Mase 7

Maloŵe ga Sitefano

1Jwamkulungwa jwaŵakutaga mbopesi, ŵamwusisye Sitefano kuti, “Ana yakuŵeceta ŵanduyi yakuwona?”

2Sitefano ŵajanjile kuti, “Acalongo acimjangu ni acatati wosope, mumbikanile une. Mlungu jwa lumbili ŵamwonecele nangolo jwetu Abulahamu* piŵaliji ku Mesopotamiya mkanajawule kukutama ku Halani.#Gen 12:1 3Ni ŵamsalile kuti, ‘Mtyoce mcilambo cenu nipo soni mwalece acalongo acimjenu, mjawule ku cilambo cicinamlanjileco.’ 4Pelepo ŵakopwece mcilambo ca Akalideya ni ŵatemi ku Halani. Piŵawile babawo, Mlungu ŵatyosisye kweleko, ni ŵaŵisile mcilambo acino cele cimkutamaci.#Gen 11:31; 12:4 5Mlungu nganampa Abulahamu kadela kakanandi mcilambomo kuti kaŵe kakwekakwepe. Nambo ŵatesile cilanga* kuti tacimpa cilamboco kuti ciŵe cakwecakwepe kwika soni yisukulu yakwe, atamose kuti pa ndaŵi jelejo ŵaliji ŵangali mwanace.#Gen 12:7; 13:15; 15:18; 17:8 6Mlungu ŵaŵecete kuti, ‘Yisukulu yenu tiyicija kutama ku cilambo ca cilendo, kweleko taciŵa acikapolo nipo tacasawusya kwa yaka 400.’#Gen 15:13-14 7Mlungu ŵatite, ‘Tinjipeleka cilango ku mtundu wele wutaciwutumicilaga. Panyuma pakwe tacikopoka mcilambomo ni kwisa kukulambila une pa malo aganogano.’#Eks 3:12 8Sambano Mlungu ŵatesile cilanga ni Abulahamu, nipo cimanyisyo cakwe caliji kuwumbala.* Abulahamu ŵawumbesye Isaki ali ni masiku msano ni gatatu gakupagwa. Isaki ŵawumbesye Yakobo,* nipo Yakobo ŵawumbesye ŵanace ŵakwe 12 ŵala, ŵali acinangolo ŵetu.#Gen 17:10-14; 21:2-4; 25:26; 29:31—35:18

9“Acinangolo ŵetuwo ŵamtendele wiwu Yosefe mpwawojo nipo ŵamsumisye kuti akaŵe kapolo ku Iguputo. Nambo Mlungu ŵaliji najo,#Gen 37:11, 28; 39:2, 21 10mwakuti ŵamkopwesye myisawusyo yakwe yosope. Ŵampele lunda ni ndamo syambone pameso pa Mwenye jwa ku Iguputo,* Mwenye jwa ku Iguputo, mwakuti mwenyejo ŵamŵisile Yosefejo kuti aŵe bwanamkubwa* jwa cilambo cosope ca Iguputo nipo soni nyumba jwakwe ja ucimwene josope.#Gen 41:39-41 11Sambano jayice sala mcilambo cosope ca Iguputo nipo soni ku Kenani, kwakuti ŵandu ŵaliji mkulaga mnope. Nombe nawo acinangolo ŵetu nganakombolaga kupata yakulya.#Gen 42:1-2 12Nipo piŵapikene Yakobo kuti ku Iguputo kwana tiligu, ŵatumile acinangolo ŵetu ŵala nipo welewu waliji ulendo wandanda. 13Pa ulendo wawo waŵili, Yosefe ŵalilosisye kwa acakulugwe nipo ŵamanyisye Mwenye jwa ku Iguputo ya liŵasa lyosope.#Gen 45:1, 16 14Nipo Yosefe ŵatumisye utenga kwa Yakobo babagwe, kwasalila ŵelewo pamo ni liŵasa lyawo lyosope, kuti ayice ku Iguputo. Wosope pampepe ŵaliji ŵandu ŵakwana 75.#Gen 45:9-10, 17-18; 46:27 15Nipo Yakobo ŵajawile ku Iguputo, kweleko ni kuŵawilile pampepe ni acinangolo ŵetu.#Gen 46:1-7; 49:33 16Mitembo jawo ŵapite najo ku Shekemu, kweleko ni kuŵasicile mwilembe liŵasumile Abulahamu ni mbiya, kutyocela kwa ŵanace ŵa Hamoli ku Shekemu.#Gen 23:3-16; 33:19; 50:7-13; Yos 24:32

17“Pijaŵandicile ndaŵi jele Mlungu jiŵatesile cilanga ni Abulahamu, mtundu ŵetu ŵatupile ku Iguputo.#Eks 1:7-8 18Pambesi pakwe mwenye jwangam'manyilila Yosefe ŵatandite kulamulila ku Iguputo. 19Mwenyejo jwakalamucile ŵandu ŵa mtundu ŵetu ni kutanda kwalagasya acinangolo wetu, nipo ŵakanganicisye kuti ŵaleceje kusa ŵanace ŵawo ŵamakandi kuti amale kuwa.#Eks 1:10-11, 22 20Ndaŵi jeleji ni jiŵapagwile Mose,* soni jwaliji mwanace jwakusalala mnope. Ŵamlelite miesi jitatu acinangolo ŵakwe,#Eks 2:2 21ni ŵapite kuja kumjasa, mwanace jwamkongwe jwa Mwenye jwa ku Iguputo ŵamlokwete ni ŵamlelite mpelaga mwanace jwakwe.#Eks 2:3-10 22Mose ŵalijiganyisye lunda losope lwa ŵandu ŵa ku Iguputo nipo maloŵe gakwe ni masengo gakwe yaliji yamacili.

23“Piŵaliji ni yaka 40 yakupagwa, ŵaganisisye yakwajendela acalongo cimjakwe, Aisalaeli.#Eks 2:11-15 24Lisiku line ŵam'weni jumo jwa ŵandu ŵa ku Iguputoko ali mkulagasya m'Isalaeli, nipo Mosejo ŵamcenjele m'Isalaelijo ni kumwucisya m'Iguputojo pakumwulaga. 25Nambotu Mose ŵaganisyaga kuti ŵandu ŵa lukosyo lwakwe tacimanyilila kuti Mlungu ŵamsagwile jwalakwe kuti ayice kukwakulupusya, nambo jemanjajo nganamanyilila kose. 26Kundaŵi kwakwe Mose ŵaweni Aisalaeli ŵaŵili ali mkumenyana acimsyenepe. Ŵalinjile kwajilanya pakwasalila kuti, ‘Jemanja mli ŵa lukosyo lumpepe lwa Aisalaeli, ligongo cici mkulagasyana?’ 27Nambo jwawukolekojo jwamtutile Mose kumbali acitiji, ‘Ana ŵani ŵamŵisile kuti mŵe jwakutulamula ni jwakutujamuka jwetu? 28Ana mkusaka kumbulaga mpela yimwatesile pakumwulaga m'Iguputo jula liso?’ 29Nambo Mose piŵapikene maloŵega, ŵatisile kutyoka ku Iguputo ni ŵajawile kutama ku cilendo ku cilambo ca Midiyani. Kweleko ŵaŵeleceleko ŵanace ŵaŵili ŵacalume.#Eks 18:3-4

30“Sambano yili yimasile yaka 40, lilayika lyamwonecele Mose mu lilamba lya moto lili mkolela pewukutu, mcipululu cicaliji pakuŵandikana ni Litumbi lya Sinayi.#Eks 3:1-10 31Mose ŵasimonjile ni yiŵayiweniyo nipo ŵaŵandicile liwukutulyo kuti alolecesye. Pelepo ŵapikene liloŵe lya Ambuje licitiji, 32‘Une ndili Mlungu jwa acinangolo ŵenu. Mlungu jwa Abulahamu, Isaki ni Yakobo.’ Mose ŵatetemele ligongo lya woga mwakuti nganalimba soni mtima kuti akalolecesye. 33Apo Ambuje ŵamsalile kuti, ‘Mwule sapato syenu, ligongo malo gimkupondago gali gamaswela. 34Nakuweni nditu kulaga kwa ŵandu ŵangu ŵali ku Iguputo. Mbikene kulila kwawo, nipo yice kuti nakulupusye. Kwende sambano, namtume ku Iguputo.’

35“Mosejo ni julajula jwele Aisalaeli ŵala ŵamkanile acitiji kuti, ‘Ana ŵani ŵamŵisile kuti mŵe jwamkulungwa ni jwakutujamuka jwetu?’ Jujojo Mlungu ŵamtumile kuti aŵe jwamkulungwa ni Mkulupusyo kupitila mwa lilayika lilyawonecele pewukutu lila.#Eks 2:14 36Ŵalongolele ŵandu kutyocela ku Iguputo. Ŵatendaga yindu yakusimonjesya ni yimanyisyo ku Iguputo, pa Nyasa Jecejewu,* kwisa soni mcipululu kwa yaka 40.#Eks 7:5; 14:21; Num 14:33 37Mose pejo ŵasalile Aisalaeli kuti, ‘Mlungu tacimtumicisya mundu jwine kutyocela kwa acalongo acimjenu kuti taŵe jwakulocesya* mpela yiŵatite pakunduma une.’#Det 18:15, 18 38Mosejo ni julajula jwele juŵaliji nawo pa msongano wa Aisalaeli mcipululu. Ŵajimi pasikati pa acinangolo ŵetu ni lilayika lilyaŵecete najo Kwitumbi lya Sinayi. Ŵelewo ni uŵapocele maloŵe gakupeleka umi kuti atupe uwe.#Eks 19:1—20:17; Det 5:1-33

39“Nambo acinangolo ŵetu ŵakanile kumpikanila jwalakwe, ni ŵamtutile kumbali ligongo mitima jawo jasacile kuwujila ku Iguputo. 40Myoyo ŵatesile Aloni* kuti, ‘Mtupanganyicisye milungu kuti jitulongoleleje, ligongo ngatukumanyilila cacimwonecele Mose jula juŵatukopwesye ku Iguputo.’#Eks 32:1 41Nipo ŵapanganyisye cindu mpela mwanace jwa ng'ombe. Ŵacipelecele mbopesi, ni kusangalalila masengo giŵapanganyisye acimsyene ni makono gawo.#Eks 32:2-6 42Nipo Mlungu ŵatumbile ni ŵapele kuti asilambileje ndondwa mpela yayitite pakulembedwa m'buku ja ŵakulocesya;#Amo 5:25-27

‘Jemanja Aisalaeli, mkupela kuti mwapelekaga kwangune

nyama syele simwawulagaga ni kusipeleka mpela mbopesi

kwa yaka 40 yila mcipululu.

43Mwatwicilaga tenti ja Moloki

ni ndondwa ja mlungu jwenu Lefani,

milungu jawo jele jiŵajipanganyisye kuti mjilambileje.

Tinjimtyosya ni kuja kumleka kwakutalika,

kupunda ku Babiloni.’

44“Acinangolo ŵetu ŵakwete tenti ja umboni wakuti Mlungu ŵaliji nawo pampepe mcipululu mula. Ŵapanganyisye mpela yiŵatite Mlungu pakumsalila Mose, mwakulandana ni cindu ciŵaciweni Mose.#Eks 25:9, 40 45Tentijo jele acinangolo ŵetu ŵajipocele kutyocela kwa acinangolo ŵawo ŵala, ŵayice najo pampepe ni Yoswa katema kiŵasumwile cilambo ca ngosyo sya ŵandu ŵele Mlungu ŵatopwele jemanjajo ali mkwisa. Jatemi pasikati pawo mpaka ndaŵi ja Daudi.*#Yos 3:14-17 46Mlungu ŵamsalalile mtima Daudijo, mpaka jwaŵendile Mlungu kuti amkunde kuti ataŵe Nyumba jakutama Mlungu jwa Yakobo.#2 Sam 7:1-16; 1 Mbi 17:1-14 47Nambo Solomoni ni ŵele ŵiŵamtaŵile Mlungu nyumbajo.#1 Ayi 6:1-38; 2 Mbi 3:1-17

48“Atamose yaliji myoyo, nambo Mlungu jwakupunda yosope jwangatama m'nyumba jakutaŵidwa ni makono, mpela mwakuŵecetela jwakulocesya kuti,

49‘Kwinani ni citengu cangu ca Ucimwene, akuti Ambuje,#Yes 66:1-2

cilambo capasi ni pakuŵika sajo syangu.

Ana tacindaŵila nyumba jamtuli?

Nambi malo gakupumulila une gali kwapi?

50Ana yosopeyi nganimbanganya ni makono gangu?’ ”

51Sitefano ŵatite soni kuti, “Jemanja ŵandu ŵangakomboleka, mitima jenu jili jakusakala, mapikanilo genu galesile kupikana. Ndaŵi syosope mpela muŵatendelaga acinangolo ŵenu, nombe jemanja mkukana kupikanila Msimu Ŵaswela.#Yes 63:10 52Ana pana jwakulocesya jwamkanamsawusya acinangolo ŵenu? Jemanjajo ŵawuleje ŵandu ŵiŵaliji mkusala yakwisa kwakwe kwa jwakulungama jula. Sambano jemanja mwampelece kwa amagongo ŵakwe ni kumwulaga. 53Jemanja soni ni ŵimwapocele malamusi ga Mlungu kupitila mwa malayika,* nambope nganimgasunga kose.”

Akumponya maganga Sitefano

54Acakulungwa ŵanganya ŵala piŵapikene maloŵe ga Sitefano gala ŵatumbile mnope ni ŵatesile sinya. 55Nambo Sitefano, jwakulongoleledwa ni Msimu Ŵaswela ŵalolite kwinani ni ŵaluweni lumbili lwa Mlungu ni Yesu,* ali ajimi ku mkono wamlyo wa Mlungu. 56Ni ŵatite, “Alole! Ngukuwona kwinani kwewuguce, nipo Mwanace jwa Mundu* ali ajimi ku mkono wamlyo wa Mlungu.” 57Nambo jemanjajo ŵagumisile mnope, ni ŵasiŵile m'mapikanilo mwawo, ni ŵamgungumucile wosope pamo. 58Ŵamkopocesye kusa kwa msinda, ni ŵamponyisye maganga. Mboni syalesile yakuwala yawo m'makono mwa mcanda jwine lina lyakwe Saulo.* 59Ŵandu ŵala piŵaliji kumponya maganga Sitefano, jwalakwe jwatandite kupopela acitiji, “Ambuje Yesu, pocelani msimu wangu.” 60Nipo ŵatindiŵele pasi ni ŵagumisile kuti, “Ambuje, kasimwasunjila ŵandu ŵeleŵa magambo ga wele ulemwawu.” Piŵaŵecete maloŵe gelega, ŵawile.

Currently Selected:

Mase 7: YAWO

Highlight

Copy