Gen 11
11
Sanja ja ku Babiloni
1Pandanda ŵandu wosope ŵa pa cilambo capasi ŵaliji mkuŵeceta ciŵeceto cimo, nipo ŵandu ŵaliji mkukamulisya masengo maloŵe ga ciŵeceto cimoco. 2Piŵasamile kwinjilila ca kungopoko lyuŵa, ŵajile kwika mwilambo line lyakwe lya ku Babiloniya ni ŵatamilicice kweleko. 3Myoyo ŵasalilene ŵanduwo kuti, “Kwende tugumbe njelwa ni kusijoca.” Myoyo m'malo mwa maganga ŵajigele njelwa ni kusikamulisya masengo, ni ŵalitaŵile lipupalyo ni lipula m'malo mwa matope. 4Ni ŵatite, “Kwende sambano tutaŵe msinda wetu, nipo sanja jakwe jilewupe mpaka kwinani. Naga tukutenda yeleyi tuciŵa ŵandu ŵakupikanika nditu, nipo ngasitubalalika soni pa cilambo capasi.”
5Nipo AMBUJE* ŵatulwice kwisa kuwulola msindawo pamo ni sanjajo, jiŵaliji mkutaŵa ŵandu ŵala. 6Ni AMBUJE ŵatite, “Sambano ŵanduŵa ali mtundu umo, soni akuŵeceta ciŵeceto cimo. Yindu yakutendayi ni kutanda kwa yindu yitaciyitenda. Kaneko tatendeje yindu yiliyose yitasaceje kuyicitenda. 7Kwende tutuluce kuti tukacisokonesye ciŵeceto cawo kuti akusapikanganana jwine ni mjakwe.” 8Myoyo AMBUJE ŵapwilingenye ŵandu pa cilambo capasi, nipo jemanjajo ŵalesile kutaŵa msindawo. 9Myoyo msindawo ŵawupele lina lyakwe Babiloni,* ligongo kweleko AMBUJE ŵacisokonesye ciŵeceto ca pa cilambo capasi, nipo kutyocela kweleko AMBUJE ŵapwilingenye ŵandu pa cilambo cosope capasi.
Yisukulu ya Shemu
(1 Mbi 1:24-27)
10Ayi ni yipago yakuwumila kwa Shemu. Pali papite yaka yiŵili cili cimasile cigumula, Shemu ali jwa yaka 100, ŵakwete mwanace jwamlume lina lyakwe Alipakisadi. 11Ali apali Alipakisadi, Shemu ŵatemi yaka yine soni 500. Ni ŵakwete soni ŵanace ŵane ŵacalume ni ŵacakongwe.
12Pa ndaŵi jele Alipakisadi ŵaliji ni yaka 35, ŵakwete mwanace jwamlume lina lyakwe Shela. 13Ali apagwile Shela, Alipakisadi ŵatemi yaka 403. Ni ŵakwete soni ŵanace ŵane ŵacalume ni ŵacakongwe.
14Shela piŵaliji ni yaka 30 ŵakwete jwamlume lina lyakwe Eba. 15Ali apagwile Eba, Shela ŵatemi soni yaka yine 403. Ni ŵakwete soni ŵanace ŵane ŵacalume ni ŵacakongwe.
16Eba piŵaliji ni yaka 34 ŵakwete mwanace jwamlume lina lyakwe Pelegi 17Ali apagwile Pelegi, Eba ŵatemi soni yaka yine 430. Ni ŵakwete soni ŵanace ŵane ŵacalume ni ŵacakongwe.
18Pelegi piŵaliji ni yaka 30, ŵakwete mwanace jwamlume lina lyakwe Lewu. 19Ali apagwile Lewu, Pelegi ŵatemi soni yaka yine 209. Ni ŵakwete soni ŵanace ŵane ŵacalume ni ŵacakongwe.
20Lewu piŵaliji ni yaka 32, ŵakwete mwanace jwamlume lina lyakwe Selugi. 21Ali apagwile Selugi, Lewu ŵatemi soni yaka yine 207. Ni ŵakwete soni ŵanace ŵane ŵacalume ni ŵacakongwe.
22Selugi piŵaliji ni yaka 30, ŵakwete mwanace jwamlume lina lyakwe Naholi. 23Ali apagwile Naholi, Selugi ŵatemi soni yaka yine 200. Ni ŵakwete soni ŵanace ŵane ŵacalume ni ŵacakongwe.
24Naholi piŵaliji ni yaka 29, ŵakwete mwanace jwamlume lina lyakwe Tela. 25Ali apagwile Tela, Naholi ŵatemi soni yaka yine 190. Ni ŵakwete soni ŵanace ŵane ŵacalume ni ŵacakongwe.
26Tela piŵaliji ni yaka 70, ŵaliji ali akwete ŵanace aŵa: Abulamu, Naholi ni Halani.
Yisukulu ya Tela
27Ayi ni yisukulu ya Tela. Tela ŵakwete ŵanace ŵacalume ŵatatu aŵa, Abulamu, Naholi ni Halani. Halani ŵakwete mwanace jwamlume lina lyakwe Loti. 28Halani ŵawilile mu msinda wakumangwawo lina lyakwe Ulu, mcilambo ca Babiloniya. Ŵawile baba ŵawo ali ciŵela umi. 29Abulamu ŵalombele Salayi, nipo Naholi ŵalombele Milika mwanace jwamkongwe jwa Halani juŵaliji soni babagwe jwa Isika. 30Salayi ŵaliji ŵangali ŵanace ligongo ŵaliji ŵangaŵeleka.
31Tela ŵamjigele Abulamu mwanagwawo ni Loti cisukulu cawo, juŵaliji mwanace jwa Halani, ni Salayi mkwegwe gwawo, ŵamkwawo Abulamu. Ŵanyakwice ulendo kutyoka mu msinda wa Ulu, wa ku cilambo ca Babiloniya kuja ku cilambo ca Kenani. Nambo piŵayice ku Halani, ŵagambile kutamilicika kukoko. 32Nipo Tela ŵawilile ku Halani kukoko ali ŵa yaka 205.
Currently Selected:
Gen 11: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
