Sak 10
10
AMBUJE tacikulupusya ŵandu ŵakwe
1Mŵende kwa AMBUJE kuti ampe ula mu ndaŵi jakupanda. Jwalakwejo ni jwakusagwisya ula ja miwumbi pa ŵandu ŵakwe, soni jwalakwejo akusamesya mbeju mu mgunda wa jwalijose. 2Milungu jakupanganya ni yala jikusaŵeceta ya unami, soni ŵakulondola cisango akusayiwona ya unami. Ŵakusasagamila sagamisi akusasagamila ya unami, nipo maloŵe gawo gakusisimisya mtima gakusaŵa gangali mate. Myoyo ŵandu akusagamba kwenda kwawula aku na kuku mpela ngondolo, akusalaga ligongo lyakusoŵa mkucinga.
3AMBUJE akuŵeceta kuti, “Natumbilile ŵakucinga, nipo acimlongola ŵa mcilambomo tinjapa cilango. Une AMBUJE Ŵamaciligosope tinjisisamalila ngondolo syangu, gopolela kuti liŵasa lya Yuda, ni tinjisitenda kuŵa mahaci ga ngondo gamacili. 4Mwa jemanjajo timucikopoka mlongola jwele jutaciŵa mpela liganga lya pandumba,* mpela ukunje wa ngondo. Acimlongola wosope ŵakulamulila tacityocela mwa jwalakwejo. 5Ŵandu wosope ŵa ku Yuda taciŵa ŵakupunda mpela asilikali uŵapondelesye amagongo ŵawo m'matope. Taciputa ngondo ligongo lyakuti AMBUJE taciŵa ali ni jemanjajo, nipo tacapunda amagongo ŵakukwela pa mahaci.
6“Ŵandu ŵa ku Yuda tinjalimbikasya;
Tinjakulupusya ŵandu ŵa ku Isalaeli.
Tinjatendela canasa jemanjajo
ni kwawucisya soni kumangwawo.
Taciŵa mpela kuti nganinajasa.
Une ndili AMBUJE Mlungu jwawo; tinjijanga mapopelo gawo.
7Ŵandu ŵa ku Isalaeli taciŵa ŵakulimbangana mpela asilikali ŵa ngondo;
taciŵa ŵakondwa mpela ŵandu ŵaŵele ali mkumwa finyo.
Yisukulu yawo tiyicikumbucila kupunda kweleku
ni kuŵa ŵakusangalala pa ligongo lya yele yatesile AMBUJE.
8“Tinjaŵilanga ŵandu ŵangu
ni kwasonganya pampepe.
Tinjakulupusya jemanjajo
nipo tacitupa mpela muŵaŵelele kala.
9Atamose kuti napwilingenye jemanjajo pasikati pa mitundu jine ja ŵandu
nambope tacingumbucila kwakutalicila kwali jemanjajo.
Jemanjajo pamo ni ŵanace ŵawo taciŵa cijumi ni kuwujila kumusi pampepe.
10Tinjakoposya kutyoka ku Iguputo ni ku Asiliya
kuja nawo kumangwawo.
Tinjija kukwayikasya ku cilambo ca Giliyadi ni ku Lebanoni;
cilambo cosope ticicigumbala ni ŵandu.
11Pitacijombokaga Nyasa ja ku Iguputo,
tinjimasya matumbela ga pa nyasapo,
mesi gosope ga mu Lusulo lwa Nayilo tinjigapwesya.
Kulikusya kwa Asiliya tikucimala,
nipo simbo ja ucimwene ja Iguputo tijicitemanguka.
12Une tinjalimbisya jemanjajo mwa AMBUJE;
nipo tacilambila ni kumbikanila une.”
Nguti myoyo une AMBUJE.
Currently Selected:
Sak 10: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
