Sak 4
4
Mesomkulola ga cakuŵikapo nyali
1Lilayika lilyaliji mkuŵeceta ni une lila lyayice soni ni lyanjimwisye mpela mwakusamjimucisya mundu naga ali mlugono. 2Lyambusisye kuti, “Ana mkuciwona cici?”
Myoyo najanjile kuti, “Nguciwona cakuŵikapo nyali ca golidi.”* Penani pakwe pana mbale jakuŵikamo mawuta. Pa cakuŵikapo nyalico pana nyali msano ni siŵili sisikwete mbanga mwakwinjicisyamo ngonji syakupambila. 3Pambali pakwe pa cakuŵika nyalico pana yitela yiŵili ya olifi,* cine ku mkono wamlyo, cine kumciji.#Ciw 11:4 4Kaneko naliwusisye lilayika lila kuti, “Ana yeleyi yikugopolela cici?” 5Lilayikalyo lyambusisye kuti, “Ana ngimkumanyilila?”
Une najanjile kuti, “Elo, ambuje ŵangu, yeleyi nginguyimanyilila.”#4:5: Ndime sya 10b-14 gaŵicidwe apano kutyocela kumbesi kwa mtwe, ni cakulinga cakuti nganiji jipikanice cenene.
10aKaneko lilayika lila lyatite kwa une, “Nyali msano ni siŵili sili meso ga AMBUJE, gele gagakusalola pa cilambo cosope capasi.”#Ciw 5:6
11Kaneko nawusisye, “Nambi yitela yiŵili ya olifi* kumbali syosope siŵili pa malo gakuŵicilapo nyali yikugopolela cici?#Ciw 11:4 12Nambi nyambi siŵili kusyeto kwa mipopi jiŵili ja golidi jakupitila mawutajo yikugopolela cici?”
13Lilayikalyo lyambusisye kuti, “Ana ngimkumanyilila?”
Une najanjile kuti, “Elo, ambuje ŵangu, yeleyi nginguyimanyilila.”
14Kaneko ŵajanjile kuti, “Jemanjaji ali ŵandu ŵaŵili ŵele ŵasagulidwe ni Mlungu, ŵakusamtumicila jwalakwejo, AMBUJE ŵa cilambo cosope capasi.”
Cilanga ca Mlungu kwa Selubabele
6Kaneko lilayika lila lyasalile kuti ngapelece utenga wa AMBUJE wakuyicisyawu kwa Selubabele. “Timcipunda nambo ngaŵaga pa kutenda ngondo, kapena mwamacili genu jikape iyayi, nambo ni msimu wangu.#Esa 5:2 7Ana m'mwe alitumbi lyelewu, mli ŵani? Timciŵa cilambo cakusalala pameso pa Selubabele. Nipo pitaciyika nalyo liganga lyambesi lya pa nyumba jangu, ni kulisajika penani, ŵandu tacigumila acitiji kuti, ‘Kusalala, kusalala!’ ”
8AMBUJE ŵambele soni utenga awu wakuti, 9“Selubabele ŵataŵile yilimbilimbi ya nyumba jeleji ni magasa gakwe, nipo tacimalisya. Ayi pitiyicitendekwapo, ŵandu ŵangu tacimanyilila kuti une ni junamtumisye m'mwejo kwa jemanjajo. 10bŴanduwo ali ŵakudandawula pakuyiwona kuti masengo ngigakutendekwa mwacitema. Nambo pitacimwona Selubabele ali mkupitilisya masengogo, jemanjajo taciŵa ŵakusengwa.”
Currently Selected:
Sak 4: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
