Luka 18

Musibe wa maamukwele a ntidi

1Yesu ahaawogela musibe mmohiwa, voofuna wawaaddela wi elobelege mudhidhi waatene ehigomege, 2eeraga: <<Muluwani nimohi mwahikala namathonga miladdu ahamoova Mulugu, naari kaamuriiha muthu. 3Ahikalawo teto maamukwele mmohi muluwani mwemule, adheesa wa oliye, awogaga, eeraga: <Mugithongele muladdu oli vaari va miyo ni mwiiddani aaga>.

4<<Vahivira mudhidhi ahifunaga owoga. Mbwenye vooharela ahiiraga yeeka: <Naari gihimoovaga Mulugu, naari gihimuriihaga muthu, 5vowi mwihiyana ola onoginyagula, gineere gimuthongele muladdu waaye wi onaadhe aginyagulegeve> >>.

6Nabwiya aheenjedhagave, eeraga: <<Mwihiiwa madhu a namathonga muladdu gwalagwambi ole. 7Mulugu kanaathongele mwa ebaribari oosakuliwa aaye, enamweebedha mahiyu ni mutana, naari viviraga malabo majinji ahinawaakule? 8Ginowuwaaddelani wi Mulugu mowaaguva onodha athonge muladdu weewa. Mwa dhaatedhene dhedhi adha adhaaga Mwaana a Muthu, onodha afwanye nroromelo elabo ya vati?>>

Musibe wa mFarizi ni namakoha-musoko

9Yesu aheenjedhagave, waawogela musibe ale yeeroromela wi booharihamo malamulo a Mulugu yaabeddaga athu amohiwa. 10<<Yaaligi alobwana abiili yahivolowaga nyuba ya Mulugu wi yalobele; Mmohi aali mFarizi, mmohiya aali namakoha-musoko. 11MFarizi ageemelile, egi olobela mwa oliye yeeka eeraga: <Nabwiya Mulugu, ginowuutamaalelani vowi kaginaligana ni athu amohi: anameeya, oohuroromeleya, aliba oraruwa wona namakoha-musoko ola. 12Ginothuga dila biili vasumaanani, ginoveleela dhaneekumi mwa dhaatedhene dhinapuriimi>.

13<<Mbwenye namakoha-musoko ahiimelaga, voolapelavene, naari kaafunaga othukulela meento aaye odhulu ooddwadhaga vathimarimani vaaye, eeraga: <Ee, Nabwiya Mulugu, mugeeddiwele thagaraga vowi gili namathega> >>.

14Yesu ahiiraga: <<Ginowuwaaddelani wi namakoha-musoko ole ahiwelela vaade vaaye agaleveleliwe dhoothega dhaaye, mmohiwa ole, naari. Ole oneere eyunnuwihe onookitihiwa, oneeyeviha, onowunnuwihiwa>>.

Yesu onowareeliha ahima

(Matewuzhi 19.13-15; Maruku 10.13-16)

15Athu yowaadhana ahima wa Yesu wi aahele madada areelihe, mbwenye anamasuuza vawooniligiiwa, yegi waahiiha. 16Mbwenye Yesu ahawiithanelaga vaaligi oliye ana-ahimaya, wiira: <<Ahiyeni ahima edhe wa miyo, kamwaahiihe, sowi Omwene wa Mulugu bwa athu enaligana ni aliwa. 17Ebaribareene ginowuwaaddelani wi ole ohunaakele Omwene wa Mulugu wona mwaana, kadha avolowamo>>.

Muthu ooreela

(Matewuzhi 19.16-30; Maruku 10.17-31)

18Mulobwana mmohiwa ooreela ahimukohaga Yesu, wiira: <<Namasuuziha apama, gineere ddi wi gaakele egumi yoohumala?>>

19Yesu ahimwaakulaga, wiira: <<Onagiirela ddi apama? Kalivo oli apama, apama di Mulugu, baahi. 20Ohaanona malamulo: <Kuraruwe, kumpe muthu, kawiiye, kumwiinkedhe mukwaawo, waariihege ababo ni amaayo> >>.#18.20 Okuma 20.12-16; Deteronomiyo 5.16-20.

21Muthu ole ahiiraga: <<Dhaatedhene dhedho gambeele ohara ngali muzombwe>>.

22Yesu ageewile, ahimwiirelaga: <<Yego emohi ehuuhaleela, ogulihe dhaatedhene dhinniiwena, korowadha waavahe athu oorabula, dhooreela onoodha ofwanye odhulu. Weera ndo, ogiharege>>.

23Muthu ole ageewile madhu ale, ahikukumuwaga vowi aali ooreela vajinji. 24Yesu agamoonile [wi ohukukumuwa vajinji,] ahiiraga: <<Dhili dhoorusa vajinji wi athu ooreela evolowe muuMweneni wa Mulugu! 25Eli yookweya kamelo ovira mookupula mwa singano, ohiyana wi athu ooreela evolowe muuMweneni wa Mulugu>>.

26Ale yeewilege, yahiiraga: <<Akala dhili ndo, ki onaande ovolowa baani?>>

27Yesu ahawaakulaga, wiira: <<Dhihinaandeya ni athu, dhinaandeya ni Mulugu>>.

28Vano Peduru ahiira: <<Hiyo nihihiya dhaatedhene dhaaniihuna, wuuharagani>>.

29Yesu ahawaakulaga, wiira: <<Ebaribareene ginowuwaaddelani wi kaliwo muthu onaahiye nyuba yaaye, mwihiyanaaye, addibile, ababiinya, naari anaaye, mwaha wa Omwene wa Mulugu, 30ohunaakele dhiinoveva vajinjivene mookwaranya dhanniiyena, teto mu elabo enadha, egumi yoohumala>>.

Yesu onowoga dila ya neethaaru dha okwa waaye ni ovenyihiwa

(Matewuzhi 20.17-19; Maruku 10.32-34)

31Yesu ahawiithanelaga vowihivale anamasuuza kumi ni abiili, wiira: <<Mwiiwe, nili voolenddoni woodhowa oZheruzalemi. Wewo onaakwanelihiwe dhaatedhene dhilebiwe ni anamavuhulela dhinawoga dha Mwaana a Muthu. 32Miyo gineere opelekiwa mmadadani mwa athu oode.#18.32 Ala baayene yahaali aZhudewu. Gineere obeddiwa, oruwaniwa, otaperiwa mare, 33owaxuliwa, egipe. Vano nlabo na neethaaru gineere ovenya muukwani>>.

34Anamasuuza ale kayeewelelagamo yego mwa dhaatedhene. Dhatapulelaga madhu ala yaaligi oowiipiteya, kayanonelagamo dhawogigiiye.

Yesu onomuyiliha muliba ohoona

(Matewuzhi 20.29-34; Maruku 10.46-52)

35Dhahipadduwa Yesu aaddamelaga nluwa na oZheriko wahikala muthu oohoona akaraatilege seresere ya rampa, alobaga wa athu yowiikamihedhana. 36Ageewile musiddo wa anamwinji wa athu yaviraga ahikohaga si ddi eneereya. 37Yahimwaaddelaga, wiira: <<Yesu a oNazarethi dinavira>>.

38Vano oliye ahikuwaga, wiira: <<Yesu, Mwaana a Davidi,#18.38 Mwaana a Davidi Ndda naali ndina nimohi na Misiya nanoniwiiyena ni aZhudewu. Moone teto verisikulu 39. mugeeddiwele thagaraga!>>

39Ale yadhowaga osogolo wa Yesu yomwihiihaga wi amaale. Mbwenye oolibihedhagave okuwaga: <<Mwaana a Davidi, mugeeddiwele thagaraga!>>

40Vano Yesu ahiimelaga, wawiirela wi emudhowena va oliye. Agafiyile, Yesu ahimukohaga, wiira: 41<<Onafuna guwiirele ddi?>>

Oliye waakula: <<Nabwiyani, ginafuna giwelele woona>>.

42Yesu ahimwiirelaga: <<Woona waawo owelele, nuuyilihile thi nroromelo naawo>>.#18.42 Nuuyilihile Naari wi: nuhuuvulumusa. 43Mowaaguva ahambeela woona, omuharaga, amutamaalaga Mulugu. Athu aatene egoonile nde yoomutamaalaga Mulugu.

Currently Selected:

Luka 18: tke

Highlight

Copy