Mako 15

Yesu okutwarwa owa Pilaato

1Kandi ku bwabaire nibutaagurikana, abanyamurwa abakuru hamwe n'abakuru b'abantu n'abahandiiki n'ab'omu ishengyero boona, baaza omu naama; bwanyima baaboha Yesu, baamutwara, baamuhayo ahari Pilaato. 2#Luk 23:2-25; Mat 27:11-30; Yoh 18:29—19:16. Pilaato yaamubuuza ati: Weeza ori Omugabe w'Abayudaaya? Yaamugarukamu ati: Eki waagamba nikwo kiri. 3Abanyamurwa abakuru baamutabaariza bingi. 4Pilaato yaagaruka yaamubuuza ati: Toine ki orikwetonganira na kakye? Ka baakutabaariza bingi! 5Nabwo Yesu tiyaagarukamu; n'ahabw'ekyo Pilaato yaatangaara.

Pilaato okucwera Yesu orubanja rw'okubambwa

6Kandi aha bugyenyi nk'obwo akaba amanyiire kubarekurira embohe yoona ei baabaire bamushaba. 7Kandi omu baagomire bakaita abantu, abaabaire babohirwe omu ikhome ahabw'obugomi obwo, hakaba harimu omushaija orikwetwa Barabba. 8Abantu baingi baija baatandika kushaba Pilaato kubagirira nk'oku ashangwa abagirira. 9Yaabagarukamu ati: Nimwenda ngu mbarekurire Omugabe w'Abayudaaya? 10#Yoh 11:48. Ahakuba akamanya ku abanyamurwa abakuru baamuhayo ahabw'eihari. 11Kwonka abanyamurwa abakuru baashunika engabo z'abantu kugamba bati: Haakiri Barabba obe niwe waaturekurira. 12Pilaato yaagaruka yaababuuza ati: Mbwenu shi, ngire nta Ogu ou murikweta Omugabe w'Abayudaaya? 13Baagaruka baayomba munonga bati: Mubambe aha musharaba! 14Pilaato yaababuuza ati: Ahanki? ni kibi ki eki akozire? Baayeyongyera kuyomba munonga bati: Mubambe! 15Pilaato ahabw'okwenda kunanura ezo ngabo, yaabarekurira Barabba; ku yaaherize kwasha Yesu, yaamuhayo kubambwa.

16Bwanyima abaserukare baamutwara, baamutaasya omu kibuga ekirikwetwa Puratorio; baayeta omutwe gwona gwabaserukare. 17Baamujweka omwenda gwa bujwa, baaruka ekirunga ky'amahwa, baakimujweka. 18Baatandika kumutangirira nibagira bati: Singa, Mugabe w'Abayudaaya! 19Baamuhondesa ekibingo omu mutwe, baamucwera amacwante, baamutsimbira amaju nibamuramya. 20#Luk 23:26-49; Mat 27:31-56; Yoh 19:16-30. Ku baaherize kimuteerera enaku, baamujuura ogwo mwenda, baamujweka ebijwaro bye. Baamushohoza, baaza kumubamba.

Yesu okubambwa

21 # Rom 16:13. Baayemereza omuhinguzi owaabaire naaruga omu kyaro, orikwetwa Simooni owa Kureene, ishe wa Alegizanda na Rufo, baamugyema kwekorera omusharaba gwa Yesu. 22Baatwara Yesu aharikwetwa Gologosa, (ekirikumanyisa ngu, Omwanya gw'empanga y'omutwe). 23#Zab 69:21. Baamuha viinyo ejwangizemu omubazi ogurikwetwa #15:23 Sumuruna n'omubazi ogurikutuubya obusaasi, ogujwangibwa omu majuta g'okushoroora, ogwomya emitumbi, n'ebindi. sumuruna; yaayanga kuginywa. 24#Zab 22:18. Bwanyima baamubamba aha musharaba; baabagana ebijwaro bye nibabiteerera enteenyu, ngu bamanye buri muntu eki araatware. 25Baamubamba aha shaaha ya kashatu. 26Ekirangiriro ky'ebi baamurega baakihanika ahaiguru ye, ekihandiikirwe ngu, OMUGABE W'ABAYUDAAYA. 27Kandi baamubamba hamwe n'abambuzi babiri, omwe aha rubaju rwe rwa buryo, n'ondiijo aha rwa bumohso. 28Nikwo Ebyahandiikirwe byahikiriziibwe bityo ebirikugira ngu, Akabarirwa hamwe n'abasiisi. 29#Zab 22:7. Abaabaire nibahinguraho baamuteerera enaku, nibazongoza emitwe, nibagira bati: Iwe orikusheenya hakalu okagyombekyera ebiro bishatu, 30yejune, ohanukye orugye aha musharaba. 31Kandi n'abanyamurwa abakuru nikwo baamuteereire batyo enaku, nibagambirana n'abahandiiki bati: Akajuna abandi; tarikubaasa kwejuna. 32Kristo, Omugabe wa Israeli, naarugye hati mbwenu aha musharaba, tukireebe twikirize. Kandi abaabambiirwe hamwe nawe nabo baamuteeerera enaku.

Okufa kwa Yesu

33 # Amo 8:9. Eshaaha ya mukaaga ku yaahikire, omwirima gwashweka ensi yoona okuhitsya aha shaaha ya mwenda. 34#Zab 22:1. Aha shaaha egyo eya mwenda. Yesu yaagamba n'eiraka rihango ati: Eloi, Eloi, lama sabakasaani, amakuru gaakyo ngu, Ruhanga wangye, Ruhanga wangye, n'enki ekyakuntsigisaho? 35Kandi abamwe aha baabaire beemereire aho, ku baakihuriire, baagira bati: Hurira, naayeta Eliya! 36#Zab 69:21. Omwe yairuka, yaajabika ekyangu omuri viinyo erikushaarira, yaakita aha kibingo, yaamuheereza kunywa, naagira ati: Reka tureebe Eliya ku araabe naija kumuhanura. 37Yesu yaagamba n'eiraka rihango, yaahayo amagara ge. 38Omukingo gw'omuri hekalu gwataagukamu ebicweka bibiri okuruga aha mutwe gwagwo okuhika ahansi. 39Kandi omukuru w'abaserukare akaba ayemereire naamureeba; ku yaareebire yaahayo amagara ge atyo, yaagira ati: Buzima kwo omuntu ogu yaaba ori Omwana wa Ruhanga.

40Hakaba hariho n'abakazi beemereire nibareebera hangahari; omuri abo hakaba harimu Mariamu Magadaleene, na Mariamu nyina wa Yakobo omuto na Yose, na Saalome; 41abo nibo baabaire bamukuratira, nibamuheereza, akiri Galilaaya; kandi hakaba hariho n'abandi bakazi baingi abaagyenzire nawe Yerusaalemu.

Okuziika Yesu

42 # Luk 23:50-55; Mat 27:57-61; Yoh 19:38-42. Omu mwabazyo, nk'oku ryabaire riri eizooba ry'Okweteguura, kandi riri eizooba eririkubandiza Sabato, 43Yosefu owa Arimasaaya, omuhanuuzi w'ekitiinisa omu ishengyero, kandi owaabaire atuura ategyereize obukama bwa Ruhanga, yaatiinuuka, yaataaha owa Pilaato, yaashaba omutumbi gwa Yesu. 44Pilaato yaatangaarira oku yaarahuka kukaba; yaatuma kweta omukuru w'abaserukare, yaamubuuza ku araabe yaakabire. 45Ku yaahamiziibwe omukuru w'abaserukare ku yaaheza kukaba, yaikiriza kuha Yosefu omutumbi. 46Yosefu yaagura omwenda gwa bafuta, yaahanura omutumbi, yaaguzinga omu mwenda ogwo gwa bafuta, yaaguta omu kituuro, ekyatimbirwe omu rukiri; yaakumbagaza eibaare, yaarikingisa omuryango gw'ekituuro. 47Kandi Mariamu Magadaleene na Mariamu nyina wa Yose baayetegyereza ahu omutumbi gwe gwateebwa.

Currently Selected:

Mako 15: RR64

Highlight

Copy