Sak 12
12
Kuwomboledwa kwa msogolo kwa msinda wa Yelusalemu
1Utengawu uli wakwamba Isalaeli. AMBUJE ni uŵaŵisile kwinani, ni kupanganya cilambo capasi ni kupeleka umi kwa mundu. Jwalakwejo akuti, 2“Tinjimtenda Yelusalemu kuŵa mpela mgawo wa finyo jutacijonanga mitundu josope ja ŵandu jakwasyungulila. Amagongo ŵawowo taciputa ngondo cilambo ca Yuda nambo soni Yelusalemu. 3Nambo ndaŵi jelejo pitijiciyika, tinjimtenda Yelusalemu kuŵa mpela liganga lya usito, jwalijose jwakulinga kulinyakula tilicimwulasya kwakogoya. Mitundu josope ja pacilambo capasi tijicisongana pampepe kuti amjimucile Yelusalemu. 4Pandaŵi jelejo tinjigatendesya mahaci kuti gaŵe gana woga, ŵakwelapo ŵakwe tacitenda masoka. Tinjalolela ŵandu ŵa ku Yuda, ni kugatatalisya meso ga mahaci ga amagongo ŵawo. 5Kaneko acimlongola ŵa ku Yuda tacijila kuti, ‘Yisyene, AMBUJE Ŵamaciligosope, akusapeleka macili kwa ŵandu ŵawo ŵakutama ku Yelusalemu.’
6“Pandaŵi jelejo, tinjitenda ngosyo sya ku Yuda kuŵa mpela moto mu ukweti kapena mu mgunda wa yimanga yekomale tacijonanga mitundu josope jakwasyungulila jemanjajo. Ŵandu ŵa ku Yelusalemu tacitama mwa mtendele mcilambo mwawo.
7“Une AMBUJE, tinjapundikasya asilikali ŵa ngondo ŵa ku Yuda pandanda, ni cakulinga cakuti ucimbicimbi wele yisukulu ya Daudi* ni ŵandu ŵa ku Yelusalemu utacipocela ukasiwupunda wa Yuda. 8Pa ndaŵi jelejo AMBUJE tacacinjilicisya ŵakutama ku Yelusalemu, atamose ŵangali maciliwo taciŵa ŵamacili mpela muŵaŵelele Mwenye Daudi. Yisukulu ya Daudi tiyicalongolela jemanjajo mpela lilayika lya AMBUJE, mpela AMBUJE asyene. 9Pandaŵi jelejo tinjijonanga mtundu uliwose utiwucilinga kulimbana ni Yelusalemu.
10“Sambano yisukulu yosope ya Daudi ni ŵandu ŵa ku Yelusalemu tinjapa mtima wa canasa ni wa kupopela. Myoyo tacitiji kumlola ajula juŵamsomile mpaka kuwa jula, tacimlilila mnope mpela amula mwakusamlilila mwanace jwandanda kupagwa jwele jwawile.#Yoh 19:37; Ciw 1:7#Mat 24:30; Ciw 1:7 11Pandaŵi jelejo kulila kwa Yelusalemu tikuciŵa mpela kulila kwa Hadadi Limoni mu ciŵata ca ku Megido. 12-14Liŵasa lililyose mcilambomo tilicilila lisyene: liŵasa lyakutyocela kwa Daudi tilicilila pajikape. Liŵasa lyakutyocela kwa Natani tilicilila pajikape. Liŵasa lyakutyocela kwa Lefi tilicilila pajikape. Liŵasa lyakutyocela kwa Shimeyi tilicilila pajikape, pamo ni maŵasa gane gosope. Liŵasa lililyose tilicilila pajikape, nipo acalume ŵa liŵasa lililyose tacilila pajikape kulekangana ni acakongwe.”
Currently Selected:
Sak 12: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
