Gen 12
12
Mlungu akumŵilanga Abulamu
1Lisiku line AMBUJE* ŵatite kwa Abulamu, “Mtyoce mcilambo cenu cino, mwalece acalongo acimjenu ni liŵasa lya baba ŵenu, nipo mjawule ku cilambo citinamlosye.#Mase 7:2-3; Aheb 11:8 2M'mwejo timciŵa nangolo jwa mtundu wawukulungwa. Tinjimpa upile nipo lina lyenu tiliciŵa lyakupikanika, mwakuti m'mwejo timciŵa upile kwa ŵandu ŵane.
3Tinjapa upile ŵandu wosope ŵakumpa m'mwejo upile,#Agal 3:8
nambo tinjimlwesa mundu jwalijose jwakumlwesa m'mwejo.
Kupitila mwa m'mwejo tinjijipa upile mitundu josope.”
4Abulamu piŵaliji ni yaka 75, ndaŵi jiŵatyokaga ku Halani mpela mwele AMBUJE ŵamlamulile. Nipo Loti jwa mpwawo ŵalongene nawo pamo. 5Abulamu ŵamjigele Salayi ŵamkwawo kwisa soni Loti, ni cipanje cakwe cosope ciŵakwete, pamo ni ŵamasengo ŵakwe wosope ŵiŵaliji nawo ku Halani, ni ŵawutandite ulendo ŵakwawula ku Kenani.
Piŵayice ku Kenani, 6Abulamu ŵacijendele cilambo cosopeco mpaka ŵajile kwika ku Shekemu, ku citela ca mtundu ku Mole. (Pa ndaŵi jelejo ŵandu ŵa mtundu wa Akenani ŵaliji ciŵela mcilambomo). 7AMBUJE ŵawonecele Abulamu ni ŵatite, “Tinjicipeleka cilambo celeci kwa yisukulu yenu.” Kaneko Abulamu ŵataŵile pa malo gelego malo gakupelecela mbopesi, kwataŵila AMBUJE ŵiŵamwonecelewo.#Mase 7:5; Agal 3:16 8Panyuma pakwe ŵatyosile pa malopo ni ŵajawile ku matumbi ga kungopoko lyuŵa kwa Beteli, ni ŵataŵile tenti jawo pasikati pa musi wa Beteli ni musi wa Ai. Pelepa ŵataŵile malo gakupelecela mbopesi ni ŵamlambile AMBUJE. 9Abulamu ŵapelengenye ulendo wakwe panandipanandi, kwinjilila cakum'mwela kwa cilambo ca Kenani.
Abulamu ku Iguputo
10Mcilambo ca Kenani mula jagwile sala. Nambo ligongo lyakuti salajo jakusile mnope, Abulamu ŵapelengenye nditu ulendo wakwe kwinjilila cakum'mwela, mpaka ŵajile kwika ku Iguputo, ni ŵatemi kweleko. 11Ali asigele panandi kwinjila mu Iguputo, Abulamu ŵatite kwa ŵamkwawo kuti, “Ngumanyilila kuti m'mwejo mli ŵakongwe ŵakusalala mnope, 12ni pitakamwone ŵandu ŵa ku Iguputo takaganisye kuti m'mwejo mli ŵamkwangu, myoyo sambano takambulaje une kuti akamlombe m'mwejo. 13Myoyo ngumŵenda kuti conde, mkasalileje kuti mli mlumbu jwangu. Nipo yindu yosope tiyikanjendele cenene ligongo lya m'mwejo, ni takandece une jwacijumi, nambo soni takambocele cenene.”#Gen 20:2; 26:7 14Abulamu piŵajombwece malile kwinjila mu Iguputo, Aiguputo ŵalolite kuti ŵamkwawo Abulamu ŵaliji ŵakusalala mnope. 15Nduna sya Mwenye jwa ku Iguputo pisyam'weni jwamkongwejo, syajile kumsalila Mwenye jwa ku Iguputo yakusalala kwa jwamkongwejo. Myoyo ŵandu ŵala ŵamjigele jwamkongwejo kuja kukumŵika ku nyumba ja Mwenye jwa ku Iguputo. 16Mwenye jwa ku Iguputo ŵamtendele Abulamu yindu yambone yejinji ligongo lya jwamkongwejo, ŵampele ngondolo, ng'ombe, acibulu, ngamila* ni kwisa soni acikapolo ŵacalume ni ŵacakongwe.
17Nambo AMBUJE ŵapelece yilwele yakogoya pa Mwenye jwa ku Iguputo ni pa ŵandu wosope ŵa m'nyumba ja ucimwene, ligongo lya Salayi ŵamkwawo Abulamu. 18Mwenye jwa ku Iguputo ŵamŵilasile Abulamu ni kumwusya kuti, “Ana m'mweji, cici cimundendele uneji? 19Ligongo cici mwasalile une kuti ali alumbu ŵenu kuti une nalombe? Ŵamkwenu aŵa mwajigale, nipo mtyoce.” 20Myoyo Mwenye jwa ku Iguputo ŵasalile ŵandu ŵakwe kuti amkunde Abulamu ni Salayi kuti ajigale katundu jwawo ni kuti atyoce mcilambomo.
Currently Selected:
Gen 12: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
