Luka 20

Yesu onokohiwa dha owodha waaye

(Matewuzhi 21.23-27; Maruku 11.27-33)

1Nlabo nimohi Yesu aasuuzihaga athu mu nyuba ya Mulugu, alaleyaga Muselu Wapama, yahidhaaga apogo a anamakutha ni anamasuuziha a malamulo, vamohi ni makolo a mutugumano. 2Yahimukohaga, wiira: <<Onaaddele owodha oneeriiwena dhego dhi okumilena waani? Wuuvahile owodha wula baani?>>

3Yesu ahawaakulaga, wiira: <<Miyo teto ginowuukohani yego emohi, mugaaddele: 4Amvahile Zhuwawu Namabathiza owodha wi abathizege aali Mulugu, yaali athu?>>

5Aliwa yahambeelaga okohana mwakaleligiisu, yiiraga: <<Neera <Amvahile di Mulugu>, ononikoha eere: <Ki mudhe muhumurumeedhege?> 6Vano nehi niire: <Waali wa athu>, athu aatene enofiyedha onipa ni mabwe vowi mmurimani mweewa enolibihedha wi Zhuwawu aali namavuhulela>>.

7Omamalelo wiwa yahaakulaga, wiira: <<Kannonile>>.

8Vano Yesu ahawaakulaga, wiira: <<Naari miyo teto kaginowaaddelani ni owodha baani gineeriimina dhego dhi>>.

Musibe wa anamalima abure

(Matewuzhi 21.33-46; Maruku 12.1-12)

9Nuwindo, Yesu ahambeelaga owoga ni athu ale musibe ola: <<Mulobwana mmohi ahilima mudda wa uuva, ahaahiyedha anamalima, oliye ovenyavo odhowa elabo emohiwa, ahikala wewule mudhidhi woolapeleene. 10Ogafiyile mudhidhi woovaha dhoovaha dha uuva ahimuruma mwiimeleli aaye wa anamalima ale wi yamvahewo dhoovaha dha mmuddani mule. Mbwenye anamalima ale yahimuddwadhaga, omuweliha, ehimvahile yego. 11Nuwindo, ahimuruma mwiimeleli mmohiwa, mbwenye teto nuulena yahimuddwadhaga omwiirela dhabure, omuweleliha mundduli ahinna yego. 12Nuwindo, ahimuruma a neethaaruya teto nuulena yahimporosa, omvokedha okwibi.

13<<Vano muliba mudda ole ahiira: <Gineere ddi? Gimurume mwaanaga, ginamudhiveliimi mwaagahi ola kimuriiha?>

14<<Anamalima ale egamoonile, yahaaddelanaga mmohi ni mukwaaye, yiiraga: <Ola di namahalana mudda, nimpe wi mureeleloya okale weehu>. 15Yahimvokedhaga ode wa mudda ole, ompa.#20.15 Mukalelo wa aZhudewu yalima mudda yowaabela cinga.

<<Ki muliba mudda ole adha, onawiirena avi anamalima ale? 16Oliye onoodha, aape, eera ndo, aabolihe amohi muddaya>>.

Athu egeewile nda, yahiiraga: <<Dhi kadhinapadduwa!>>

17Vano Yesu ahaasugwaga, wiira: <<Enatapulela ddi yoolebiwa ela eni:

<Nibwe nenddo nakooddile anamamaga nyuba,

ndda nihisadduwa okala nibwe noohiddeela nyuba>. # 20.17 Masaalimu 118.22.

18Olene onatongwele nibwe nddi onogwaddanyeya, ole nnammoreliiwa nibwe nddi onoosileya>>.

19Wora emohive elene anamasuuziha a malamulo ni apogo a anamakutha yoomusayela omwihidda vowi yahiiwaga wi musibe ole aawogelaga aliwa. Mbwenye yawoovaga athu.

Opeleka musoko wa Sezari

(Matewuzhi 22.15-22; Maruku 12.13-17)

20Vano yoomuharahara, yahaaruma athu yanna mukalelo wooharihamo wi yamuwage Yesu muwano, emwihidde yampeleke mu othongi wa kuminadori. 21Vano yahimukohaga, wiira: <<Namasuuziha nihinona wi munowoga, munosuuziha mowogoowa, kamwinna nsakulo wi ola baani, munosuuziha dila ya Mulugu ni ebaribari. 22Dhinorumeedheya, naari kadhinarumeedheya wi nipelekege musoko wa Sezari?>>

23Mbwenye Yesu vowi ahinona ogongomwa weewa ahawaakulaga, wiira: 24<<Mugoonihe korowa emohi ya parata.#20.24 Korowa ya parata Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi. Kove elivo sawani? Ki ndina nilebiwevo thawani?>>

Vano aliwa yahimwaakulaga, wiira: <<Dha Sezari>>.

25Yesu ahawaaddelaga, wiira: <<Mumvahege Sezari eli ya Sezari, mumvahege Mulugu eli ya Mulugu>>.

26Kayoonile yoomwihiddana mmadhuni vameentoni va athu, vano mootikiniheya ni dhowaakula dhaaye yahimaalaga.

Ovenyihiwa muukwani

(Matewuzhi 22.23-33; Maruku 12.18-27)

27ASaduseyi amohiwa, ayene yaharumeedha wi ohukalawo ovenyihiwa muukwani, yahimwaaddamelaga Yesu. 28Omukoha, wiira: <<Namasuuziha, Mozezi ahileba nlamulo nowi akwa mulobwana mmohi, akala ahitela amwihiya mwihiyanaaye, ahinna ahima, ddibile amutelege maamukweleya wi ambalele ahima ddibile ole yeelengiwege ahima a mwanookwa. 29Dhahiireya ndala yahikalawo addibila atanu ni abiili. Owambeela ahimutela mwihiyana, oliye okwa, ahimbalilena mwaana. 30A nabiili, 31a neethaaru, emodha-modhave atanu ni abiili ala yahikwa, yahimbalele ahima. 32Teto omagomihedhowa mwihiyana ole okwa. 33Ki nlabo noovenyihiwa muukwani mwihiyana ola, onaakale mwadha wani vowi addibila aatene atanu ni abiili ale yahimutela?>>

34Yesu ahawaakulaga, wiira: <<Athu eli elabo ya vati vano enotela, enoteliwa. 35Mbwenye ale enaakale oofwaneelela ofiya elabo eyo enadha voovenyihiwa muukwani kawuli otela naari oteliwa, 36vowi kinaakwege, enaakale wona angero. Vano enakala ahima a Mulugu mwaha woovenyihiwa muukwani. 37Mozezi ahiwoga wi anookwa enovenyihiwa vawogiliiye thalako ya nikupu nahiddaga munddo, veeriliiye wi <Nabwiya di Mulugu a Abarahamu, Mulugu a Ezaaki, Mulugu a Yakobo>.#20.37 Okuma 3.6. 38Mulugu kahuwo Mulugu a athu ookwa, di Mulugu a athu ookalawo vowi wa oliye aatene ehikanna egumi>>.

39Vano amohiwa mwa anamasuuziha a malamulo yahiira: <<Namasuuziha, muhaakula pama!>> 40Nuwindo, yowoovaga omukoha dhimohi dhiwa.

Kirixtu di Nabwiya a Davidi

(Matewuzhi 22.41-46; Maruku 12.35-37)

41Yesu ahaakohaga, wiira: <<Enaawogela ddi wi Kirixtu#20.41 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. di mwaana a Davidi? 42Vowi mwiinyeene Davidi ohuwoga mmaniivuruni a Masaalimu, wiira:

<Nabwiya Mulugu ohuwoga wa Nabwiya aaga:

Okaraati omoononi waaga wooja,

43 ofiyedha gaahele amwiiddani aawo

ekale wona voonyingala manyalo aawo>. # 20.42-43 Masaalimu 110.1.

44Akala Davidi onamwiira <Nabwiya>. Onaakale addi mwaanaye?>>

45Athu aatene emvuruwanaga Yesu ahawaaddelaga anamasuuza aaye, wiira: 46<<Pole-pole ni anamasuuziha a Malamulo, enodhiveliwa owara mikanjo dhoolapa, efunaga vajinjivene olojeliwa ni nriiho mburo dhowooneya. Aliwa enodhiveliwa mu nyuba dha matugumano enothamagela okaraatela dhittengu dhowambeela, mburo dha nriiho mmathangani. 47Aliwa enowaaka mowaaguva nyuba dha amaamukwele aahiyana ni wawiiyela dhookalana dheewa moohukalana manyazo, enolobela moolapiha, moonyengetha. Athu ala enoodha yoonihiwe goyi yuulubale waakwaranya amohi>>.

Currently Selected:

Luka 20: tke

Highlight

Copy