Malaki 3

Ebirikuhanuurwa aha kwija kwa Yohaana Omubatizi n'okwa Mukama waitu

1 # Isa 40:3; Mat 11:10; Mak 1:2; Luk 1:76; 7:27. Reeba, nintuma entumwa yangye kutebeekanisa omuhanda omu maisho gangye, kandi Mukama, ou murikusherura, aryaija omuri hekalu ye kitaraariire; n'entumwa y'endagaano ei murikushemerererwa, reeba neija; nikwo MUKAMA ow'amahe arikugira. 2#Isa 4:4; Yoel 2:11. Mbwenu n'oha oribaasa kwemera eizooba eri ariiziraho, kandi ku arireebwa, n'oha oribaasa kwemereraho? Ahabw'okuba ni nk'omuriro gw'omuheesi ogurikushemeza, kandi nka sabuuni y'omwozi. 3#Isa 1:25; Zek 13:9. Aryashutama nk'orikushemeza efeeza akagimaramu enkamba, ashemeze Abaleevi, abagire nk'oku bamara enkamba omu zaabu n'efeeza, okuhitsya obu barihongyera MUKAMA empongano zihikire. 4#Ezk 20:40. Obo nibwo empongano za Yuda na Yerusaalemu zirishemeza MUKAMA, nk'oku zaabaire zimushemeza omu biro bya ira, omu myaka eyaahingwire.

5 # Lev 19:13; Bir 24:17; Yer 29:23. Bwanyima ndyabairira haihi kucwa orubanja; ndyaba mushinja orikurahuka kushinja abarogi, abashambani, abarikurahira ebishuba, abarikwima abakozi ebihembo byabo, abarikwita kuba abafaakazi n'efuuzi, abarikwita emanja z'abanyamahanga n'abatarikuntiina; nikwo MUKAMA ow'amahe arikugira. 6#Zab 102:27; Tonz 3:22. Ahabw'okuba nyowe MUKAMA timpinduka; nikyo imwe beene Yakobo mutarikumarirwaho.

Ekibi ky'okutaha Ruhanga kimwe kya ikumi n'emitoijo

7 # Zek 1:3; Byak 7:51. Okwiha omu biro bya baashwenkuriimwe mutuura nimuteishuka nimureka ebiragiro byangye, mutarikubyorobera. Mungarukire, naanye niinyija kubagarukira; nikwo MUKAMA ow'amahe arikugira. Kwonka nimugira muti: Tugarukye tuta? 8#Neh 13:10. Omuntu akaabaasa kwima Ruhanga ebye? Kwonka imwe nimuunyima ebyangye. Haza mugira muti: Nitukwima tuta? Nimuunyima ebicweka bya kimwe kya ikumi n'emitoijo. 9Mukyeenirwe omukyeeno, ahabw'okuba imwe eihanga ryona nimuunyima ebyangye. 10#Kut 7:11; Enf 3:9, 10; 2 Kor 9:6-8. Mureete ebicweka bya kimwe kya ikumi ebihikire omu mabiikiro gangye, enju yangye ebone kubamu eby'okurya, mubingyerese, haza mureebe ku ntaabaigurira madarisa g'omu iguru, nkabashukaho omugisha, mukabura n'ah'okuguta; nikwo MUKAMA ow'amahe arikugira. 11Ndyakabukira orikwenda kubamira, arekye kucwekyereza emyaka y'omu itaka ryangyu, n'emizaabibu yaanyu teribura kwana; nikwo MUKAMA ow'amahe arikugira. 12#Isa 62:4; Zef 3:19. Kandi obwo amahanga goona garyabeeta abahiiriirwe, ahabw'okuba muryaba ensi y'okushemererwa; nikwo MUKAMA ow'amahe arikugira.

13 # Mal 2:17. MUKAMA naagira ati: Ebigambo ebi mubaire nimuunyetomboitera bigumire. Kwonka nimugira muti: Tukwetomboiteire tuta? 14#Yob 21:15; Zef 1:12. Mugizire muti: Tikiine mugasho kukorera Ruhanga. Kandi muti: Nikitugasira ki okworobera ebiragiro bye n'okugyendera omu maisho ga MUKAMA ow'amahe, turi nk'abari omu rufu? 15#Zab 95:9. Hati abanyamaryo nibo turikweta abahiiriirwe; kandi enkozi z'ebibi tizirikugogyera kwonka; n'obu zirikugyeza Ruhanga, nizikira.

16 # Kur 32:32; Bir 6:6, 7. Omu biro ebyo abaabaire nibatiina MUKAMA baaguma nibagambirana; MUKAMA yaatega amatu, yaabahurira, kandi ekitambo ekirimu ebirikwijutsya kyahandiikirwa omu maisho ge ahabw'abaabaire nibatiina MUKAMA, bakateekateeka aha iziina rye. 17#Kur 19:5; Byak 17:31; 1 Pet 2:9. Kandi MUKAMA ow'amahe naagira ati: Aha izooba eri ndikoreraho, baryaba abangye, babe eitungo ryangye eritoorainwe; kandi ndyabasaasira, nk'oku omuntu asaasira omwana we orikumukorera; 18haza obwo muryagaruka mumanye kutaanisa abahikiriire n'ababi, abarikukorera Ruhanga n'abatarikumukorera.

Currently Selected:

Malaki 3: RR64

Highlight

Copy