Luka 4

Yesu okwohibwa Sitaane

1 # Mat 4:1-11; Mak 1:12, 13. Kandi Yesu akaruga Yorudani, aijwire Omwoyo Orikwera, yaatwarwa Omwoyo omu ihamba, 2yaamarayo ebiro makumi ana, naayohibwa Sitaane, atarikurya ky'okurya kyona omu biro ebyo; ku byahweireho, yaagira enjara. 3Omwohi nikwo kumugambira ati: Ku oraabe ori Omwana wa Ruhanga, gambira eibaare eri rihindukye eby'okurya. 4#Bir 8:3. Yesu yaamugarukamu ati: Kikahandiikwa ngu, Omuntu tatungwa by'okurya byonka. 5Omwohi yaagaruka yaamutembya, yaamworeka obugabe bwona obw'omu nsi yoona omu mwanya mukye, 6yaamugira ati: Niinyija kukuha obushoboorozi obu bwona n'ekitiinisa kyabwo; ahakuba nkabuheebwa, kandi mbuheereza ou ndkunda weena. 7N'ahabw'ekyo, ku oriname wandamya, bwona nibuba obwawe. 8#Bir 6:13, 14. Yesu yaamugarukamu naamugira ati: Kikahandiikwa ngu, Oramye Mukama Ruhanga waawe, obe niwe waaheereza wenka. 9Bwanyima yaamwinamura Yerusaalemu, yaamuta aha itungu rya hekalu, yaamugambira ati: Ku oraabe ori Omwana wa Ruhanga, ruga aha, ogurukye oyetsimbe ahansi; 10#Zab 91:11, 12. ahakuba kikahandiikwa ngu, Aryaragiira baamaraika be, bakurinde; 11kandi ngu: Baryakukwatirira omu mikono yaabo, ngu otakaahikiza ekigyere kyawe aha ibaare. 12#Bir 6:16. Yesu yaamugarukamu naamugira ati: Kikagambwa ngu, Otaryosya Mukama Ruhanga waawe. 13#Heb 4:15. Bwanyima Omwohi Sitaane, ku yaaherize byona ebi yaabaire naamwohesa, yaamurugaho, okuhitsya obu aribona ogundi mwanya. 14#Mat 4:12-17; Mak 1:14, 15. Kandi Yesu yaagaruka Galilaaya aine amaani g'Omwoyo, okurangaanwa kwe kwabuga omu byanga byona ebiri haihi nayo, 15yaayegyesa omuri sinagogi zaabo, boona baamusiima.

Aba Nazareesi okwenda kwita Yesu

16 # Mat 13:53-58; Mak 6:1-6. Yaataaha Nazareesi, ahu yaakuriire; ahari Sabato yaataaha omuri #4:16 Sinagogi n'ekanisa y'ekiyudaaya. sinagogi, nk'omucwe gwe oku gwabaire guri. Yaimuka kushoma. 17#Isa 61:1, 2. Baamuha ekitabo kya nabi Isaaya, yaakishuuruura, yaashanga ahu ekicweka kahandiikirwe ngu:

18Omwoyo wa Mukama ari ahariinye,

Ahakuba akanshukaho amajuta kubuurira abooro ebigambo ebirungi,

Yanguma kumanyisa enkwatwa eby'okurekurwa,

N'okumanyisa empumi eby'okuhumuurwa,

N'okurekura abarikwitwa kubi,

19N'okurangira abantu omwaka gwa Mukama ogw'embabazi. 20Ku yaaherize kushoma, yaateerana ekitabo, yaakigarurira omuheereza, yaashutama; ab'omuri sinagogi boona baamugumyaho amaisho. 21Yaatandika kubagambira ati: Eri izooba ebyahandiikirwe ebi byahikiirizibwa omu matu gaanyu. 22#Yoh 6:42. Boona baamusiima, nibatangaarira ebigambo by'embabazi ebyaruga omu kanwa ke nibagira bati: Beitu ogu ti mwene Yosefu? 23Yaabagira ati: Timuribura kuncwera enfumu egi muti: Iwe mufumu 'we, oyetambire! Byona ebi twahuriire ngu okakorera Kaperenaumu, bikorere n'aha omu nsi yaanyu. 24Yaabagira ati: Buzimazima nimbagambira nti: Tihariho nabi oikirizibwa omu nsi y'owaabo. 25#1 Bag 17:9; Yak 5:17. Kandi nimbagambira omu mazima nti: Omu biro bya Eliya gajaba garugi abafaakazi baingi omuri Israeli; omu biro ebyo eiguru rikakingwa, enjura yaabura okumara emyaka eshatu n'ameezi mukaaga, haabaho enjara nyingi omu nsi yoona; 26kwonka Eliya taratumirwe nangwa na hari omwe omuribo, kureka akatumwa aha mukazi omufaakazi owa Zarefaasi omu ishaza rya Sidoni. 27#2 Bag 5:14. Kandi n'omu biro bya nabi Elisha hakaba hariho ababembe baingi omuri Israeli; kwonka tihariho n'omwe owaashemeziibwe, kureka Naamani Omusiria. 28Ab'omuri sinagogi boona, ku baakihuriire, baagira ekiniga kingi; 29baimuka, baamubinga omuri tauni, baamutwara nibamukurubana, baamuhitsya aha nengo y'ekibungo eki baabaire bombekireho tauni yaabo, ngu bamurengyezeho, abanzeyo omutwe. 30Kwonka We yaaboogamu, yaagyenda.

Yesu okubinga daimoni Kaperenaumu

31 # Mak 1:21-28. Yaashuuma yaaza omuri tauni ya Galilaaya erikwetwa Kaperenaumu. Ku yaabaire naabeegyesa ahari Sabato, 32#Yoh 7:46. baatangaarira okwegyesa kwe, ahabw'okuba ekigambo kye kikaba kiine obushoboorozi. 33Kandi omuri sinagogi egyo hakaba harimu omuntu owaabaire ariho daimoni; yaaborooga n'eiraka rihango ati: 34Ai bambe! Noofa ki naitwe, iwe Yesu owa Nazareesi; oizire kutucwekyereza? Ninkumanya; ori Orikwera wa Ruhanga. 35Yesu yaamugambira kubi, naagira ati: Hunama, murugyeho! Daimoni ku yaamuteire ahansi ahagati yaabo, yaamurugaho, ataine ki amwitsize. 36Boona baatangaara, nibabuuzana bati: Eki ni kigambo ki? Naaragiira baadaimoni n'obushoboorozi n'amaani, baarugamu. 37Okurangaanwa kwe kwahika omu myanya yoona ehikaine n'ensi egyo.

Yesu okukiza nyinazaara Simooni n'abandi barwaire

38 # Mat 8:14-17; Mak 1:29-39. Yaimuka yaaruga omuri sinagogi, yaataaha omwa Simooni. Kandi nyinazaara Simooni akaba arwaire omushwija mwingi; baamweshengyereza kumukiza. 39Yaamwemerera aha rubaju, yaakabukira omushwija, gwamurugaho; ahonaaho yaimuka, yaabaheereza. 40Eizooba ku ryabaire nirirengarenga, boona abaabaire barwarize abarwaire endwara zitari zimwe, baabamureetera; yaabataho engaro boona, yaabakiza. 41#Mak 3:11, 12. Na baadaimoni baaruga omuri baingi, nibaamuza nibagira bati: Ori Omwana wa Ruhanga! Kwonka yaabagambira kubi, tiyaabaikiriza kugamba, ahabw'okuba bakamumanya ku ari Kristo.

42Kandi ku bwaseesire, yaarugayo, yaaza omu mwanya ogwenagire. Abantu baamusherura, baija ah'ari, baayenda kumuzibira ngu atabarugaho; 43kwonka yaabagira ati: Nshemereire kubuurira ebigambo ebirungi by'obukama bwa Ruhanga omuri tauni ezindi nazo; ahabw'okuba nikyo naatumiirwe. 44Yaaguma naabuurira engiri omuri sinagogi za Galilaaya.

Currently Selected:

Luka 4: RR64

Highlight

Copy