Mako 16

Okuzooka kwa Yesu

1 # Luk 24:1-12; Mat 28:1-8; Yoh 20:1-10. Kandi Sabato ku yaahweireho, Mariamu Magadaleene na Mariamu nyina wa Yakobo na Saalome baagura eby'emigaju, ngu baije bamusiigye. 2Omu kasheeshe munonga aha kiro ky'okubanza omu saabiiti baahika aha kituuro, eizooba ryaturukire, 3nibabuuzana bati: N'oha oraatukumbagarize eibaare okuruga aha muryango gw'ekituuro? 4Ku baanagire amaisho, baareeba eibaare rikumbagaziibwe hangahari; ahakuba rikaba riri rihango munonga. 5Ku baataahire omu kituuro, baareeba omutsigazi ashutami aha rubaju rwa buryo, ajwaire omwenda gurikwera; baatangaara. 6Yaabagambira ati: Mutatangaara; nimusherura Yesu owa Nazareesi obambirwe. Yaazooka, tari aha; mureebe n'omwanya ahu babare bamutaire. 7Mbwenu mwirooko mugyende, mugambire abeegi be na Petero ngu, abeebembeire kuza Galilaaya; okwo niyo muraamushangye, nk'oku yaabagambiire. 8Baashohora, baaruga aha kituuro nibahunga, ahakuba bakakwatwa orutetema n'okutangaara; kandi tibaine u bakigambiire, ahabw'okuba bakaba batiinire.

Yesu okweyoreka abeegi be

9 # Yoh 20:11-18. Yesu ku yaazookire omu kasheeshe aha izooba ry'okubanza omuri saabiiti, yaabanza kweyoreka Mariamu Magadaleene, ou yaabingireho baadaimoni mushanju. 10We yaagyenda, yaagambira abu Yesu yaabaire atuura nabo, yaashanga nibaganya, nibarira. 11Kandi ku baagambiirwe ngu ariho ahuriire, kandi ngu yaareebwa Mariamu, tibaakiikiriza. 12#Luk 24:13-35. Bwanyima y'ekyo yaayeyoreka omu nshusha endiijo aha bandi babiri aharibo, abaabaire nibagyenda nibaza omu kyaro. 13Abo nabo baagaruka Yerusaalemu, baabigambira abeegi abandi; nabo tibaabaikiriza.

14 # Luk 24:36-49; Yoh 20:19-23. Bwanyima yaayeyoreka ahari ikumi n'omwe, bari bonka nibarya, yaabahana ahabw'okutaikiriza kwabo n'obugangaazi bw'emitima yaabo, ahakuba tibariakiriize bi baagambiirwe abaamureebire yaaheza kuzooka.#1 Kor 15:5. 15Yaabagira ati: Mugyende omu nsi zoona, mubuurire engiri ebihangirwe byona. 16#Byak 2:38. Oriikiriza akabatizibwa, aryajunwa; kwonka otariikiriza, aryasingwa orubanja. 17#Byak 16:18. Obumanyiso oburiguma nibureebwa omu barikwikiriza n'obu: omu iziina ryangye baryabinga baadaimoni, baryagamba endimi nsya; 18#Luk 10:19; Byak 28:3-6; Yak 5:14, 15. baryakwata enjoka, kandi ku barinywa ekirikwita kyona, tikiribarwaza; baryata engaro aha barwaire, bakire.

19 # Luk 24:50-53; Byak 1:4-11; 7:55. Bwanyima Mukama waitu Yesu, ku yaaherize kugamba nabo, yaatwarwa omu iguru, yaashutama aha rubaju rwa buryo rwa Ruhanga. 20Nabo baashohora, baagyenda hoona hoona nibabuurira ekigambo kya Ruhanga, Mukama waitu ari hamwe nabo naabakwatsa, kandi naahamya ekigambo ekyo n'obumanyiso obwabaire bukikomookaho.

Currently Selected:

Mako 16: RR64

Highlight

Copy