Sak 11

Kugwa kwa ŵakulagasya

1Mwugule matanga genu, m'mwe Lebanoni,

kuti moto ujoce yitela yenu ya mikungusa!

2Mlile mwakwesya maloŵe, jemanja yitela ya payini

pakuti yitela ya mikungusa yigwile

yitela ya macili yijonanjidwe.

Mlile mwakwesya maloŵe jemanja yitela ya mtundu ku Bashani —

pakuti ukweti wakuŵijikana ula awukatile!

3Mpikane, nombe nawo ŵakucinga akulila mwa canasa;

pakuti mopo wakulicisya yilangwa yawo ujumwile.

Apikane kubangula kwa ŵanace ŵa lisimba

pakuti ukweti wakuŵijikana ula wa ku Yolodani awukatile!

Ŵakucinga ŵaŵili

4AMBUJE Mlungu jwangu ŵasalile kuti, “Mlolele cenene ngondolo syasikuja kukuwulajidwa. 5Ŵakusasuma ngondolo akusasiwulaga, nambo ŵangapegwa cilango. Akusasumisya nyama ni akusatiji kuti, ‘Acimbicikwe AMBUJE, uwe tusicile!’ Atamose ŵakusicinga ngondolosyo ŵangasitendela canasa.”

6AMBUJE* ŵatite, “Ngasinamtendela canasa jwalijose jwakutama pa cilambo capasi. Mundu jwalijose tinjimpeleka myala mwa mlongola jwakwe ni mwa mwenye jwakwe. Jemanjajo tacijonanga cilambo, nambo une ngasinimkulupusya jwalijose myala mwa jemanjajo.”

7Une natandite kulanga ni kusumisya ngondolo syakuja kukuwulajidwa sila. Najigele simbo siŵili: jimo najipele lina lyakuti “Umbone mtima”, nipo jinejo najikolasile kuti “Umpepe”. Myoyo likuga lya ngondolo lila nalilolele cenene. 8Pa mwesi umo natyosisye ŵakucinga ŵatatu ŵala. Ŵayice pakumbisya mtima, mwakuti une nganinapakombola kupimilila. Jemanjajo ŵaŵengene ni une. 9Myoyo nalisalile likuga lya ngondolo lila kuti, “Ngisinimlolela soni. Jele jijikuti jiwe, jiwe basi. Jele jijikuti jisokonecele, jisokonecele, nipo jemanja ŵakusigala mlyaganeje.” 10Kaneko najigele simbo jakolanjidwa kuti, “Umbone mtima” ni kujitemangula, kulosya kukasa cilanga* cinalangene ni mitundu josope ja ŵandu. 11Myoyo cilanga cila camasile lisiku lyelelo, nipo ŵakutenda malonda ga ngondolo ŵala, ŵele uŵagambaga kundolecesya, ŵamanyilile kuti yosope yinatendaga yaliji yakutyocela kwa AMBUJE. 12Myoyo acimsyene ngondolowo nasalile kuti, “Naga yikumsangalasya mundipile. Naga ngaŵaga myoyo, msunje mbiya syenusyo.” Myoyo, jemanjajo ŵandipile mbiya sya masilifa* syakwana 30.#Mat 26:15#Mat 27:9-10

13AMBUJE ŵasalile kuti, “Msiŵice mwakusunjila yipanje.” Myoyo najigele mbiya sya silifa sila, pa mtengo awula uŵatite ngwenela kupocela ula ni kuja kukusiponya mwakusunjila yipanje m'Nyumba ja AMBUJE. 14Kaneko natemenye simbo jine jila jakolanjidwa “Umpepe”, kulosya kumasya ulongo sikati ja Yuda ni Isalaeli.

15Sambano AMBUJE ŵasalile kuti, “Mjigale soni yida ya mkucinga, mkucinga jwakwe jwangali mate. 16Pakuti tinjimŵika kuŵa mkucinga mcilambo, mkucinga jwele ngisasamala ngondolo syakwasika, ngisaja kukusosasosa syakusokonecela, kapena kuposya syakulwala, ni kulisya sya umi. Nambo jwalakwejo tacigambaga kulya nyama ja ngondolo syakunakana, mpaka kupululaga ni yiboda yakwe. 17Likungu kwa mkucinga jwangu, jwangali matejo. Jwalakwejo akusaleka ngondolo syakwe. Jwalakwejo ajonanjidwe pa ngondo. Mkono wakwe tiwucinyala, nipo liso lyakwe lya kumlyo tilicitatala.”

Currently Selected:

Sak 11: YAWO

Highlight

Copy