Meerelo a Arumiwi 8

1Sawuli aaligi vevale, oorumeedhelaga dha opiwa wa Extevawu.

Oharahariwa ni omwadheya wa gerezha

Nlabo nendde gerezha ya oZheruzalemi yahambeela oharahariwa. Athu aatene oororomela yahibalaleyela dhipaddi dhaatedhene dha oZhudeya ni dha oSamariya, waahiya arumiwi. 2Alobwana amohi oomudhivela Mulugu yahidhowa omulogoha Extevawu, yahimunddela vajinji. 3Mbwenye Sawuli ole ahixixa obwanyula gerezha. Nyuba ni nyuba oovolowamo, aaburulaga alobwana ni ahiyana, aafugelaga mukaambura.

Ofiya wa gerezha oPalextina

4Oororomela ale yabalaleye yoovira elaleyaga Muselu Wapama. 5Filipi agakitele nluwa na oSamariya, owaalaleyela Kirixtu. 6Anamwinji muumohini yoomvuruwana dhende dhawogiiye, yiiwaga yowoona dhitoonyihedho, dhootikiniha dheeriiyena. 7Mineba dhootakala dhookuma mwa athu ajinji, dhikuwaga, ajinji ooheedda, ooragala yahiyilihiwa. 8Ndala, muluwani mule mwahidhaala ohagalala.

Otthwaruwa wa muliba masenga

9OSamariya wahikala mulobwana mmohi eethaniwa Simawu. Ola owiirihedhesa dha masenga, aatikinihaga athu aatene. Oliye owiivuwiha wi doothithimiheya vajinji, 10athu aatene, ahima ni apogo yoomvuruwana, yoowoga, yiiraga: <<Mulobwana ola fu owodha wa Mulugu, oneeriwa Owodha Wuulubale>>. 11Aliwa yoomvuruwana vowi wahivira mudhidhi mujinjeene aatikinihaga athu ni masenga aaye ale. 12Mbwenye yahimuroromela Filipi vevo valaleyiiye Muselu Wapama, wawogaga dha Omwene wa Mulugu ni Yesu Kirixtu. Alobwana ni ahiyana yaroromele yahibathiziwa. 13Simawu teto ahiroromela, agabathiziwe oomuhara Filipi mwaviriiye, oonaga dhitoonyihedho ni dhootikiniha dhuulubale dheereya, ootikiniheya.

14OZheruzalemi, arumiwi egeewile wi Samariya ahaakela madhu a Mulugu, yahaarumawo Peduru ni Zhuwawu. 15Aliwa egafiyile, yahaalobelela wi aSamariya yaakele Muneba Woweela, 16vowi yabathiziwe mu ndina na Nabwiya Yesu, mbwenye Muneba Woweela waali ohunaakitele. 17Nuwindo, Peduru ni Zhuwawu yahaahela madada eewa aSamariya, vano aliwa yahaakela Muneba Woweela.

18Simawu vooniliiye wi Muneba Woweela waakeliwa ni ohela madada wa arumiwi, ahifuna waavaha korowa, 19ahiira: <<Mugivahe ni miyeene teto owodhawo wi muthu onamuheligiimi madada aaga aakelege Muneba Woweela>>.

20Peduru ahimwaakulaga, wiira: <<Korowa dhaawo vamohi ni weeya mudhowe omunddoni, mwaha wi onoobuwela wi mvahi wa Mulugu onoguliwa ni korowa! 21We kwinna epaddi, naari mburo va mabasa alena, mwaha wi murima waawo kahuwo wowogoowa vameentoni va Mulugu. 22Otthwaruwe mwa dhootakala dhaawo, olobele wa Nabwiya, adha ayo oolevelela yuubuwelelo eyo ya mmurimani mwaawo, 23vowi ginowoona wi we ohudhaaliwa nrima, ohumagiwa ni fingwi dha yoothega>>.

24Vevo Simawu ole ahaakulaga: <<Mugilobelele wa Nabwiya wi dhiwogiliinyu dhihigipadduwele>>.

25Peduru ni Zhuwawu egamalile waalibiha ni olaleya madhu a Nabwiya, ewelelaga oZheruzalemi, yoolaleyaga Muselu Wapama mirudda dhijinji dha oSamariya.

Filipi ni mwEtiyopiya

26Mungero a Nabwiya ahiira wa Filipi: <<Kavenya, odhowele wewo onakumela pevo ya murubi, dila ya mwiiddeddereni enakita oZheruzalemi, edhowaga oGaza>>. 27Oliye ahivenyaga, omaruwa. Mundila ahimfwanyaga mulobwana mmohi mwEtiyopiya oofuuliwa,#8.27 Oofuuliwa mu elemeelelo ya athu ale, adhaari amohi yeera ofuuliwa. musogoleli oofuneya aang'anela dhego dhaatedhene dha Kandasi, mwene a mwihiyana aEtiyopiya. Mulobwana ola afiyile oZheruzalemi, omweebedha Mulugu, 28voowelela owaniwa, ahikaraatigi mugareetani#8.28 Gareeta Naari wi: karasariya ya ng'ombe. mwaaye, weelengaga niivuru na namavuhulela Ezaya. 29Vano Muneba wahiira wa Filipi: <<Kaaddamela gareeta eyo othaananegena>>. 30Filipi agathamagelewo, ahimwiiwaga mulobwana ole eelengaga niivuru na namavuhulela Ezaya. Filipi ahimukohaga: <<Nabwiya, munowiiwelelamo dhineelengiinyu?>>

31Oliye ahaakulaga: <<Aa, gineewelelemo addi gihinna muthu oogaaddeliha?>> Nuwindo, ahimulobaga Filipi wi agwele, akaraati ni oliye.

32Madhu a Maleba yeelengigiiye baala:

<<Wona nibila nnadhowiwana omapiwelo,

wona nibila vameentoni va muliba ojema

nnakala pee, oliye kanafugula mulomo.

33Vomvevusa, kaathongiwe mowogoowa.

Kalivo onawoge dha anamabaliwelamo aaye,

Vowi egumi yaaye ehivenyihiwamo

mwiilaboni ya vati>>.#8.33 Ezaya 57.7-8.

34Mulobwana ole ahimukohaga Filipi, wiira: <<Ogaaddele, namavuhulela ola, onawoga dhawani? Dha oliyeene, kaahi dha mmohiwa?>> 35Nuwindo, Filipi, ahambeelaga Maleba ale, omulaleyela Muselu Wapama wawoga dha Yesu.

36Edhowagave mundila, yahifiyaga mburo vaaligi mahinje. Mulobwana ole ahiiraga: <<Kasugwa, mahinje ala, enahiiha ddi wi gihibathiziwe?>> 37[#8.37 Madhu ala kinafwanyeya mmaniivuruni awale.Filipi ahiiraga: <<Dhinowaandeya, waroromela ni murima waawo waatene>>. Mulobwana ole ahaakulaga, wiira: <<Ginororomela wi Yesu di Mwaana a Mulugu>>.] 38Vevale ahiimelihaga gareeta, Filipi ni mulobwana ole yahikitelaga mmahinjeni, vano Filipi ombathiza. 39Egakumile mmahinjeni, mowaaguva Muneba wa Nabwiya wahimuthukula Filipi. MwEtiyopiya ole kamoonileve, mbwenye ahiwelela olenddo waaye ahagalalaga. 40Filipi afwanyeya oAzoto, eddeeddaga ofiyedha oSezareya, oolaleyela Muselu Wapama maluwa maatene mwaviriiye.

Currently Selected:

Meerelo a Arumiwi 8: tke

Highlight

Copy