Luk 2

Kupagwa kwa Yesu

(Mat 1:18-25)

1Yaliji gele masikugo kuti mwenye jwamkulungwa Agusito#2:1 Agusito: Jwaliji Mwenye jwa ku Loma kutandilila mcaka ca 27 Klistu mkinapagwe mpaka mcaka ca 14 Klistu ali apagwile. jwa cilambo ca Loma ŵalamwile kuti ŵandu ŵa mcilambo cakwe cosope alembedwe mena gawo mu buku ja kawundula. 2Kulemba kwandanda kwa menaku kwatendekwe pa ndaŵi jele Kwiliniyo ŵaliji mkulamulila cilambo cakolanjidwa Siliya. 3Ŵandu ŵapite kulembesya mena gawo, jwalijose ku musi wa kumangwakwe.

4Myoyo Yosefe ŵatyosile ku msinda wa Nasaleti uwaliji mu upande wa Galileya ni ŵajile ku likulungwa lya ucimwene wakwe lyakolanjidwa kuti Betelehemu mu upande wa Yudeya. Yosefe ŵajile kweleko ligongo ŵaliji ŵakutyocela kwiŵasa lya Mwenye Daudi.* 5Yosefe ŵapite kweleko pamo ni mwali jwakolanjidwa Maliya juŵamtomele jula ni cakulinga cakuti akalembesye mena gawo. Pandaŵi jeleji Maliya ŵaliji ali akwete citumbo. 6Piŵaliji kweleko, ndaŵi jakuti aŵelece jakwanile, 7ni ŵaŵelece mwanace jwamlume jwakwitiwo. Ŵamŵijilile ni nguwo mwanacejo ni kumgoneka pa manyasi mwicinga mu cakulila ng'ombe ligongo lyakuti nganasimana kose malo m'nyumba jakuyicilamo acalendo.

Ŵakucinga ni malayika

8Mbali jijojo ŵapali ŵakucinga ŵiŵatamaga mwitinji ndaŵi ja cilo kulindilila yilangwa yawo. 9Mwacisisimucisya lilayika lya Ambuje lyayice ni kwima pasikati pa jemanjajo, nipo lumbili lwa Ambuje lwaŵasile mwakwasyungulila jemanjajo. 10Nambo lilayikalyo lyatite, “Mkasimjogopa, mlole nimjigalile jemanja ngani jambone jitijasangalasye mnope ŵandu wosope. 11Lelo jino m'musi wa kumangwawo Mwenye Daudi mupagwile Mkulupusyo jwenu. Jwalakwejo akukolanjidwa kuti Klistu* Ambuje. 12Cimanyisyo cakwe ni aci: Timkalisimane likandi lili liŵijililidwe mu nguwo ali aligonece mwicinga mucakulila ng'ombe.”

13Mwacisisimucisya malayika* gane gejinji gayice pa malo pilyaliji lilayika line pala nipo malayikago gatandite kumlumba Mlungu ni maloŵe gakuti, 14“Ucimbicimbi uŵe kwa Mlungu kwinani

ni mtendele pa cilambo capasi pano

kwa ŵandu ŵakunonyelwa ni Mlungu.”

15Malayikago pigatyosile kuwujila kwinani, ŵakucinga ŵala ŵatandite kusalilana acitiji kuti, “Kwende tujawule ku Betelehemu tukayilole yayitendekwe, yatumanyisye Ambujeyi.”

16Mwacitemacitema ŵakucingawo ŵapite nipo ŵamsimene Maliya ni Yosefe, soni ŵaliweni likandi ali aligonece mwicinga mu cakulila ca ng'ombe. 17Piŵamasile kuliwona likandilyo, jemanjajo ŵamlondecesye Maliya ni Yosefe ngani jiŵapikene jemanjajo kutyocela kwa lilayika lila kwambaga ya mwanacejo. 18Ŵandu wosope ŵaŵapikene ya nganiji ŵasimonjile mnope pa yele yiŵalondesye ŵakucingawo. 19Nambo Maliya ŵapitilisye kuyiganisya yosopeyi, nipo ŵaliji mkusimonga kuti ana yeleyo mate gakwe galiji cici. 20Ŵakucinga ŵala ŵawujile kusyaliji ngondolo syawo nipo ŵaliji mkwimba nyimbo sya kumtogolela Mlungu ligongo lya yosope yiŵapikene ni kuyiwona pagumbalicisya yele yiŵasalilidwe ni lilayika lila.

Kuwumbala kwa Yesu ni kupelecedwa ku Nyumba ja AMBUJE

21Pigamasile masiku msano ni gatatu gakupagwa kwakwe, jakwanile ndaŵi jakuti amwumbasye, nipo piŵamwumbesye mwanacejo ŵampele lina lyakwe Yesu.* Linali lyaliji lilalila lyele lilayika liŵamsalile Maliya lila mkanakole citumbo.#Lef 12:3; Luk 1:31

Yesu akupelecedwa ku Nyumba ja AMBUJE

22Pijakwanile ndaŵi jakuti Maliya ni Yosefe atende msyungu wakuliswejesya pakukuya yigasalaga Malamusi ga Mlungu giŵalembile Mose* kwambaga yele jwamkongwe akwenela kutenda mwanace ali apagwile, jemanjajo ŵamjigele mwanacejo kwawula najo ku Yelusalemu kuti akatende msyungu ŵakumpeleka kwa Ambuje#Lef 12:6-8 23mpela mugakuŵecetela malamusi ga Ambuje kuti, “Mwanace jwalijose jwamlume jwakwitiwo, aŵe jwakusaguka jwa Ambuje.”#Eks 13:2, 12 24Jemanjajo ŵapelece soni mbopesi pakuyicisya malamusi ga Ambuje gakuti, “Apelece njuŵa siŵili kapena mawunda gaŵili ga ngunda.”

25Pandaŵi jeleji ku Yelusalemu kwatamaga mundu lina lyakwe Simiyoni. Jwalakwejo jwaliji jwakulungama ni jwakogopa Mlungu. Ŵaliji mkwembeceya ndaŵi jele Mlungu jitacakulupusya Aisalaeli. 26Msimu Ŵaswela ŵamsalile jwalakwejo kuti ngasawa mkanamwone Mkulupusyo juŵatite Mlungu kuti taciyika. 27Mwakulongoleledwa ni Msimu Ŵaswela, lisiku line Simiyoni ŵajile ku Nyumba ja AMBUJE. Nombe nawo acinangolo ŵa Yesu ŵajile ku Nyumba ja AMBUJEJO pamo ni mwanagwawo kuti akamtendele msyungu pakukuya malamusi ga Mlungu giŵalembile Mose. 28Papopo Simiyoni ŵamjigele mwanacejo ni kumjangata m'myala mwakwe, ni ŵatandite kumtogolela Mlungu acitiji kuti,

29“Ambuje, angunde une jwakutumicila jwawo kuti m'mbwe mwa mtendele,

pakuti ŵalakwe akwanilisye maloŵe giŵaŵecete.

30Pakuti ni meso ganguga nawuweni ukulupusyo wa ŵalakwe,

31uŵalinganyisye ŵalakwe kuti ŵandu ŵa mitundu josope awuwone.

32Ŵalakwe apelece lilanguka lyakwamulicila ŵandu ŵa mitundu jine,#Yes 42:6; 49:6; 52:10

ni kwapa ucimbicimbi Aisalaeli ŵandu ŵawo.”

33Acinangolo ŵa Yesu ŵaliji mkusimonga pa maloŵe giŵaŵecete Simiyoni gakwamba mwanacejo. 34Kaneko Simiyoni ŵajaliwasisye jemanjajo ni kumsalila Maliya mamagwe mwanacejo kuti,

“Mwanaceju ali jwamsagulidwe ni Mlungu,

jwalakweju tacitendekasya conasiko

pa ŵandu ŵajinji ŵa ku Isalaeli

nambo soni tacitendekasya kuti ŵandu apocele cikulupusyo.

Jwalakweju taciŵa cimanyisyo cakutyocela kwa Mlungu

citacisisyana naco ŵandu ŵajinji,

35kuti nganisyo syasili m'mitima mwa jemanjajo tisiwonecele pakulanguka.

Nambo kwa ŵalakwe mama, tacilaga mpela kuti atesile

kusomedwa ni upanga wakutema.”

36Ŵapali jwakulocesya* jwamkongwe jwamcekulupe lina lyakwe lyaliji Ana,* mwanace jwamkongwe jwa Fanuwelo jwa lukosyo lwa Asha. Jwalakweju jwatemi pa liŵasa kwa yaka msano ni yiŵilipe kutyocela pa ndaŵi jiŵaliji mwali, kaneko ŵamkwakwe ŵawile. 37Kutyocela pa ndaŵi jiŵawile ŵamkwakwejo, jwalakwejo ŵatemi pa umasije kuyicila pa msingu wa yaka makumi msano ni gatatu ni mcece yakupagwa. Jwakulocesya jwamkongweju nganatyokaga ku nyumba ja Mlungu mwakuti jwalakwejo jwanonyelaga kumtumicila Mlungu musi ni cilo, pakupopela ni kulijima yakulya. 38Pandaŵi jijojo jwakulocesyajo jwayice ni jwatandite kumtogolela Mlungu ni kuŵeceta ya mwanacejo kwa ŵandu wosope ŵiŵaliji mkwembeceya kuti Mlungu ŵakulupusye ŵandu ŵiŵatamaga mu msinda wa Yelusalemu.

Kuwujila ku msinda wa Yelusalemu

39Yosefe ni Maliya piŵamasile kutenda yosope pakuyicisya malamusi ga Ambuje, jemanjajo ŵawujile ku musi wawo wa ku Nasaleti mu upande wa Galileya.#Mat 2:23 40Mwanacejo jwakusile mwakulimbangana, soni jwaliji jwalunda nipo Mlungu ŵampele upile jwalakwejo.

Mcanda Yesu sikati ja aciŵalimu m'Nyumba ja AMBUJE

41Acinangolo ŵa Yesu ŵajawulaga ku Yelusalemu caka ni caka ku cindimba ca Pasaka.*#Eks 12:1-27; Det 16:1-8 42Yesu piŵaliji ni yaka likumi ni yiŵili yakupagwa, acinangolowo ŵajile kucindimbako mpela muŵatendelaga ndaŵi syosope. 43Pigamasile masiku ga cindimbaco, jemanjajo ŵawutandite ulendo wakuwujila ku musi mwangamanyilila kose kuti Yesu asigele ku Yelusalemu. 44Jemanjajo ŵaganisyaga kuti Yesu ali mu ulendo pemo pamo ni acimjakwe, myoyo ŵajesile ulendo wa lisiku limo nipo kaneko ŵatandite kumsosasosa sikati ja acimjakwe ni acanasi ŵakwe. 45Pangamwona jwalakwejo acinangolo ŵakwe ŵawujilile ku Yelusalemu acimsosaga. 46Pigamasile masiku gatatu, ŵamsimene jwalakwejo m'Nyumba ja AMBUJE ali atemi sikati ja aciŵalimu aku ali mkupikanila maloŵe ga jemanjajo ni kwawusya jemanjajo yiwusyo. 47Ŵandu wosope ŵaŵapikene maloŵe gakwe ŵasimonjile pa lunda luŵakwete Yesu ni muŵajanjilaga yiwusyo. 48Acinangolo ŵakwe piŵam'weni jwalakwejo, ŵasimonjile, nipo mamagwewo ŵamwusisye jwalakwejo kuti, “M'mwe amwanace, ana ligongo cici mtusawisye uwe mwamti myiyi? Une ni baba ŵenu tulasile kumsosasosa.”

49Kaneko Yesu ŵajanjile kuti, “Ligongo cici mwaliji mkusosasosa? Ana ngamkumanyilila kuti ngwenela kuŵa m'Nyumba ja Atati ŵangu?” 50Nambo acinangolowo nganamanyilila gopolela kwa maloŵe giŵajanjile Yesugo.

51Myoyo Yesu ŵalongene pamo ni acinangolo ŵakwewo, mpaka ŵajile kwika ku Nasaleti, nipo ŵaliji mkwapikanila jemanjajo. Mamagwe Yesu ŵagasalesye maloŵe gosopega mu mtima mwawo. 52Yesu ŵapitilisye kukula mwa lunda ni mwamacili, mwakuti Mlungu ni ŵandu ŵakwe ŵamnonyelaga mnope.#1 Sam 2:26; Mis 3:4

Currently Selected:

Luk 2: YAWO

Highlight

Copy