Luk 1
1
1Ŵakucimbicikwa Teofilo:
Ŵandu ŵa jinji ŵalinjile kulondesya ngani ja yindu yiyatendecekwe pasikati petu. 2Jemanjajo ŵalembile yitwasalilidwe ni ŵandu ŵiŵaliji kweleko soni ŵiŵayiweni ni meso gawo yiyatendecekwe kutyocela pandanda, jemanjajo ŵaŵele ali mkulalicila utengawo. 3Myoyo pinamasile kujilola mwakusamalila cenene ngani josopeji pakuyicisya yiyatendekwe kutyocela pandanda, une nganisisye kuti kuli kwambone kwalembela yeleyo mwakolosya cenenepe ŵalakwe ŵakucimbicikwa Teofilo. 4Ndesile yeleyi kuti namanyisye ŵalakwe ŵakucimbicikwa yakuwona yisyesyene kwambaga yindu yiŵapikene yila.
Lilayika likusala ya kupagwa kwa Yohane M'batisi
5Pandaŵi jiŵaliji Helodi* mwenye jwa cilambo ca Yudeya#1:5 Yudeya: Kwimilila cilambo cosope ca Palesitina. ŵapali jwakutaga mbopesi lina lyakwe Sakaliya jwa mwikuga lya Abiya ŵakutaga mbopesi. Ŵamkwakwe Sakaliya ŵaliji Elisabeti ŵa mwiŵasa lya Aloni* jwakutaga mbopesi.#1 Mbi 24:10 6Sakaliya ni Elisabeti ŵaliji ŵakulungama pameso pa Mlungu, mwakuti ŵagakuyaga cenene Malamusi ni yosope yene yiŵalamwile Ambuje. 7Jemanjaji nganakola ŵanace ligongo Elisabeti ŵaliji ŵangaŵeleka soni jemanjaji ŵaliji ŵacekulupe.
8Lisiku line likuga lya Sakaliya lyaliji mkutumicila ku Nyumba ja AMBUJE, pandaŵiji jwalakwejo jwaliji mkutumicila Mlungu mpela jwakutaga mbopesi. 9Malinga ni msyungu wa ŵakutaga mbopesi, jwalakwejo jwasagulidwe pakulondola cisango kuti akajinjile m'Nyumba ja AMBUJE kukututumisya ubani.* 10Pandaŵi jiŵatutumisyaga ubani Sakaliya, likuga lyosope lya ŵandu lyaliji mkupopela kusa.
11Pandaŵi jelejo lilayika lyakutyocela kwa Ambuje lyawonecele kwa jwalakwejo lili lijimi kumbali ja kumlyo kwa malo gakututumicisya ubani. 12Sakaliya ŵatojime mnope pakuliwona lilayikalyo ni ŵakamwile ni woga. 13Nambo lilayikalyo lyamsalile jwalakwejo kuti, “Sakaliya, mkajogopa! Mlungu alipikene lipopelo lyenu, mwakuti ŵamkwenu Elisabeti tacimwelecela m'mwejo mwanace jwamlume ni timumpe lina lyakwe Yohane. 14Mwanace jweleju pitacipagwapo tiyicimtendesya jemanja kuŵa ŵakondwa soni ŵandu ŵajinji taciŵa ŵakusangalala. 15Jwalakwejo taciŵa jwamkulungwa pameso pa Ambuje. Jwalakwejo ngasaŵa jwakumwa yakumwa mpela finyo kapena cine cilicose cakukolelwesya. Jwalakwejo taciŵa jwakulongoleledwa ni Msimu Ŵaswela kutyocela pa ndaŵi jakupagwa kwakwe.#Num 6:3 16Yohane tacigalawusya mitima ja Aisalaeli ni kuwujila soni kwa Mlungu jwawo. 17Jwalakwejo tacilongolela pasogolo pa Ambuje mwakulimba mtima ni mwamacili mpela macili giŵakwete jwakulocesya* Eliya.* Tacasyoŵekanya acinangolo ni ŵanace ŵawo, tacagalawusya ŵandu ŵangapikana kuti akole lunda mpela lwa ŵandu ŵakulungamika, jwalakwejo taciŵicila cile ŵandu ŵakwenela kwatumicila Ambuje.”#Mala 4:5-6
18Sakaliya ŵaŵecete ni lilayikalyo acitiji, “Une ni ŵamkwangu tuli ŵacekulupe sambano. Ana timanyilile uli kuti yeleyi yili yakuwona nambo soni kuti tiyitendekwe?”
19Lilayikalyo lyajanjile kuti, “Une ndili Gabuliele,* jwakutumicila jwa Mlungu. Jwalakwejo andumile une kuti mbecete ni m'mwejo ni kumsalila ngani jamboneji.#Dan 8:16; 9:21 20Nambo sambano mpikane, pa ligongo lyakuti nganimkulupilila maloŵe gimbecete, myoyo timciŵa ŵangapakombola kuŵeceta mpaka pa lisiku litiyicitendekwa yinimsalileyi. Nambo yosope tiyicitendekwa pa ndaŵi jakwe.”
21Pandaŵi jelejo ŵandu ŵaŵaliji kumlindilila Sakaliya ŵaliji mkusimonga kuti ana ligongo cici jwalakwejo ŵacelewaga kukopoka m'Nyumba ja AMBUJEMO.
22Jwalakwejo piŵakopwece m'Nyumbamo nganaŵeceta ni ŵandu, myoyo jemanjajo ŵamanyilile kuti Sakaliya aciweni cindu cine cakwe kupitila m'mesomkulola m'Nyumba ja AMBUJE mula. Jwalakwejo ŵagambile kwajimicila ŵandu ŵala makono, nambo ngaŵeceta liloŵe lililyose.
23Pijamasile ndaŵi jakwe jakutumicila m'Nyumba ja AMBUJE, Sakaliya ŵawujile kumangwakwe. 24Yili yitendekwe yeleyo, kaneko Elisabeti ŵamkwakwe Sakaliya ŵakwete cilu, nipo ŵagambaga kutama m'nyumba kwa miesi msano. 25Elisabeti ŵaŵecete kuti, “Sambano Ambuje andendele canasa, mwakuti andyocesye une soni syangu syosope pasikati pa ŵandu.”
Lilayika Gabuliele akusalicisya ya kupagwa kwa Yesu
26Elisabeti piŵaliji ni citumbo ca miesi msano ni umo, Mlungu ŵalitumile lilayika Gabuliele ku msinda wakolanjidwa Nasaleti mu upande wa Galileya. 27Lilayikalyo ŵalitumile kwa mwali jwine lina lyakwe Maliya juŵatomelwe ni jwamlume jwine lina lyakwe Yosefe jwa mwiŵasa lya Mwenye Daudi.*#Mat 1:18 28Lilayika lila lyayice kuŵaliji mwalijo ni lyatite kuti, “Moni Maliya, m'mwejo mli ŵakongwe ŵajaliwe! Ambuje amsagwile kuti amtendele yindu yekulungwa.”
29Maliya ŵalasile mnope mu mtima ni maloŵego, mwakuti ŵaliwusyaga asyene kuti ana cikomasyo camtuli celeci? 30Lilayika lila lyamsalile jwalakwejo kuti, “Maliya, mkasimjogopa, Mlungu amsalalile mtima. 31Timcikola cilu, ni timciŵeleka mwanace jwamlume. Timumpe lina lyakwe Yesu.*#Mat 1:21 32Jwalakwejo taciŵa jwamkulungwa ni tacikolanjidwa kuti Mwanace jwa Mlungu jwakwinani Mnope. Ambuje Mlungu tacimtenda jwalakwejo kuŵa mwenye mpela muŵaŵelele nangolo jwakwe Daudi#2 Sam 7:12-13, 16; Yes 9:7 33nipo taciŵa mwenye jwa Aisalaeli mpaka kalakala; ucimwene wakwe ngasiwumala kose.”
34Maliya ŵaliwusisye lilayikalyo kuti, “Ana yeleyi tiyiŵe uli pakutipo une jwangali ŵalume?”
35Lilayika lila lyajanjile kuti, “Msimu Ŵaswela taciyika pa m'mwejo nipo macili gakwe tigaciŵa pa m'mwejo. Ali ni ligongo lyakwe kuti mwanace jutacipagwajo taciŵa jwamswela; tacikolanjidwa kuti Mwanace jwa Mlungu. 36Mkumbucile ya alongo ajenu Elisabeti, ŵiŵatiji ŵangaŵeleka ŵala, nombe nawo akwete cilu ca miesi msano ni umo mwakuti apano akwembeceya kuŵeleka mwanace jwamlume mu ucekulu wakwe. 37Pakuti pangali cindu ni cimo cene ca mpaka cimleme Mlungu.”#Gen 18:14
38Papopo Maliya jwatite, “Une jwakutumicila jwawo Ambuje, yitendekwe kwa une mpela mwaŵecetelemo.” Lilayika lila lyawujile kwinani.
Maliya ŵajile kukwasonda Elisabeti
39Gali gapite masiku gapanandi, Maliya ŵalinganyisye ulendo mwacitema kwawula ku msinda uwaliji ku matumbi ku cilambo ca ku Yudeya. 40Piŵayice kweleko jwalakwejo jwajinjile m'nyumba ja Sakaliya asono ŵawo Elisabeti nipo ŵamkomasisye Elisabetijo. 41Elisabeti piŵapikene komasya kwa Maliya, ndaŵi jijojo mwanace jwatandite kuwulukuta mcitumbo mwakwemo. Pandaŵiji Elisabeti ŵalongoleledwe ni Msimu Ŵaswela, 42kaneko ŵatandite kuŵeceta mwakwesya maloŵe acitiji, “M'mwejo mli ŵajaliwe kwapunda acakongwe ŵane wosope, soni mwanace jwali mcitumbo mwenu ali jwamjaliwe. 43Une ndili nduni kuti ŵalakwe, mama ŵawo Ambuje ŵangu kuti ayice kukungungulusya? 44Pakuti pinapikene cikomasyo cenu, mwanace jwawulukwite ni lukondwa mcitumbo mwangu. 45M'mwejo mli ŵajaliwe ligongo mwakulupilile kuti yele yiŵamsalile Ambuje, tiyicitendekwape.”
Nyimbo ja Maliya jakutogolela
46Maliya ŵatite,#1 Sam 2:1-10
“Une ni Mtima wangu wosope ngwalumba Ambuje,
47msimu wangu ukusangalala mwa Mlungu Mkulupusyo jwangu,
48pakuti jwalakwejo akuweni kulinandiya kwa jwakutumicila jwakwe.#1 Sam 1:11
Kutyocelaga sambano jino mpaka msogolo
ŵandu ŵa mipago josope tacingolanga une kuti ndili jwamjaliwe,
49pakuti Mlungu Jwamaciligosope
andendele yindu yekulungwa,
soni jwalakwejo ali jwamswela.
50Jwalakwejo ŵatendele canasa ŵandu ŵa mipago jakulekanganalekangana
ŵele ŵakusamjogopa jwalakwejo.
51Jwalakwejo ŵapanganyisye yindu yamacili ni mkono wakwe
ŵapwilingenye ŵandu ŵakupoka mu nganisyo sya mu mtima mwawo.
52Ŵatulwisye ayimwene ŵakupikanika pa yitengu yawo
ni kwakwesya ŵandu ŵakulinondiya pa ma ukumu.#Yob 5:11; 12:19
53Ŵapele ŵandu ŵasala yindu yambone,
nambo ŵakusicila ŵajawisye ali ŵangali kandu.
54Jwalakwejo ŵakamucisye Aisalaeli ŵandu ŵakwe,
pakumbucila canasa cakwe.
55Yeleyi ni yiŵatesile cilanga*
kuti tacatendela acinangolo ŵetu ŵakala ŵala,#Gen 17:7
Abulahamu* ni yisukulu yakwe mpaka kalakala.”
56Maliya ŵatemi ni Elisabeti kwa miesi jitatu, kaneko ŵawujile ku musi.
Kupagwa kwa Yohane M'batisi
57Ndaŵi jakuti Elisabeti aŵelece jakwanile nipo ŵaŵelece mwanace jwamlume. 58Acanasi ni acalongo acimjakwe ŵa Elisabeti piŵapikene kuti Ambuje amsalalile mtima jwalakwejo, jemanjajo ŵasangalele najo pampepe Elisabetijo.
59Pigakwanile masiku msano ni gatatu mwanacejo ali apali, acalongo acimjakwe ni acanasi ŵasongene kuti amwumbasye, nipo ŵasacile kumpa lina lya Sakaliya babagwe.#Lef 12:3
60Nambo mamagwe mwanacejo ŵakanile acitiji, “Iyayi, lina lyakwe tiliŵe Yohane.”
61Ŵanduwo ŵamsalile Elisabeti kuti, “Pa ulongo wenu pangali mundu jwakwete lina mpela lyeleli.” 62Myoyo ŵanduwo ŵaŵecete ni Sakaliya pakamulisya masengo makono nipo ŵamwusisye lina liŵasakaga kuti ampe mwanacejo.
63Sakaliya ŵaŵilasisye pakulembela, ni ŵalembile kuti, “Lina lyakwe lili Yohane.” Ŵandu wosopewo ŵasimonjile nayo. 64Pandaŵi jijojo Sakaliya ŵatandite kuŵeceta soni, ni ŵamlumbile Mlungu. 65Acalongo acimjakwe ŵala ŵakamwilwe ni woga, mwakuti nganiji japikanice ku cilambo cosope ca matumbi ga ku Yudeya. 66Ŵandu wosope ŵiŵapikene yeleyi ŵaliji mkuganisya m'mitima mwawo aciliwusyaga kuti, “Ana mwanaceju taciŵa jwamtuli?” Pakuti yawonece cilepe kuti Ambuje ŵaliji najo mwanacejo.
Maloŵe gakulocesya ga Sakaliya
67Sakaliya babagwe Yohane acilongoleledwaga ni Msimu Ŵaswela ŵa kwa Mlungu ŵatandite kuŵeceta maloŵe ga Mlungu acitiji:
68Ngwalumba Ambuje, Mlungu juŵamlambilaga Aisalaeli,
pakuti ŵalakwewo ŵayice kukwawombola ŵandu ŵakwe.
69Ŵatutumicisye Mkulupusyo jwamacili jwa mu lukosyo lwa Daudi jwakutumicila jwakwe.
70Ayi ni yiŵaŵecete jwalakwejo
kupitila mwa ŵakulocesya ŵaswela ŵakalakala
71kuti tacitukulupusya kwa amagongo ŵetu,
soni kwa wosope ŵakusatuŵenga uwe.
72Ŵatesile cilanga cakuti tacasalalila mtima acinangolo ŵetu ŵakala,
ni kucikumbucila cilanga cakwe.
73Mlungu ŵamsalile mu cilanga Abulahamu nangolo jwetu kuti
74Mlungujo tacitukulupusya uwe kwa amagongo ŵetu,
kuti kaneko tumtumicileje jwalakwejo mwangatenda woga,
75ni kutama ni mitima jakulungama
pa masiku gosope ga umi wetu.
76Sambano m'mwe mwanangu timcikolanjidwa ni Mlungu kuti mli jwakulocesya jwakwe,#Mala 3:1
ligongo timcilongolela pasogolo pa Ambuje
kukolosya cile matala gakwe.
77Timcamanyisya ŵandu ŵakwe ŵa Mlungu kuti,
Mlungu tacakulupusya
ni kwakululucila ulemwa* wawo.
78Umbone mtima wa Mlungu uli wekulungwa,
tacitutumicisya lilanguka lya lyuŵa kundaŵi
kutyocela kwinani.
79Lilanguka lyakwe tilicamulicila ŵandu wosope
ŵakutama mu cipi soni ŵele ŵakogopa ciwa
soni tilicitulongolela uwe mu litala lya mtendele.#Yes 9:2
80Yohane jwakusile mu usimu mwakulimbangana. Kaneko ŵajile kukutama ku cipululu mpaka pijakwanile ndaŵi jakuti alilosye kwa Aisalaeli.
Currently Selected:
Luk 1: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
