Luka 5

Abeegi ba Yesu okukwata eby'enyanja bingi

1 # Mat 4:18-22; Mak 1:16-20. Yesu ku yaabaire ayemereire aha rubaju rw'enyanja ya Genesareetei, omutwe gw'abantu baingi gwamufunza kuhurira ekigambo kya Ruhanga. 2Yaareeba amaato abiri gari aha nkungu y'enyanja; kwonka abajubi bagarugiremu niboozya obutimba bwabo. 3Yaaza omuri bumwe obwabaire buri obwa Simooni, yaamushaba kubwirizayo hakye okuruga aha nkungu. Yaabushutamamu, yaayegyesa abantu. 4#Yoh 21:6. Ku yaaherize kugamba, yaagira Simooni, ati: Mwirire ahagati y'enyanja, mutegye obutimba bwanyu. 5Simooni yaamugarukamu ati: Mwegyesa, turaire nitutega ekiro kyona, twabura eki twakwatsa. Kwonka ahabw'ekigambo kyawe, ka ntegye obutimba. 6Ku baakozire ekyo, baakwatsa eby'enyanja bingi munonga, obutimba bwabo bwayenda kucweka; 7nikwo kwetesa bagyenzi baabo engaro bari omu bundi bwato ngu baije babahwere. Baija, baijuza amaato gombi, gaayenda kumirwa. 8Simooni Petero ku yaakireebire, yainama aha maju ga Yesu, yaagira ati: Ndugaho, Mukama wangye, ahabw'okuba ndi omusiisi. 9Ahakuba we na bagyenzi be boona bakatangaara ahabw'eby'enyanja bingi ebi baakwatsire. 10Kandi Yakobo na Yohaana, beene Zebedaayo, abaabaire bakwataniise na Simooni, nabo baatangaara. Yesu yaagambira Simooni ati: Otatiina, okuruga hati oryajuba abantu. 11#Mat 19:27. Ku baahikize amaato gaabo aha nkungu, baatsigaho byona, baamukuratira.

Yesu okushemeza omubembe

12 # Mat 8:1-4; Mak 1:40-45. Ku yaabaire ari omuri tauni emwe ahari ezo, haija omushaija oshwekirwe ebibembe; ku yaareebire Yesu, yaajuumara, yaamweshengyereza ati: Mukama wangye, ku oraabe nookunda, noobaasa kunshemeza. 13Yesu yaagorora omukono, yaamukoraho, naagira ati: Ninkunda; shemera. Ahonaaho ebibembe byamurugaho. 14#Lev 15:2-32. Yaamwehenangiriza kutagira ou yaakigambira, ati: Kwonka irooko ogyende oyeyorekye aha munyamurwa, ohongye empongano ahabw'okushemezibwa kwawe, nk'oku Musa yaaragiire, kibe eky'okuhamya omu maisho g'abantu. 15Kwonka okurangaanwa kwe kwayeyongyera okukiraho kubuga hoona; n'emitwe mingi y'abantu yaateerana kuhurira n'okutambirwa endwara zaabo. 16#Mak 1:35. Kwonka We yaarugayo, yaaza omu ihamba, yaashaba.

Yesu okukiza ozingazingirwe

17 # Mat 9:1-8; Mak 2:1-12. Aha kiro kimwe ahari ebyo, akaba naayegyesa; n'Abafarisaayo n'abeegyesa ab'Ebiragiro, abaarugire omu tauni zoona ez'omuri Galilaaya n'omuri Buyudaaya, na Yerusaalemu, bakaba bashutami aho; kandi amaani ga Mukama ag'okukiza gakaba gari hamwe nawe. 18Ahonaaho haija abantu bareetsire omushaija ozingazingirwe, bamuheekire omu nogzi; baasherura oku baraamutaasye omu nju, bakamurambika omu maisho ga Yesu. 19Ku baabuzire ah'okumurabya ahabw'omutwe gw'abantu, baatemba ahaiguru y'enju, baamurabya omu mategura, baamushuumiza omu ngozi ahagati y'abantu omu maisho ga Yesu. 20Ku yaareebire okwikiriza kwabo, yaagira ati: Mushaija 'we, ebibi byawe byakusaasirwa. 21#Isa 43:25. Abahandiiki n'Abafarisaayo baatandika kwetomboita, nibagira bati: ogu n'oha orikurogota? N'oha orikubaasa kusaasira ebibi kureka Ruhanga wenka? 22Yesu ku yaamanyire okwetomboita kwabo, yaababuuza ati: Nimwetomboitera ki omu mitima yaanyu? 23Ekirikurahuka kirahi, okugira nti, Ebibi byawe byakusaasirwa; nari okugira nti, Imuka, ogyende? 24Mbwenu mumanye ngu, Omwana w'omuntu aine obushoboorozi aha nsi okusaasira ebibi, yaagambira ozingazingirwe ati: Ninkuragiira nti: Imuka, oyekorere engozi yaawe, otaahe. 25Ahonaaho yaimuka omu maisho gaabo, yaayekorera eki yaabaire abyamiho, yaataaha omuka naahimbisa Ruhanga. 26Kyabatangaaza boona, baahimbisa Ruhanga, baine obwoba bwingi, nibagira bati: Eri izooba twareeba eby'okutangaaza.

Yesu okweta Leevi omuhooza

27 # Mat 9:9-13; Mak 2:13-17. Bwanyima y'ebyo, ku yaashohoire, yaareeba omuhooza orikwetwa Leevi, ashutami omu ihoorezo; yaamugira ati: Nkuratira! 28Yaatsigaho byona, yaimuka, yaamukuratira. 29Leevi ogwo yaamuteekyera obugyenyi bwingi omu nju ye; kandi hakaba hariho omutwe mwingi gw'abahooza n'abandi bashutami nabo aha by'okurya. 30Abafarisaayo n'abahandiiki baabo baayetomboitera abeegi be nibagira bati: Ahabw'enki nimurya kandi nimunywa n'abahooza n'abasiisi? 31Yesu yaabagarukamu ati: Abahuriire tibeetenga mufumu, kureka abarwaire. 32Tindaizire kweta bahikiriire kureka abasiisi ngu beeteise. 33#Mat 9:14-17; Mak 2:18-22. Baamugambira bati: Abeegi ba Yohaana kaingi beesiibyakwo, kandi bashaba; n'Abafarisaayo nabo nikwo bakora; kwonka abaawe barya kandi banywa. 34Yesu yaababuuza ati: Nimubaasa muta kusiibyakwo abakwe, bakiine kishwera? 35Obunaku buryahika, kishwera abaihweho; omu biro ebyo baryayesiibyakwo. 36Kandi yaabacwera enfumu, ati: Tihariho muntu otaagura ekiremu aha kijwaro kisya, akakiteera aha kujwaro kikuru; ku yaakukora atyo, akaataagura ekyo kijwaro kisya, kandi ekiremu eki yaataagura aha kisya tikikaashushana n'ekijwaro ekikuru. 37Kandi tihariho muntu oshuka viinyo nsya omu furebe z'empu nkuru; ku yaakukora atyo, viinyo ekaabarura efurebe, viinyo egyo eyatika, n'efurebe zisiisikara. 38Kureka viinyo nsya eshemereire kushukwa omu furebe nsya. 39Kandi tihariho muntu owaanyweire ahari viinyo nkuru, akakunda ensya; ahakuba naagira ati: Enkuru niyo nungi.

Currently Selected:

Luka 5: RR64

Highlight

Copy