweni soni yindu yine kupitila m'mesomkulola, nipo pa ndaŵi jeleji naciweni cipukutu ca yakulembedwa cili mkuguluka. 2Lilayika lila lyambusisye yinaliji mkuyiwona. Najanjile kuti, “Nguciwona cipukutu ca yakulembedwa cili mkuguluka, ulewu wakwe uli mamita gakwana msano ni mcece nipo mcijipi mwakwe mwalijimamita mcece ni hafu.”

3Kaneko ŵasalile kuti, “Pelepo palembedwe ya malweso gele tigaciyika pa cilambo cosope capasi. Jwawiyi jwalijose tacimtyosya pa cilambo capasi pakukuya yiyalembedwe mbali aji, soni jwalijose jwakuŵeceta ya unami nombe najo tacimtyosya pakukuya yayilembedwe mbali jineji. 4AMBUJE Ŵamaciligosope akuŵeceta kuti tacitumisya malweso gelega, nipo tigacijinjila m'nyumba ja jwawiyi jwalijose ni soni jwakuŵeceta ya unami jwalijose pakukolanga lina lyangu. Malweso gelega tigaciŵa m'nyumbamo mpaka kujijonanga, matabwa ni maganga gakwe.”

Mesomkulola ga jwamkongwe mu lukalala

5Lilayika lila lyawonece soni ni lyatite kuti, “Mlolecesye ni mlole cindu cicikwisaci!”

6Ni nawusisye kuti, “Ana celeci cici?”

Lilayikalyo lyatite kuti, “Lwelelu luli lukalala lwakupimila, nipo lukwimilila ulemwa wa ŵandu wosope pa cilambo.”

7Ciwuniko cakwe caliji ca mtofu. Pinaliji mkulola, ciwuniko cawunukulidwe, nipo mu lukalalamo mwatemi mundu jwamkongwe!

8Lilayikalyo lyatite kuti, “Mundu jwamkongwe jweleju akugopolela kusakala.” Kaneko ŵamtutile soni mu lukalala mula ni kuŵika soni ciwuniko cakwe. 9Nalolite soni mwinani, nipo naweni acakongwe ŵaŵili uŵakwete mapapiko mpela cijuni cakolanjidwa msinji cili mkuguluka. Ŵanyakwile lukalalalo ni kwawula nalo mwinani.

10Kaneko naliwusisye lilayika lilyaŵecetaga ni une lila kuti, “Ana akwawula nalo kwapi?”

11Lilayika lila lyajanjile kuti, “Akwawula nalo ku cilambo ca Babiloniya kuti akalutaŵile nyumba. Nyumbajo pitijicimala tacilutamika pa malo giŵalulinganyicisye.”

Currently Selected:

Sak 5: YAWO

Highlight

Copy