Luka 19

Zakeyu namakoha-musoko

1Yesu ahifiyaga oZheriko aviraga muluwani mule. 2Mwahikala muthu mmohi ooreela eeriwa Zakeyu, mpogo a anamakoha-musoko. 3Oofunesesaga omoona Yesu baani, mbwenye kaakwanihilege ni wiinjiva wa athu, vowi aali ookwiiva. 4Nuwindo, ahithamagelaga osogolo, ogwela munthazani wi amoone vowi Yesu aavire vevale vaaligiiye.

5Yesu agafiyile mburo olene, asugwaga odhulu ahimwiirelaga: <<Zakeyu, kita mowaaguva. Vowi soofuneya peeno wi gikale vaade vaawo>>. 6Oliye ahikitaga mowaaguva omwaakela ni ohagalala.

7Aatene yoonilege nde yomwaabaga yiiraga: <<Oliye ofiyedhe vaade va <namathega> >>.

8Nuwindo, Zakeyu ahiimelaga omwiirela Nabwiya wi: <<Ginogawa vaari dhooreela dhaaga gaavahe oorabula. Akala gihimwiiyela muthu ginomuwelihedha dila nnayi okwaranya dhamwiiyeliimi>>.

9Yesu ahimwiirelaga: <<Peeno ovulumusa ohufiya vaade va vowi ola teto di mwaana a Abarahamu. 10Vowi Mwaana a Muthu odheele waasayela ni waavulumusa oorimeela>>.

Musibe wa korowa kumi dha parata

(Matewuzhi 25.14-30)

11Yesu ahaawogelaga musibe mmohi wa alene yamwiiwaga oliye nde dhawogigiiye, vowi aaligi vakukuuve ni oZheruzalemi, mwa ela aliwa yoobuwelaga wi Omwene wa Mulugu weere ofiya mowaaguva. 12Nuwindo, Yesu wiira: <<Muthu mmohi a nlogo noovuweya ahidhowa elabo emohiya woolapa wi avahiwe omwene eendo awelewo. 13Ahawiithanaga amwiimeleli aaye kumi, waavaha korowa dha parata kumi, wiira: <Mmwiiregena nagooso ofiyedha ginaweliimiwo>.

14<<Mbwenye athu a elabo ele yoomugana, yahaaruma mundduli mwaaye arumiwi wi yamwiirele: <Hiyo kannafuna wi anithongege>.

15<<Vano oliye aweliliiyewo, agavahiwe omwene, ahawiithanaga amwiimeleli alene yaavahiliiye korowa dha parata wi anone dhipuriliisu.

16<<Ahidhaaga owambeela, wiira: <Nabwiyani, korowa yeenyu ele, gipurilemo dhimohi kumi>.

17<<Nabwiye ahimwaakulaga, wiira: <Dhihikala pama, we oli mwiimeleli apama, mwaha wi ohooneyiha ororomeleya ni dhooyeva, onodha waathonge maluwa kumi>.

18<<Ahidhaaga mwiimeleli a nabiili, eeraga: <Nabwiyani, korowa yeenyu ele, gipurilemo dhimohi tanu>.

19<<Nabwiye ahimwiirela teto ni olena: <Onoodha waathonge maluwa matanu>.

20<<Odha vevale mwiimeleli mmohiwa, eeraga: <Nabwiyani, korowa yeenyu ela, galogohiliimi gamagile muleesoni. 21Miyo gowuwoovani vowi nyo muli muthu oorusa, munovenyihavo elene muhuheliliinyuvo ni ohadda nde muhudhaliliinyu>.

22<<Nabwiye ahimwaakulaga, wiira: <Mwiimeleli abure! Ni mwaha wa vamulomoni vaawo ginowuukona. Wahinona wi miyo gili muthu oorusa, ginovenyihavo gihiheliliimivo ni ohadda dhihidhaliliimi. 23Ki mwahaya bwaddi odhe ohuhelege obanko korowa yaaga, miyo gawelawo, gaakele moweenjedhedheya?>

24<<Vano ahawiirelaga ale yoonelaga: <Mmwaake korowa eyo mumvahe olene winna kumi>.

25<<Aliwa yahimwaakulaga, wiira: <Nabwiyani, oliye ohukanna dhimohi kumi!>

26<<Miyo ginowuwaaddelani wi ole winna oneere weenjedhedhiwa mbwenye ole ohinna, naari yooyeva elene yinniiyena onowaakiwa. 27Mbwenye amwiiddani alene yahafunile wi miyo gaathongege aliwa, mwaadhena wuno mwaape vameentoni vaaga!>>

Yesu onovolowa muZheruzalemi ni ovuwa

(Matewuzhi 21.1-11; Maruku 11.1-11; Zhuwawu 12.12-19)

28Vano Yesu agawogile nde, ahisogolaga odhowa oZheruzalemi. 29Dhahipadduwa ayi, yaaddamelaga oBetifazhe ni oBetaniya vakukuuve ni Mwaango wa Olivera, ahaarumaga anamasuuza aaye abiili, 30wawaaddela, wiira: <<Dhowani mudhi onooniinyu oyo. Mwaavolowaga, munomfwanya mwaana a buuru agamageleliwe ohunagweliwege ni muthu. Mmutapule, mmudhena. 31Muthu onookoheni, eera: <Munamutapulela ddi?> mmwaakule, mwiire: <Nabwiya dinamfuna> >>.

32Vano ale yarumiwege edhowaga, yahimfwanyaga wona mwawaaddelege Yesu. 33Aliwa emutapulaga buuru, anyaya yahiiraga: <<Munamutapulela ddi?>>

34Aliwa yahawaakulaga, wiira: <<Mwaha wi nabwiya dinamfuna>>.

35Nuwindo, yahimudhaagana, otadeela dhoowara dheewa vadhulu vabuuruni ole, omwiirela Yesu wi amugwele. 36Yesu adhowaga, athu yootadeelaga dhoowara dheewa murampani.

37Vano aaddamelaga mukitakita wa Mwaango wa Olivera, anamwinji aatene, anamasuuza, yoolupaga moohagalala ni madhu oomutamaala Mulugu, mwaha wa dhootikiniha dhaatedhene nde dhooniligiiwa, yiiraga:

38 <<Oreelihiwa di mwene ole onadha mu ndina na Nabwiya! # 19.38 Masaalimu 118.26.

Murenddele okale odhulu,

nthithimiho nikale wa Mulugu a Mudhulu-dhulu!>>

39Vevale aFarizi amohiwa yahimwiirelaga vaari va anamwinji: <<Namasuuziha, mwaamaalihe anamasuuza eenyu!>>

40Mbwenye Yesu ahawaakulaga, wiira: <<Ginowuwaaddelani wi aliwa yamaala mabwe binakuwege>>.

Yesu onamuunddela Zheruzalemi

41Yesu aaddamelaga oZheruzalemi agoonile nluwa ahiinddaga, 42eeraga: <<Ee! Akalagahi peeno wahinona mwa we weeka, dhego dhinavaha murenddele. Mbwenye dhiinova nda dhili dhoologoheya vameentoni vaawo. 43Vowi enodha malabo amwiiddani aawo enoorijiiwa ni miliddi dhoothawelamo ni waapeeliha dhipaddi dhaatedhene yuuthiyelelena. 44Eneere wuutolosa we ni anaawo aatene. Vowi kanidha nihiyiwa nibwe nimohi vadhulu va nibwe nimohi, mwaha wi kunonile mudhidhi olene wadhiile Mulugu wi oovulumuse>>.

Yesu onoweeliha nyuba ya Mulugu

(Matewuzhi 21.12-17; Maruku 11.15-19)

45Vano Yesu avolowaga vathaddo va nyuba ya Mulugu, ahambeelaga wathamagihamo anamaguliha. 46Ahawaaddelaga, wiira: <<Dhihilebiwa: <Nyuba yaaga enaakale nyuba ya matugumano a malobelo>.#19.46 Ezaya 56.7. Mbwenye nyo muhusaddula okala nikungu na ambava>>.#19.46 Zheremiya 7.11.

47Yesu oosuuzihesa munyuba ya Mulugu malabo maatene. Mbwenye apogo a anamakutha, anamasuuziha a malamulo ni asogoleli a athu yoofuna empe. 48Mbwenye kayanna yowiira vowi athu aatene yoodhiveliwa vajinjivene yavuruwanaga madhu aaye.

Currently Selected:

Luka 19: tke

Highlight

Copy