Gen 13
13
Kulekangana kwa Abulamu ni Loti
1Myoyo Abulamu ŵatyosile ku Iguputo ni ŵamkwawo ni yosope yiŵakwete, pamo ni Loti kwinjililaga kum'mwela kwa cilambo ca Kenani. 2Ndaŵi jeleji Abulamu ŵasicile kwejinji. Ŵakwete ngondolo, mbusi ni ng'ombe syejinji, nambo soni silifa* ni golidi* jwamjinji. 3Ŵajesile mpaka ku Beteli pa malo pagaliji masakasa gawo pandanda, cilikati ca musi wa Beteli ni musi wa Ai, 4piŵataŵile soni malo gakupelecela mbopesi pandanda. Pelepo soni Abulamu ŵalambile AMBUJE.*
5Nipo Loti nombe najo juŵaliji mkwenda pamo ni Abulamu, ŵakwete soni ngondolo, ng'ombe, masakasa pamo ni liŵasa lyakwe ni ŵamasengo ŵakwe ŵiŵatamaga nawo. 6Nambo malo gakulicisya yilangwa galiji gamnono, gangakwanila kwa ŵandu ŵaŵiliwo, ligongo jwalijose ŵakwete yilangwa yejinji. 7Ayi yatendesye kuti paŵe kukangana pasikati pa ŵakucinga yilangwa ya Abulamu ni ŵakucinga yilangwa ya Loti. (Ndaŵi jelejo ni kuti Akenani ni Apelesi ŵaliji ciŵela mcilambomo).
8Abulamu ni ŵatite kwa Loti, “M'mwejo ni une tuli pa ulongo, myoyo pakaŵa kangana pasikati pa m'mwejo ni une, soni ŵakucinga yilangwa ŵenu ngakwenela kukangana ni ŵakucinga yilangwa ŵangu. 9Kwende tulekangane, msagule mbali jilijose ja cilambo cino jimkusosa kutama. Naga mjinjilile ku mciji une tinjinjilile kumlyo. Naga mjinjilile kumlyo, une tinjinjilile kumciji.”
10Loti ni ŵalolite ni ŵayiweni kuti ciŵata cosope ca mu Lusulo lwa Yolodani mpaka ku Sowali cakwete mesi gamajinji mpela mgunda wa AMBUJE, soni mpela cilambo ca Iguputo. Jele ndaŵiji AMBUJE ŵaliji mkanajonanje misinda ja Sodomu ni Gomola.#Gen 2:10 11Loti ŵasagwile ciŵata cosope ca Yolodani, ni ŵajile kutama kungopoko lyuŵa. Amu ni muŵalekanganile ŵandu ŵaŵiliwo. 12Abulamu ŵatemi mcilambo ca Kenani. Nambo Loti ŵatamilicice pasikati pa misinda ja m'Ciŵata ca Yolodani, ni ŵataŵile tenti paciŵandika ni msinda wa Sodomu. 13Ŵandu ŵa mu msindawo ŵaliji ŵandu ŵakusakala mnope, nipo ŵiŵaliji mkwalemwecesya AMBUJE mnope.
Abulamu akuja ku Hebuloni
14Loti ali atyosile, AMBUJE ŵamsalile Abulamu kuti, “Mlolecesye cenene kutyocela pamlipo, kumpoto, kum'mwela, kungopoko lyuŵa ni kungapilo lyuŵa. 15Tinampe m'mwejo pamo ni yisukulu yenu cilambo cosope cimkuciwonaco. Ni ticiciŵa cilambo cenu kwa mpaka kalakala.#Mase 7:5 16Tinjimpa yisukulu yejinji mpela luwundu. Nipo pangali mundu jwalijose jutaciyikombola kuyiŵalanga. 17Nyakukani, mjendele cilambo cosopeci, ligongo tinacipelece cosopeci kwenumwe.” 18Myoyo Abulamu ŵatyosisye tenti jakwe, ni ŵajile kutama mwakuŵandikana ni yitela ya mtundu ya ku Mamule yayili mwakuŵandikana ni msinda wa Hebuloni. Kweleko soni ŵataŵile malo gakwatajila mbopesi AMBUJE.
Currently Selected:
Gen 13: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
