Mase 9

Saulo akupitikuka mtima

(Mase 22:6-16; 26:12-18)

1Saulo* jula jwaliji mkwajogoyape ŵakulijiganya* ŵa Ambuje ni ŵasosaga kwawulaga. Ŵapite kwa jwamkulungwa jwa ŵakutaga mbopesi.* 2Kukuŵenda yikalata yakuti ajawule nayo ku nyumba syakupopelela sya ku Damasiko. Ŵasakaga kuti naga akasimane ŵane ŵakukuya litala* lya Ambuje, acalume kapena acakongwe akataŵe ni kwawula nawo ku Yelusalemu.

3Piŵaliji pa ulendo ŵakwewo, ali aŵandicile msinda wa Damasiko wula, mwacisisimucisya, lilanguka lyakutyocela kwinani lyamsyungulile. 4Jwagwile pasi ni ŵapikene maloŵe gakuti, “Saulo, Saulo, mkusawucisya cici une?”

5Jwalakwe ŵawusisye kuti, “Ana ŵalakwe ŵani, Ambuje?”

Ni ŵajanjile kuti, “Une Yesu* jumkusawusya! 6Nambo jimukani, mjinjile mu msindamo ni takamsalile yakutenda.” 7Ŵandu ŵiŵaliji najo pa ulendo ŵala ŵagambile kwima jii ngaŵeceta kandu kalikose. Ŵapikanaga maloŵe nambo ngamwona kose mundu. 8Saulo ŵajimwice, nambo piŵawunukwile m'meso mwakwe, nganakombola kulola kandu kalikose. Sambano acimjakwe ŵala ŵamkamwile pa mkono ni ŵajinjile najo mu Damasiko. 9Kwa masiku gatatu, ŵatemi ali ngakulola nipo soni ngalya kapena kumwa kandu kalikose.

10Ku Damasikoko kwapali jwakulijiganya jwine lina lyakwe Ananiya. Jweleju ŵaweni Ambuje kupitila m'mesomkulola ali mkumŵilanga kuti, “Ananiya!” Ni jwajanjile kuti, “Ndili apano Ambuje.”

11Ambuje ŵamsalile kuti, “Mjawule litala lya mu msindamo, likuŵilanjidwa, ‘Litala lya Goloka.’ Nipo ku nyumba ja Yudasi mkawusye mundu jwa ku Talisasi lina lyakwe Saulo, akupopela pa ndaŵi jinojino. 12Pakuŵa am'weni m'mesomkulola mundu jwine, lina lyakwe Ananiya ali mkwinjila kukumsajika magasa kuti alole soni.”

13Ananiya ŵatite, “Ambuje, ŵandu ŵajinji asalile ya mundu jweleju, kuti ŵatendele ŵandu ŵenu yakusakala yejinji ku Yelusalemu. 14Soni ayice akuno ni ulamusi wakutyocela kwa acakulungwa ŵa ŵakutaga mbopesi kuti ŵataŵe ŵandu wosope ŵakulumba lina lyenu.”

15Nambo Ambuje ŵamsalile kuti, “Mjawule, pakuti jweleju sambano ali jwakutumicila jwangu, junamsagwile kuti akalalicile ya lina lyangu kwa ŵandu ŵa mitundu jine,* ayimwene, nipo soni Aisalaeli. 16Une namsyene tinjimlosya jwalakwejo yipwetesi yosope yikwenela kuti ayipikane ligongo lya une.”

17Pelepo Ananiya ŵajimwice ni ŵapite kwinjila m'nyumbamo. Ni ŵamsajice magasa gakwe pa mtwe pa Saulo acitiji, “Mlongo mjangu Saulo, Ambuje Yesu ŵele ŵiŵamwonecele petala limwapitile lila, andumile kuti mlole soni, nipo kuti mpocele ni gumbalidwa ni Msimu Ŵaswela.” 18Papopo m'meso mwakwe mwagwile yindu yamti mpela maŵamba ga somba, nipo ŵatandite kulola soni. Ŵajimi ni ŵabatisidwe; 19piŵamasile kulya ŵapatile soni macili.

Saulo ŵalalicile ku Damasiko

Saulo ŵatemi masiku gakuŵalanjika pamo ni ŵakulijiganya ŵa ku Damasiko. 20Nipo mwangakaŵilisya ŵatandite kulalicila m'nyumba sya mapopelo* sya Ayuda acitiji, Yesu ni Mwanace jwa Mlungu.

21Ŵandu wosope ŵiŵapikene maloŵe gakwe ŵasimonjile, ni ŵawusyene kuti, “Ana jweleju ngaŵa julajula juŵaliji mkuwulaga ŵandu ŵakulumba lina lyeleli ku Yelusalemu? Ana jweleju ngaŵa ayice akuno kuti ŵataŵe ŵandu mpela ŵeleŵa ni kuja kwapeleka kwa acakulungwa ŵa ŵakutaga mbopesi?” 22Nambo macili ga Saulo galiji mkulilakulila, nipo ŵamasisye lunda Ayuda ŵiŵatamaga ku Damasiko pakwasimicisya kuti Yesu kweli ni Mkulupusyo nditu.

Saulo ŵatisile Ayuda

23Gali gapite masiku gejinji, Ayuda ŵapangene kuti amwulaje Saulo,#2 Akoli 11:32-33 24nambo ŵandu ŵane ŵamsalile Saulo ya ciswambaco. Ŵandu ŵaciswambawo ŵaliji mkulondela yipata ya mu msindawo musi ni cilo kuti amwulaje. 25Nambo ŵakulijiganya ŵakwe ŵamjigele cilo ni kumtulucisya kusa kupitila pa mpata wa malo gakuciga ni lipupa mlukalala.

Saulo ku Yelusalemu

26Saulo piŵayice ku Yelusalemu, ŵalinjile kwinjila mu mpingo* wa ŵakulijiganya ŵala. Nambo wosope ŵatesile najo woga, nganakulupililaga kuti nombe najo soni ali jumo jwa ŵakulijiganya. 27Nambo Banaba ŵamjigele ni ŵapite najo kwa ŵandumetume. Jwalakwe ŵasalile jemanjajo yiŵatite Ambuje pakumwonecela Saulo petala pala, nipo kuti Ambuje ŵaŵecete najo. Ŵasalile soni yiŵatesile Saulo pakulalicila mwakulimba mtima ku Damasiko mu lina lya Yesu. 28Sambano Saulo ŵatemi nawo, nipo ŵapite palipose mu Yelusalemumo acilalicilaga mwakulimba mtima mu lina lya Ambuje. 29Ŵaŵacete soni mwangajogopa pakusisyana nawo Ayuda ŵakuŵeceta Cigiliki,* nombe nawo soni ŵasakaga kuti amwulaje. 30Piŵapikene acalongo acimjakwe yeleyi, ŵapite najo ku Kaisaleya nipo ŵamtumisye ku Talisasi.

31Pelepo mpingo wa ku Yudeya, ku Galileya ni ku Samaliya waliji pa mtendele. Ŵatamilicice, nipo ŵandu ŵajinji ŵajinjile mu mpingomo ligongo ŵandu ŵakwe ŵajendaga mwakwajogopa Ambuje, nipo Msimu Ŵaswela walimbikasyaga.

Petulo ŵamposisye Aineasi

32Ndaŵi jele Petulo* ŵajendelaga ŵandu ŵa Mlungu, ŵayice kwa ŵele ŵiŵatamaga ku Lida. 33Kweleko ŵamsimene mundu jwine, lina lyakwe Aineasi juŵagonile pa ugono yaka msano ni yitatu ali ŵawe yiŵalo yakwe. 34Sambano Petulo ŵamsalile kuti, “Aineasi, Yesu Klistu* akumposya m'mwejo. Mjimuce, mtandukule ugono wenu.” Papopo jwalakwejo jwajimwice. 35Ŵandu wosope ŵakutama ku Lida ni ku Shaloni ŵam'weni, ni ŵakulupilile Ambuje.

Petulo ŵamjimwisye Dolika ku ŵawe

36Ku Yopa kwapali jwakulijiganya jwamkongwe lina lyakwe Tabita (pa Cigiliki akusati Dolika). Ndaŵi josope masengo gakwe galiji kutenda yambone ni kwakamucisya ŵandu ŵakulaga. 37Masiku gelego jwamkongwejo jwalwalaga ni jwawile, ŵandu ŵajojesye mtembo wakwe ni wawugonece mcipinda m'nyumba ja mwinani. 38Ku Yopa kwaliji kwakuŵandikana ni ku Lida, ŵatumile ŵandu ŵaŵili kuti akamsalile kuti, “Conde ajanguye, ayice kumangwetu kuno.” 39Pelepo Petulo ŵalongene nawo pampepe. Piŵayice, ŵampecesye ku cipinda ca mwinani cila. Acakongwe ŵamasije* wosope, ŵamsyungulile acililaga ni mkulosyaga malaja ni yakuwala yine yiŵatotile Dolika ali cijumi. 40Petulo ŵatesile ŵanduwo kuti atame pasa, nipo ŵatindiŵele ni ŵapopesile. Kaneka ŵawugalawucile mtembowo ni ŵatite, “Tabita, mjimuce!” Pelepo Tabita ŵawunikwile meso gakwe, nipo ali am'weni Petulo ŵatemi njoo. 41Petulo ŵamkamwile mkono ni kumjimika. Nipo ŵaŵilasile wosope ŵandu ŵa Mlungu ni acakongwe ŵamasije ŵala, ni kumpeleka Dolika jula kwa jemanjajo ali jwacijumi. 42Ngani jeleji japikanice ku Yopa nipo ŵandu ŵajinji ŵakulupilile Ambuje. 43Petulo ŵatemi ku Yopa masiku gejinji kwa mundu jwinepe lina lyakwe Simoni,* m'misili jwa mapende.

Currently Selected:

Mase 9: YAWO

Highlight

Copy