Mase 8

1Saulo* jula ŵaliji mkwiticisyana nako kuwulaga kwamti myiyiku.

Saulo ŵatandite kuwulagasya mpingo

Lisiku lyelelyo mpingo wa ku Yelusalemu ŵatandite kulaga mnope, nipo wosope kutyosya ŵandumetume pewo, ŵapwilinganile myilambo ya Yudeya ni Samaliya. 2Ŵandu ŵakumnonyela Mlungu ŵamsicile Sitefano mwilembe ni ŵalisile mnope ligongo lya malilo gakwego.

3Nambo Saulo ŵala ŵaliji mkonanga mpingo. Ŵajinjilaga m'nyumba sya ŵandu, ni kwakamulaga acalume ni acakongwe wakwe ni kuja kwaŵika ku ukayidi.#Mase 22:4-5; 26:9-11

Filipi ŵalalicile Ngani Syambone ku Samaliya

4Sambano ŵiŵapwilingenewo ŵapite posepose ali mkulalicilaga Ngani Syambone.* 5Nipo Filipi ŵapite ku msinda wa ku Samaliya, ni ŵaliji mkwalalicila ŵandu ŵakweleko ngani sya Yesu* Klistu.* 6Ŵandu ŵajinji ŵa mtima umo ŵatejelaga mapikanilo gawo kwa yele Filipi yiŵaŵecetaga. Wosope ŵapikanaga maloŵe gakwe ni kuyiwonaga yimanyisyo yakusimonjesya yiŵatendaga. 7Pakuŵa misimu jakusakala* jakopokaga mwa ŵandu ŵajinji ŵele ŵiŵakamwilwe najo, ni jagumilaga mnope. Nipo soni ŵajinji ŵiŵaliji ŵawe yiŵalo ni ŵalemale, ŵapolaga. 8Myoyo mwaliji kusangalala kwakukulungwa mnope mu msindamo.

9Nambo mu msindamo mwapali mundu jwine lina lyakwe Simoni,* jweleju kala ŵatendaga matipwi ni ŵasimonjesyaga ŵandu wosope ŵa ku Samaliyako. Jweleju ŵalitesile kuŵa mundu jwamkulungwa ni kupikanika. 10Ŵandu wosope, ŵanace ni acakulungwa ŵakwe, ŵampikanilaga ni kumkuyaga aciŵecetaga kuti, “Jweleju akwete macili ga Mlungu gakolanjidwa, ‘Macili gamakulungwa.’ ” 11Ŵamkuyaga ligongo pa ndaŵi jajikulungwa ŵaliji mkwasimonjesya ni matipwi gakwego. 12Nambo Filipi piŵalalicilaga Ngani Syambone syakusala ya Ucimwene wa Mlungu* nipo soni lina lya Yesu Klistu, ŵandu ŵakulupilile, nipo ŵabatisidwe acalume ni acakongwe wakwe. 13Nombe najo Simoni jula ŵakulupilile, nipo ali abatisidwe, ŵatamaga pampepe ni Filipi. Ŵasimonjile pakuyiwona yimanyisyo ni yakusimonjesya yele yiyaliji mkutendecekwa.

14Piŵapikene ŵandumetume ŵiŵatamaga ku Yelusalemu kuti, ŵandu ŵa ku Samaliya apocele maloŵe ga Mlungu, ŵatumicisye Petulo* ni Yohane.* 15Piŵayice jemanjajo, ŵapopelele ŵiŵakulupililewo kuti apocele Msimu Ŵaswela. 16Pakuŵa Msimu Ŵaswela ŵaliji mkaniŵayicilile jemanjajo. Wosopewo ŵaliji ali agambile kubatisidwa mu lina lya Ambuje Yesu. 17Sambano Petulo ni Yohane ŵasajice magasa, nipo ŵapocele Msimu Ŵaswela.

18Simoni jula piŵayiweni kuti Msimu Ŵaswela apelecedwe kwa ŵandu ŵala ligongo lyakwasajika magasa ŵandumetume, ni ŵasacile kuti ŵape mbiya ŵandumetumewo. 19Ŵatite, “Mumbe none macili gelega, kuti jwalijose jwatingamsajiceje magasa gangu nombe najo akapocele Msimu Ŵaswela.” 20Petulo ŵamjanjile kuti, “Mkajonasice pampepe ni mbiya syenu. Ana m'mwe mkuganisya kuti mpaka mkombole kupata mtuka wa Mlungu pakupeleka mbiya. 21Nganimkola kose mbali atamose malo pa masengo gelega, pakuti mtima wenu uli ŵangalumbana pameso pa Mlungu. 22Mpitikuce mtima sambano mlece ungalumbana wenu ni mpopele kwa Ambuje, kuti mwine mwakwe amkululucile nganisyo sya mu mtima mwenu. 23Pakuŵa nam'weni kuti mli ŵagumbalidwe ni ndulu ja kuŵaŵa ni soni mli ŵataŵidwe ni unyolo wa ulemwa.”*

24Pelepo Simoni jula ŵatite, “Mumbopelele jemanja kwa Ambuje kuti yele yimŵeceteyi yikasiyingwila.”

25Petulo ni Yohane ali amasile kupeleka umboni wawo ni kulalicila maloŵe ga Ambuje, ŵawujile ku Yelusalemu. Piŵawujagapo mwitala ŵaliji mkulalicila Ngani Syambone* m'misi jejinji ja ku Samaliya.

Filipi ni nduna ja cipanje ja ku Ifiyopiya

26Lilayika lya Ambuje lyamsalile Filipi kuti, “Mjawule cakum'mwela, pakukuya msewu wakwawula ku Gasa kutyocela ku Yelusalemu, msewu wakupita mcipululu.” 27-28Myoyo Filipi ŵaliŵicile cile ni ŵapite. Sambano mundu jwine jwamcele jwa ku Ifiyopiya, juŵaliji nduna jekulungwa jakulolela yipanje ya mwenye jwamkongwe jwa ku Ifiyopiya ŵaliji pa ulendo wa kuja kumangwakwe. Jwalakweju jwaliji ku Yelusalemu kukupopela nipo jwakwesile ligeleta lyakwe. Piŵaliji ali mkwenda, ŵaŵalangaga kutyocela mu buku ja jwakulocesya Yesaya. 29Msimu Ŵaswela ŵamsalile Filipi kuti, “Mjawule, mkaŵandicile ligeletalyo.” 30Nipo Filipi ŵajiwutucile nduna jila, ni ŵajipikene jili mkuŵalanga buku ja ŵakulocesya Yesaya. Nipo ŵajiwusisye kuti, “Ana mkuyipikana yele yimkuŵalangayi?”

31Jwalakwe ŵatite, “Ana tinayipikane uli pali pangali jwine jwakungopolela?” Papopo ŵamŵilasile Filipi kuti akwele ni kutama yalumo mwigeletamo. 32Maloŵe ga m'Malemba gele giŵaŵalangago ni aga:

“Jwalakwe ŵaliji mpela ngondolo jakujilongosya kuti akajiwulaje,#Yes 53:7-8

soni mpela mwanace jwangondolo jwagamba kutama

jii ndaŵi jakumsenga.

Nganaŵeceta kose kandu.

33Ŵamnyosisye,

pa magambo gakwe nganamtendela yacilungamo.

Pangali mundu jutacipakombola kusimba ya yisukulu yakwe,

pakuti umi wakwe watyosile pa cilambo capasi.”

34Nduna jila jatite kwa Filipi, “Musalile, ana jwakulocesya* jweleju akwamba ŵani, ya msyene pejo, pane ya mundu jwine?” 35Pelepo Filipi ŵatandite kumlalicila Ngani Syambone* sya Yesu kutandila pa malemba gelega. 36Piŵaliji mkwenda mu msewumo, ŵayice pane pagaliji mesi. Nduna jila jatite, “Mesi ngati aga, nambi cakulekasya kuti une ngabatisidwa ni cici?” 37[Filipi ŵamjanjile kuti, “Takombolece kubatisidwa naga akukulupilila ni mtima wawo wosope.” Jwalakwe jwatite, “Ngukulupilila kuti Yesu Klistu ali Mwanace jwa Mlungu.”]

38Pelepo ndunajo jalamwile kuti ligeletalyo lijime. Ŵana ŵaŵiliwo, Filipi ni nduna jila wosope ŵatululwice ni ŵapite kugaliji mesi kula, nipo Filipi ŵajibatisye ndunajo. 39Piŵacuwice m'mesi mula, mwacisisimucisya Msimu Ŵaswela ŵamtyosisye Filipi. Nipo ndunajo nganamwona soni Filipi jula, nambo ŵapitilisye ulendo wakwe alimkusangalala. 40Filipi ŵasisimwice ali kwa Asoto. Piŵajendaga ŵalalicilaga Ngani Syambone m'misinda josope mpaka ŵayice ku Kaisaleya.

Currently Selected:

Mase 8: YAWO

Highlight

Copy