Luka 6

Yesu Mukama wa Sabato

1 # Mat 12:1-8; Mak 2:23-28. Aha kiro kya Sabato akaba naaraba omu misiri y'oburo; abeegi be baacwa obushiisha bw'oburo, baabujungirira omu ngaro zaabo, baaburya. 2Kwonka abamwe aha Bafarisaayo baabuuza bati: Ahabw'enki nimukora ekirikuzira, okucwa obushiisha ahari Sabato? 3#1 Sam 21:1-6. Yesu yaabagarukamu ati: Beitu shi, timukashomaga eki Daudi yaakozire, obu yaagira enjara, we n'abu yaabire aine? 4#Lev 24:9. Akataaha omu nju ya Ruhanga, yaakwata emigaati ey'okumurikwa, yaagiryaho, kandi yaagihaho n'abu yaabaire aine, haza kiri eki Ebiragiro byabaire bizibira omuntu weena kukora, kureka abanyamurwa bonka. 5Yaabagira ati: Omwana w'omuntu niwe Mukama wa Sabato.

Yesu okukiza omuntu okokootsire omukono

6 # Mat 12:9-14; Mak 3:1-6. Ahari Sabato endiijo yaataaha omuri sinagogi, yaayegyesa; hakaba harimu omuntu okokootsire omukono gwa buryo. 7#Luk 14:1. Abahandiiki n'Abafarisaayo baamutaho amaisho kureeba yaaba araamukize ahari Sabato, ngu babone eki baraamuregye. 8Kwonka yaamanya ebiteekateeko byabo, yaagambira omuntu ogwo, owaabaire akokootsire omukono, ati: Imuka oyemerere aha. Yimuka, yaayemerera aho. 9Yesu yaabagira ati: Nimbabuuza, ahari Sabato Ebiragiro biikiriza okukora gye nari okukora kubi, okukiza amagara g'omuntu nari okugahwerekyereza? 10Yaabuzya amaisho omuri boona, yaamuragiira ati: Nanuura omukono gwawe. Yaagunanuura, omukono gwe gwakira. 11Abafarisaayo baagwa eiraro, baahanuura bonka oku baraakore Yesu.

Yesu okutoorana entumwa 12

12 # Mak 3:13-19. Omu biro ebyo yaatemba omu bibungo kushaba; yaaseesezayo ekiro naashaba Ruhanga. 13#Mat 10:2-4; Yoh 6:70; Byak 1:13. Ku bwasesire, yaayeta abeegi be, yaatoorana omuribo ikumi na babiri, abu yaayetsire entumwa; 14Simooni ou yaayetsire Petero, Anderea omurumuna, Yakobo, Yohaana, Filipo, Batolomayo, 15Matayo, Tomasi, Yakobo mwene Alifaayo, Simooni orikwetwa Zelote, 16Yuda mwene Yakobo, na Yuda Iskaryota owaamureebize.

17 # Mat 4:23—5:1; Mak 3:7-12. Yaashuuma nabo, yaayemerera aharinganiire n'omutwe mwingi gw'abeegi be n'abantu baingi abaarugire omuri Buyudaaya yoona na Yerusaalemu, n'ab'omu mashaza ga Tuuro na Sidoni, haihi n'enyanja empango, abaizire kumuhurira n'okutambirwa endwara zaabo; 18n'abaabaire bariho baadaimoni baakizibwa. 19Ab'omu mitwe egyo boona baayenda ngu bamukoreho, ahabw'okuba amaani gakamurugamu, gaabakiza boona.

Abaine omugisha oku bari

20 # Mat 5:3-12. Yaimutsya amaisho, yaareeba abeegi be, yaagira ati:

Mwine omugisha, imwe abooro, ahabw'okuba obukama bwa Ruhanga n'obwanyu. 21#Kush 7:16-17. Mwine omugisha, imwe abaine enjara hati, ahabw'okuba muryahaaga.

Mwine omugisha, imwe abarikurira hati, ahabw'okuba muryasheka.

22 # Yoh 15:9. Mwine omugisha abantu ku baraabangye, baababinga, baabajuma, baacamura eiziina ryanyu ngu ni ribi, nibabatura Omwana w'omuntu.

23Aha kiro ekyo mushemererwe, mugurukye ahabw'okwesiima; ahabw'okuba ebihembo byanyu ni bingi omu iguru; ahakuba nikwo baishenkurubo baagizire batyo baanabi.

24 # Yak 5:1. Kwonka imwe abatungi, muryakareeba, ahabw'okuba muherize kuheebwa eby'okubahuumuza. 25Muryakareeba, imwe abahaagire hati mbwenu, ahabw'okuba muryagira enjara.

Muryakareeba, imwe abarikusheka hati mbwenu, ahabw'okuba muryarira muboroogye.

26 # Yak 4:4. Muryakareeba, abantu boona ku baribagambaho gye; ahabw'okuba nikwo baishenkurubo baagizire batyo baanabi ab'ebishuba.

Emicwe mirungi ey'Abakristaayo

27 # Mat 5:39-48. Kwonka nimbagambira imwe abarikuhurira nti: Mukunde abazigu baanyu, mukorere gye abarikubanga; 28mushabire omugisha abarikubakyeena, mushabire abarikubaitsa omwaga. 29Orikuteera oruhi rw'omushaya, omuhindurire ogundi; n'orikwaka ekanzu yaawe, n'omunagiro gwawe otarigumwima. 30Orikushaba weena, omuhe; n'orinyaga ebintu byawe, otarigaruka kubimushaba. 31#Mat 7:12. Kandi nk'oku mwenda abantu kubagirira, naimwe mube nikwo mwabagirira. 32Mbwenu ku muraabe nimukunda abarikubakunda, nimusiimwaho ki? Ahakuba abasiisi nabo bakunda ababakunda. 33Kandi ku muraakorere gye ababakorera gye, nimusiimwaho ki? Ahakuba n'abasiisi nikwo bakora. 34Kandi ku muraabe nimuguza abo, abu mwineho amatsiko, ngu nyentsya naimwe babahe, nimusiimwaho ki? N'abasiisi baguza abasiisi, ngu baihurwe ebirikwingana n'ebi baagurize. 35Kureka mukunde abazigu baanyu, mubakorere gye, mubaguze mutaineyo matsiko; obwo ebihembo byanyu biryaba bingi, kandi muryaba abaana ba Rukira-boona; ahabw'okuba We akorera gye abatasiima n'ababi. 36Mugire embabazi, nka Shoimwe oku agira embabazi.

37 # Mat 4:24. Mutaricwa orubanja, naimwe timurirucwerwa; mutarisingisiriza, naimwe timurisingisirizibwa; musaasire, naimwe muryasaasirwa. 38Muhe, naimwe muryaheebwa; endengo enungi, eigatiirwe, ecugutsiibwe, erikusheeshekara, niyo murirengyerwa omu bifuba byanyu, ahabw'okuba endengo ei murengamu naimwe niyo murirengyerwamu.

39 # Mat 15:14. Kandi yaabacwera enfumu ati: Empumi neebaasa eta kwebembera endiijo? Zombi tizirigwa omu kiina? 40#Yoh 15:20. Omwegi takira mwegyesa we; kwonka omwegi weena ku arihikiiriza eby'okwega, aryaba nk'omwegyesa we. 41Ahabw'enki nooreeba akatokoozi akari omu riisho rya mugyenzi waawe, haza empimbi eri omu riisho ryawe otagyeteho? 42Nari shi, noobaasa ota kugambira mugyenzi waawe oti: Mugyenzi wangye, ka nkutokoore akantu akari omu riisho ryawe, haza obwo bwona otarikureeba empimbi eri omu riisho ryawe? Iwe ndyarya 'we, banza oihe empimbi omu riisho ryawe, obwo nibwo oraareebe gye, okatokoora akantu akari omu riihso rya mugyenzi waawe. 43Tihariho muti murungi ogwana ebyana bibi; kandi tihariho muti mubi ogwana ebyana birungi. 44Omuti gwona gumanyirwa aha byana byagwo. Nimumanya ngu abantu tibashoroma mtiini aha minyinya, n'obu yaakuba emizaabibu aha matojo. 45#Mat 12:34, 35. Omuntu murungi aiha ebirungi omu ibiikiro rirungi ery'omu mutima gwe; kandi omuntu mubi aiha ebibi omu ibiikiro rye eribi; ahakuba ebiijwire omutima akanwa nibyo kagamba.

46 # Mal 1:6. Muunyetera ki, Mukama wangye, Mukama wangye! Haza mutakora bi mbaragiira? 47Omuntu weena orikwija ahi ndi, akahurira ebigambo byangye, akabihikiiriza, naaza kubooreka ou arikushusha; 48naashusha omuntu owaayombekire enju, akarima hare munonga, akata omusingi aha rukiri; amaizi gaateera enju egyo, tigaabaasa kugitegyetsa, ahabw'okuba ekombekwa gye. 49Kwonka orikuhurira, akanga kukora, naashusha omuntu owaayombekire enju aha itaka, atarimire musingi; amaizi gakagiteera, ahonaaho yaagwa; n'okugwa kw'enju egyo kwaba kuhango.

Currently Selected:

Luka 6: RR64

Highlight

Copy