Sak 6
6
Mesomkulola ga yigeleta mcece
1Nakwete soni mesomkulola gane. Pandaŵi jeleji nayiweni yigeleta mcece yili mkukopoka pasikati pa matumbi gaŵili ga cisyano ca bulonsi. 2Ligeleta lyandanda lyaliji mkuwutidwa ni mahaci gecejewu, nipo lyaŵili lyaliji mkuwutidwa ni mahaci gepiliwu,#Ciw 6:4-5 3nipo ligeleta lyatatu lyaliji mkuwutidwa ni mahaci geswela, lya mcece lyaliji mkuwutidwa ni mahaci ga mtundu wakuwuka gigakwete maŵala gecejewu.#Ciw 6:2 4Kaneko naliwusisye lilayika lila kuti, “AMBUJE, ana mageleta gelega gakugopolela cici?”
5Jwalakwejo jwajanjile kuti, “Yeleyi yikugopolela mbungo mcece sya kwinani, syele sisikusatyocela kwa AMBUJE, ŵa cilambo cosope capasi.”#Ciw 7:1
6Ligeleta lilyawutidwaga ni mahaci gepiliwu lila lyaliji mkwawula kumpoto kwa cilambo ca Babiloniya. Lilyaliji mkuwutidwa ni mahaci geswela lila lyaliji mkwawula kungapilo lyuŵa, lilyaliji mkuwutidwa ni mahaci ga maŵala lila lyaliji mkwawula kum'mwela nipo lilyaliji mkuwutidwa ni mahaci ga mtundu wakuwuka lila lyaliji mkwawula ku cilambo ca kungopoko lyuŵa. 7Mahacigo pigakopwece gakwete lung'wanu lwakusosa kwendela cilambo cosope capasi. Lilayika lila lyagasalile kuti, “Jawulani mkacijendele cilambo capasi.” Myoyo mahacigo gapite kukucijendela cilambo capasico. 8Kaneko lilayika lyasalile mwakwesya maloŵe licitiji kuti, “Mahaci gigapite ku cilambo ca kumpoto gala gatulwisye lutumbilo lwa AMBUJE kweleko.”
Lilamusi lyakuti ŵasagule Yoswa
9Kaneko AMBUJE ŵambele utengawu: 10Ŵatite kuti, “Mpocele mituka kutyocela kwa ŵandu aŵa: Helidayi, Tobiya, ni Yedaya, ŵele ŵawusile ku ukapolo ku Babiloniya. M'mwe mjawule lisiku lilyolyo kwa Yosiya mwanace jwa Sefaniya. 11Silifa* ni golidi* jutimkapocelejo mkapanganyicisye cisoti ca ucimwene, ni mkaciŵice pa mtwe pa jwamkulungwa jwa ŵakutaga mbopesi* jula Yoswa, mwanace jwa Yehosadaki. 12Myoyo, mwasalile kuti, AMBUJE Ŵamaciligosope akuŵeceta kuti, ‘Mundu jwakolanjidwa kuti Nyambi jula tacisipuka ni kukulila papopo palipo nipo tacitaŵapo Nyumba ja AMBUJE.#Yel 23:5; 33:15; Sak 3:8 13Jwalakwejo ni jutacitaŵa Nyumba ja AMBUJE ni kupocela ucimbicimbi wakwenela kupocela mwenye, nipo tacalamulila ŵandu ŵakwe. Jwakutaga mbopesi tacijima pambali pa citengu cakwe nipo ŵaŵiliŵa tacikamula masengo pampepe mwamtendele ni mwamkamulano.’ 14Cisotico tacicisungaga m'Nyumba ja AMBUJE, kuti ciŵe cikumbukumbu kwa Helemu, Tobiya, Yedaya ni Yosiya.”
15Ŵandu ŵakutama kwakutalika taciyika kukutaŵa Nyumba ja AMBUJE. Myoyo timcimanyilila kuti AMBUJE Ŵamaciligosope andumile une kwa jemanja. Yeleyi tiyicitendekwa naga mkwapikanila mwacitema AMBUJE, Mlungu jwenu.
Currently Selected:
Sak 6: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
